ହାଇଦ୍ରାବାଦ: ପ୍ୟାରିସ୍ ୨୦୨୪ ଅଲିମ୍ପିକ୍ସରୁ ଭାରତୀୟ ମହିଳା ରେସଲର ଭିନେଶ ଫୋଗତଙ୍କୁ ଅଯୋଗ୍ୟ ଘୋଷିତ ପରେ ସେ କୁସ୍ତିରୁ ଅବସର ଘୋଷଣା କରିଛନ୍ତି । ଏହି ସମୟରେ ତାଙ୍କ ସମର୍ଥନରେ ଆଗେଇ ଆସିଛନ୍ତି ବଲିଉଡର ତମାମ ସେଲିବ୍ରିଟି । ଭିନେଶ ଫୋଗତଙ୍କ ଅବସର ଘୋଷଣା ପରେ ବଲିଉଡ ତାରକା ଅନୁଷ୍କା ଶର୍ମା, କଙ୍ଗନା ରାଣାୱତ, କରଣ ଜୋହର, ମଲାଇକା ଆରୋରା, ଆଲିଆ ଭଟ୍ଟଙ୍କ ସମେତ ଅନେକ ସେଲିବ୍ରିଟି ତାଙ୍କୁ ସମର୍ଥନ କରିବା ସହ ଆତ୍ମବିଶ୍ୱାସ ବଢାଇଛନ୍ତି ।
'ଭିନେଶ ତୁମ ପାଇଁ ସାରା ଦେଶ ଗର୍ବିତ'- ଅନୁଷ୍କା ଶର୍ମା
ଭିନେଶ ଫୋଗତଙ୍କ ଅଯୋଗ୍ୟତା ଏବଂ ଅବସର ଘୋଷଣା ପରେ ଅନୁଷ୍କା ଶର୍ମା ନିଜ ଇନଷ୍ଟା ଷ୍ଟୋରୀରେ ତାଙ୍କୁ ଉପରେ ଏକ ନୋଟ୍ ସେୟାର କରିଛନ୍ତି । ସେ ଲେଖିଛନ୍ତି, ''ଆମେ ସମସ୍ତେ ଦୁଃଖିତ, କିନ୍ତୁ ମୁଁ କଳ୍ପନା କରିପାରୁ ନାହିଁ ଯେ ଆପଣଙ୍କ ଉପରେ ବିତୁଛି । ଆପଣ ଜଣେ ପ୍ରକୃତ ଚାମ୍ପିଅନ । ଆପଣ ଆମକୁ ଜଣେ ଭାରତୀୟ ଭାବରେ ଗର୍ବିତ କର । ଦୁନିଆ ଆପଣଙ୍କୁ ନେଇ ପୁଣି ସେଲିବ୍ରେସନ କରିବ ।''
'ଭିନେଶ ତୁମେ ପ୍ରକୃତ ଚାମ୍ପିଅନ'- ସାରା ଅଲି ଖାନ
ସେହିପରି ସାରା ଅଲି ଖାନ ମଧ୍ୟ ଭିନେଶଙ୍କୁ ସମର୍ଥନ କରିବାକୁ ଆଗେଇ ଆସିଛନ୍ତି । ସେ ନିଜ ଇନଷ୍ଟାଗ୍ରାମ ଷ୍ଟୋରୀରେ ଭିନେଶଙ୍କର ଏକ ଫଟୋ ସେୟାର କରି କ୍ୟାପସନରେ ଲେଖିଛନ୍ତି, '' ଭିନେଶ ଫୋଗତ, ତୁମେ ଆମ ସମସ୍ତଙ୍କ ପାଇଁ ପ୍ରକୃତ ଚାମ୍ପିୟନ । ଆମେ ତୁମ ପାଇଁ ଗର୍ବିତ ।''
'ଭିନେଶ ତୁମେ ଗୋଲ୍ଡ'- କରଣ ଜୋହର
ଚଳଚ୍ଚିତ୍ର କରଣ ଜୋହର ଭିନେଶଙ୍କ ପାଇଁ ଲେଖିଛନ୍ତି, 'ଭିନେଶ ଫୋଗତ ଇତିହାସରେ ତାଙ୍କ ନାମ ପଞ୍ଜିକରଣ କରିଛନ୍ତି । ତାଙ୍କର ଦୃଢତା, ଶକ୍ତି ଏବଂ ଅବିସ୍ମରଣୀୟତା ହେଉଛି ତାଙ୍କର ପଦକ । ସେ ଗୋଲ୍ଡ ଏବଂ କିମ୍ବଦନ୍ତୀ ଅଟନ୍ତି ।'
'ଯୁଗ ଯୁଗେ ତୁମେ ଚାମ୍ପିଅନ'- ଆଲିଆ ଭଟ୍ଟ
ଆଲିଆ ଭଟ୍ଟ ମଧ୍ୟ ଭିନେଶଙ୍କୁ ସମର୍ଥନ କରିଛନ୍ତି । ସେ ଲେଖିଛନ୍ତି, ''ଭିନେଶ ଫୋଗତ, ତୁମେ ସମଗ୍ର ଦେଶ ପାଇଁ ପ୍ରେରଣା । ଇତିହାସ ସୃଷ୍ଟି କରିଛ । ଆଜି ତୁମେ କହିପାରିବ ଯେ ତୁମର ହୃଦୟ ଭାଙ୍ଗି ଯାଇଛି । ହେଲେ ତୁମେ ଏକା ନୁହଁ, ତୁମ ସହ ଆମର ହୃଦୟ ଭାଙ୍ଗିଯାଇଛି । କିନ୍ତୁ ତୁମେ ସୁନା ଏବଂ ତୁମେ ଲୁହା । ଆଉ ଏହିସବୁ ଜିନିଷ ତୁମଠାରୁ କେହି ନେଇପାରିବେ ନାହିଁ । ଯୁଗ ଯୁଗରେ ତୁମେ ଚାମ୍ପିଅନ ହୋଇରହିବ । ତୁମ ପରି କେହି ନାହିଁ ।''
'ସାରା ଦେଶ ତୁମ ସହ ଛିଡ଼ା ହୋଇଛି'- କଙ୍ଗନା
କଙ୍ଗନା ରାଣାୱତ ତାଙ୍କ ଅଫିସିଆଲ୍ ଇନଷ୍ଟାଗ୍ରାମ କାହାଣୀରେ ଭିନେଶଙ୍କ ପାଇଁ ଏକ ପୋଷ୍ଟ ସେୟାର କରିଛନ୍ତି । ସମଗ୍ର ଦେଶ ତାଙ୍କୁ କିପରି ସମର୍ଥନ କରୁଛି ତାହା ଦର୍ଶାଇ ସେ ଏକ ଫଟୋ ପୋଷ୍ଟ କରିଛନ୍ତି । ଫଟୋ ସହ ସେ ଲେଖିଛନ୍ତି, 'ଭିନେଶ କାନ୍ଦ ନାହିଁ, ସମଗ୍ର ଦେଶ ତୁମ ସହ ଛିଡା ହୋଇଛି ।' ଦ୍ୱିତୀୟ ପୋଷ୍ଟରେ କଙ୍ଗନା ଭିନେଶଙ୍କର ଏକ ଫଟୋ ପୋଷ୍ଟ କରିଛନ୍ତି, ଯେଉଁଥିରେ ରେସଲର ଡାକ୍ତରଖାନା ଶଯ୍ୟାରେ ବସିଥିବାବେଳେ ପିଟି ଉଷାଙ୍କ ସହ କଥାବାର୍ତ୍ତା ହେଉଥିବା ଦେଖିବାକୁ ମିଳିଛି । ଏହି ଫଟୋ ସେୟାର କରି କଙ୍ଗନା କ୍ୟାପସନରେ 'ତୁମେ ସିଂହୀ' ବୋଲି ଲେଖିଛନ୍ତି ।
'ଗର୍ବର ସହ ତୁମେ ମୁଣ୍ଡ ଟେକ'- ନୟନତାରା
ସାଉଥ ସୁନ୍ଦରୀ ନୟନତାରା ମଧ୍ୟ ଭିନେଶ ଫୋଗତଙ୍କ ପାଇଁ ଏକ ପୋଷ୍ଟ କରିଛନ୍ତି । ଅଭିନେତ୍ରୀ ଲେଖିଛନ୍ତି, 'ଚିନ୍ ଅପ୍ ଯୋଦ୍ଧା । ଆପଣ ଅନେକଙ୍କୁ ପ୍ରେରଣା ଦିଅନ୍ତି ଏବଂ ଆପଣଙ୍କର ମୂଲ୍ୟ ବିଜୟ ଦ୍ୱାରା ମାପ କରାଯାଏ ନାହିଁ । ତୁମେ ଏକ ବଡ ଉପହାର ପାଇଛ । ବହୁତ ଭଲପାଇବା, ଯାହା କୌଣସି ସଫଳତାଠାରୁ ବଡ଼ ଅଟେ । ଗର୍ବ ସହ ନିଜ ମୁଣ୍ଡକୁ ଟେକ ।''
ଏହା ମଧ୍ୟ ପଢନ୍ତୁ: 'ମୁଁ ହାରିଗଲି...' ଅଲିମ୍ପିକ୍ସରେ ଅଯୋଗ୍ୟ ଘୋଷିତ ପରେ କୁସ୍ତିକୁ ଭିନେଶ ଫୋଗତଙ୍କ ଅଲବିଦା
ସେହିପରି ମଲାଇକା ଆରୋରା, ଅନୀଲ କପୁର, ସୁନୀଲ ଶେଟ୍ଟୀ, ବରୁଣ ଧୱନ, ସୋନୁ ସୁଦ, ତାପସୀ ପନ୍ନୁଙ୍କ ସମେତ ଅନେକ ତାରକା ଭିନେଶ ଫୋଗତଙ୍କୁ ସମର୍ଥନ ସହ ମନୋବଳ ବଢାଇବାକୁ ଚେଷ୍ଟା କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
