ବ୍ରହ୍ମପୁର: ଡିସେମ୍ୱର 5(ଗୁରୁବାର) ଦିନ ସାରା ଦେଶରେ ରିଲିଜ ହୋଇଛି ଅଲ୍ଲୁ ଅର୍ଜୁନଙ୍କ ବହୁ ପ୍ରତିକ୍ଷୀତ ଫିଲ୍ମ 'ପୁଷ୍ପା 2' । ଫ୍ୟାନ୍ସ ଫିଲ୍ମକୁ ଉତ୍ସାହର ସହ ଅପେକ୍ଷା କରିଥିବା ବେଳେ ଓଡ଼ିଶାରେ ମଧ୍ୟ ଏହାର କ୍ରେଜ ଦେଖିବାକୁ ମିଳିଥିଲା । ଭୁବନେଶ୍ୱର ପରେ ରେଶମ ସହର ବ୍ରହ୍ମପୁରର ସମସ୍ତ ପ୍ରେକ୍ଷାଳୟରେ ସକାଳ ସମୟରୁ ଆରମ୍ଭ କରି ଦିନର ପ୍ରତ୍ୟେକ ଶୋ' ହାଉସଫୁଲ୍ ରହିଥିଲା । ପ୍ରଥମ ଦିନରେ ପ୍ରଥମ ଶୋ' ଦେଖିବାକୁ ଥିଏଟରରେ ଜମିଥିଲା ଦର୍ଶକଙ୍କ ଭିଡ଼ । ଫିଲ୍ମ ନେଇ ଦର୍ଶକଙ୍କ କ'ଣ ରହିଛି ପ୍ରତିକ୍ରିୟା ? ଜାଣନ୍ତୁ,
ବ୍ରହ୍ମପୁରରେ 'ପୁଷ୍ପା 2' କ୍ରେଜ
ଚଳିତବର୍ଷର ଶ୍ରେଷ୍ଠ ରିଲିଜ ହୋଇଥିବା ସାଉଥ ସୁପରଷ୍ଟାର ଅଲ୍ଲୁଙ୍କ ଫିଲ୍ମ ବ୍ରହ୍ମପୁରରେ ଦୁଇଟି ପ୍ରକ୍ଷାଳୟରେ ରିଲିଜ ହୋଇଥିବା ବେଳେ ଦର୍ଶକଙ୍କ ଜମିଥିଲା ଖଚାଖଚ ଭିଡ଼ । ପ୍ରଥମ ଦିନର ଶୋ' ଦେଖି ଦେଖି ଫିଦା ହୋଇଛନ୍ତି ଦର୍ଶକ ଓ ଫ୍ୟାନ୍ସ । 'ପୁଷ୍ପା 2' ଦେଖି ଦର୍ଶକ ବିମୋହିତ ହୋଇ ଫିଲ୍ମକୁ 'ବ୍ଲକବ୍ଲାଷ୍ଟର' ଟ୍ୟାଗ ଦେଇଛନ୍ତି । ଏହି ଚଳଚିତ୍ରରେ ରୋମାନ୍ସ ସହ ଦମାଦାର ଆକ୍ସନ ଏବଂ କାହାଣୀ ଭିନ୍ନ ଧରଣର ରହିଥିବା କହିଛନ୍ତି। ଏପରିକି ଏହି ଚଳଚିତ୍ର ସମସ୍ତ ରେକର୍ଡ ଭାଙ୍ଗିବ ବୋଲି ଅନେକ ଦର୍ଶକ ମତ ରଖିଛନ୍ତି ।
ପ୍ରଶଂସାରେ ପୋତିଲେ ଫ୍ୟାନ୍ସ
'ପୁଷ୍ପା ୨' ଫିଲ୍ମକୁ ପ୍ରଶଂସାରେ ପୋତି ପକାଇଛନ୍ତି ଦର୍ଶକ ଓ ଫ୍ୟାନ୍ସ । ଏହି ସମୟରେ ଫିଲ୍ମକୁ ନେଇ ପ୍ରତିକ୍ରିୟା ଦେଇ ଜଣେ ଫ୍ୟାନ୍ସ କହିଛନ୍ତି, ଯିଏ ଏହି ଚଳଚିତ୍ରଟି ଦେଖିବ ସେ ହିଁ ଜାଣିପାରିବ । ଫିଲ୍ମଟି ଅତ୍ୟନ୍ତ ଉକୃଷ୍ଟ ଧରଣର ହୋଇଛି । ସେହିପରି ଅନ୍ୟ ଜଣେ କହିଛନ୍ତି, ଫିଲ୍ମରେ ଅନେକ ରୋମାଣ୍ଟିକ ଏବଂ ଆକ୍ସନ ସିନ ରହିଛି । ଯାହା ବେଶ ମଜାଦାର । ଅନ୍ୟ ଜଣେ କହିଛନ୍ତି, ପୁଷ୍ପା -'ୱାଇଲ୍ଡ ଫାୟର' ଏବଂ ଏହି ଫିଲ୍ମ ସମସ୍ତ ରେକର୍ଡ ଭାଙ୍ଗିବ ।
ଏହା ମଧ୍ୟ ପଢନ୍ତୁ: ଓଡ଼ିଶାରେ 'ପୁଷ୍ପା 2' କ୍ରେଜ; ଭୁବନେଶ୍ୱରରେ ହାଉସଫୁଲ୍ ଶୋ', ପଇସା ଭସୁଲ କହିଲେ ଦର୍ଶକ
କହିରଖୁଛୁ କି, ନିର୍ଦ୍ଦେଶକ ସୁକୁମାରଙ୍କ 'ପୁଷ୍ପା ୨: ଦ ରୁଲ' ଆଜି ଅର୍ଥାତ୍ ଗୁରୁବାର ଏକାଧିକ ଭାଷାରେ ମୁକ୍ତିଲାଭ କରିଛି । 'ପୁଷ୍ପା ୨' 'ପୁଷ୍ପା: ଦ ରାଇଜ'ର ସିକ୍ବେଲ ଅଟେ । ଯାହା 2021 ଡିସେମ୍ବରରେ ମୁକ୍ତିଲାଭ କରିବା ପରେ ବକ୍ସ ଅଫିସ୍ରେ ଧମାକା କରିଥିଲା । ଏହି ଚଳଚ୍ଚିତ୍ର ବେଶ ଲୋକପ୍ରିୟତା ହାସଲ କରିବା ସହ ବ୍ଲକବ୍ଲଷ୍ଟର ହୋଇଥିଲା । ତେବେ ପ୍ରଥମ ଭାଗ ପରି 2ୟ ଭାଗରେ ଅଲ୍ଲୁ ଅର୍ଜୁନ, ରଶ୍ମିକା ମନ୍ଦାନା, ଫାହାଦ୍ ଫାସିଲ, ସୁନୀଲ, ଅଜୟ, ରାଓ ରମେଶ, ଅନାସୁୟା ଏବଂ ଅନ୍ୟ କଳାକାର ନଜର ଆସିଛନ୍ତି । ପୂର୍ବରୁ ଫିଲ୍ମର ଏହି ଚଳଚ୍ଚିତ୍ରର ଟିଜର, ଟ୍ରେଲର ଏବଂ ଗୀତ ସୋସିଆଲ ଫ୍ଲାର୍ଟଫର୍ମରେ ଦର୍ଶକଙ୍କ ଉତ୍ସାହକୁ ଖୁବ ବଢ଼ାଇଥିଲା । ତେବେ 3 ବର୍ଷ ପରେ 'ପୁଷ୍ପା ୨' ପରଦାକୁ ଆସିଥିବା ବେଳେ ଦର୍ଶକ ଏହାକୁ ପସନ୍ଦ କରୁଥିବା ଜଣାପଡିଛି ।
ଇଟିଭି ଭାରତ, ବ୍ରହ୍ମପୁର
