ଭୁବନେଶ୍ୱର: ଓଡ଼ିଆ ଫିଲ୍ମ 'ଦମନ'ର ସଫଳତା ପରେ 'ପରବ' ସହ ଫେରୁଛନ୍ତି ଓଲିଉଡର ଲୋକପ୍ରିୟ ନିର୍ମାତା ଦୀପେନ୍ଦ୍ର ସାମଲ । ନିକଟରେ ଏହି ଫିଲ୍ମର ଗୋଷଣା କରିଥିଲେ ନିର୍ମାତା । ବର୍ତ୍ତମାନ ଫିଲ୍ମର ଟିଜର ରିଲିଜ କରିଛନ୍ତି ନିର୍ମାତା । ଏଥିସହ ଫିଲ୍ମର ଷ୍ଟାରକାଷ୍ଟ ଏବଂ ରିଲିଜ ତାରିଖ ପ୍ରକାଶ ପାଇଛି । ରିଲିଜ ହୋଇଥିବା ଟିଜରରେ ବହୁ ଅଭିଜ୍ଞଙ୍କୁ ଅଭିନେତା ଓ ଅଭିନେତ୍ରୀଙ୍କ ଝଲକ ଦେଖିବାକୁ ମିଳିଛି । ତେବେ ଫିଲ୍ମ କେବେ ରିଲିଜ ହେବ? ଜାଣନ୍ତୁ,
ଓଡ଼ିଆ ଫିଲ୍ମ 'ପରବ'ର ଟିଜର ରିଲିଜ
ଜେପି ମୋସନ ପିକ୍ଚର୍ସ ବ୍ୟାନରରେ ପ୍ରସ୍ତୁତ ଓଡ଼ିଆ ଚଳଚିତ୍ର 'ପରବ' ର ଟିଜର ରିଲିଜ କରିଛନ୍ତି । 1 ମିନିଟ 45 ସେକେଣ୍ଡର ଏହି ଟିଜର ଆରମ୍ଭରେ ଗୋଟିଏ ଘରେ ନିଆଁ ଲାଗିଥିବାର ଦେଖିବାକୁ ମିଳିଛି । ପରେ ଏଥିରେ ଫିଲ୍ମର ଷ୍ଟାରକାଷ୍ଟଙ୍କ ଝଲକ ଦେଖିବାକୁ ମିଳିଛି । ଏଥିସହ ଶେଷରେ ପିଲ୍ମର ରିଲିଜ ତାରିଖ ପ୍ରକାଶ ପାଇଛି । ଫିଲ୍ମ ଡିସେମ୍ୱର 20, 2024ରେ ରିଲିଜ ହେବ । ଅଭିନେତ୍ରୀ ଅନୁ ଚୌଧୁରୀ ଫିଲ୍ମର ଟିଜରକୁ ନିଜ ଇନଷ୍ଟାଗ୍ରାମରେ ସେୟାର କରିଛନ୍ତି । ଏବଂ ସେ କ୍ୟାପସନରେ ଲେଖିଛନ୍ତି, 'ପରବର ଟିମ ଆପଣଙ୍କ ଆଶୀର୍ବାଦ କାମନା କରୁଛି । ଆଶାକରୁଛି ଟିଜରକୁୁ ଆପଣ ପସନ୍ଦ କରିବେ। ଜୟ ଜଗନ୍ନାଥ ।' ତେବେ ଟିଜରକୁ ଲୋକେ ପସନ୍ଦ କରିଥିବା ବେଳେ ଫିଲ୍ମକୁ ଉତ୍ସାହର ସହ ଅପେକ୍ଷା କରିଛନ୍ତି ।
'ପରବ'ର ଷ୍ଟାରକାଷ୍ଟ
ଦୀପେନ୍ଦ୍ର ସାମଲଙ୍କ ନିର୍ମିତ ଏହି ଫିଲ୍ମରେ ମୁଖ୍ୟ ଭୂମିକାରେ ଓଲିଉଡ ଲୋକପ୍ରିୟ ଅଭିନେତା ସିଦ୍ଧାନ୍ତ ମହାପାତ୍ର, ଜାତୀୟ ପୁରସ୍କାର ବିଜେତା 'ପ୍ରତୀକ୍ଷା ଏବଂ ଦମନ ଅଭିନୀତ ଅଭିନେତା ଦିପାନ୍ୱିତ ଦାସମହାପାତ୍ର, ଅଭିନେତ୍ରୀ ସୂର୍ଯ୍ୟମୟୀ ମହାପାତ୍ରଙ୍କ ସମେତ ଅନେକ ତାରକା ନଜର ଆସିବେ । ଏଥିସହ ଅନୁ ଚୌଧୁରୀ ଏହି ଫିଲ୍ମରେ ଅଭିନୟ କରିବା ସହ ସହ-ନିର୍ମାତା ସହ ଅଭିନେତ୍ରୀ ଭାବେ ବି ନଜର ଆସିବେ ।
'ପରବ' କାହାଣୀ
'ପରବ'ର କାହାଣୀ ବିଷୟରେ କହିବାକୁ ଗଲେ, ଏହି ଫିଲ୍ମ ଓଡ଼ିଶାର ସୀମା ବିବାଦ ଓ ସମ୍ବେଦନଶୀଳ ବିଷୟକୁ ଆଧାର କରି ନିର୍ମିତ ହୋଇଛି । ଓଡ଼ିଶାର ବିବାଦୀୟ ଘଟଣା ମହାନଦୀ ପ୍ରସଙ୍ଗ ହେଉ ଅବା କୋଟିଆ- ଆନ୍ଧ୍ର ପ୍ରସଙ୍ଗ ହେଉ ଏହି ଘଟଣାମାନକୁ ଆଧାର କରି ଫିଲ୍ମଟି ନିର୍ମିତ ହୋଇଛି । ଜେପି ମୋସନ ପିକ୍ଚର୍ସ ବ୍ୟାନରରେ ପ୍ରସ୍ତୁତ ଏହି ଫିଲ୍ମକୁ ଚିନ୍ମୟ ଦାସ ନିର୍ଦ୍ଦେଶନା ଦେଇଛନ୍ତି । ତେବେ ଏହି ଫିଲ୍ମ ମଧ୍ୟ ଦମନ ପରି ଲୋକଙ୍କ ମନକୁ ଛୁଇଁବ ବୋଲି ଆଶା ରଖିଛନ୍ତି ନିର୍ମାତା ।
ଏହା ମଧ୍ୟ ପଢନ୍ତୁ: 'ଦମନ' ପରେ 'ପରବ' ସହ ପୁଣି ପରଦାରେ ଧମାକା କରିବାକୁ ପ୍ରସ୍ତୁତ ଦୀପେନ୍ଦ୍ର ସାମଲ, ଏହି ତାରକା ଆସିବେ ନଜର
ଶ୍ରେଷ୍ଠ ଓଡ଼ିଆ ଚଳଚ୍ଚିତ୍ର ଭାବେ ଦମନକୁ ମିଳିଥିଲା ଜାତୀୟ ପୁରସ୍କାର
୭୦ତମ ଜାତୀୟ ଚଳଚ୍ଚିତ୍ର ପୁରସ୍କାରରେ ‘ଦମନ’କୁ ଶ୍ରେଷ୍ଠ ଓଡ଼ିଆ ଚଳଚ୍ଚିତ୍ର ଭାବେ ପୁରସ୍କୃତ କରାଯାଇଛି । ୨୦୨୨ ବର୍ଷ ପାଇଁ ଏହି ଫିଲ୍ମ ଆୱାର୍ଡ ମିଳିଥିବା ବେଳେ ପ୍ରଯୋଜକ ଦୀପେନ୍ଦ୍ର ସାମଲ ଏହାକୁ ପ୍ରସ୍ତୁତ କରିଥିଲେ । ଏଥିରେ ବାବୁସାନ ମହାନ୍ତି ଏବଂ ଦିପାନ୍ୱିତ ଦାସମହାପାତ୍ର ମୁଖ୍ୟ ଭୂମିକାରେ ନଜର ଆସିଥିଲେ । କହିରଖୁଛୁ କି, ଦିପାନ୍ୱିତ ଦାସମହାପାତ୍ରଙ୍କ ଅଭିନୀତ 'ପ୍ରତୀକ୍ଷା' ଫିଲ୍ମ ମଧ୍ୟ ଜାତୀୟ ପୁରସ୍କାର ହାତେଇଛି । ତେବେ ଦୁଇ ଦୁଇଟି ଜାତୀୟ ପୁରସ୍କାର ଫିଲ୍ମରେ କାମ କରିଥିବା ଅଭିନେତା ଦିପାନ୍ୱିତଙ୍କୁ ପୁଣି 'ପରବ' ରେ ଦେଖିବାକୁ ମିଳିବ ।
ଇଟିଭି ଭାରତ, ଭୁବନେଶ୍ୱର
