ନୂଆଦିଲ୍ଲୀ: ୨୦୨୪-୨୫ କେନ୍ଦ୍ର ବଜେଟରୁ କରଦାତାଙ୍କ ଅନେକ ଆଶା ରହିଥିଲା । ଟିକସ ବାବଦକୁ ସରକାର କିଛି ଅନୁକୂଳ ଘୋଷଣା କରିବା ନେଇ ଆଶା କରାଯାଉଥିଲା । ଯାହାକି ସତ ହୋଇଛି । ବଜେଟରେ କରଦାତାଙ୍କୁ ବଡ଼ ଆଶ୍ବସ୍ତି ଦେଇଛନ୍ତି ସରକାର । ବେତନଭୁକ୍ତ କର୍ମଚାରୀଙ୍କ ପାଇଁ ଷ୍ଟାଣ୍ଡାର୍ଡ ଡିଡକ୍ସନ (Standard Deduction) ପରିମାଣ ବୃଦ୍ଧି ପାଇଛି । ଷ୍ଟାଣ୍ଡାର୍ଡ ଡିଡକ୍ସନକୁ ୫୦ ହଜାରରୁ ୭୫ ହଜାରକୁ ବଢାଇଛନ୍ତି ଅର୍ଥମନ୍ତ୍ରୀ । ପେନସନଭୋଗୀଙ୍କ ପାଇଁ ଫ୍ୟାମିନ ପେନସନ ଟିକସ ଛାଡ ସୀମାକୁ ୧୫ ହଜାରରୁ ୨୫ ହଜାରକୁ ବୃଦ୍ଧି କରାଯାଇଛି । ତେବେ ଅର୍ଥମନ୍ତ୍ରୀ ଷ୍ଟାଣ୍ଡାର୍ଡ ଡିଡକ୍ସନ ସୀମା ୧ ଲକ୍ଷ ଟଙ୍କା ବୃଦ୍ଧି କରିବା ନେଇ ଆକଳନ କରାଯାଉଥିଲା ।
ନୂତନ ଟିକସ ଢାଞ୍ଚାରେ ସଂଶୋଧିତ ଟିକସ ହାର:
- ୩ ଲକ୍ଷ ପର୍ଯ୍ୟନ୍ତ ବାର୍ଷିକ ଆୟ ଟିକସ ମୁକ୍ତ ଅର୍ଥାତ୍ ଶୂନ୍ୟ
- ୩ରୁ ୭ ଲକ୍ଷ ଆୟ: ୫%
- ୭ ଲକ୍ଷରୁ ୧୦ ଲକ୍ଷ ଆୟ: ୧୦ %
- ୧୦ ଲକ୍ଷରୁ ୧୨ ଲକ୍ଷ ଆୟ: ୧୫%
- ୧୨ ଲକ୍ଷରୁ ୧୫ ଲକ୍ଷ ଆୟ: ୨୦%
- ବାର୍ଷିକ ୧୫ ଲକ୍ଷରୁ ଅଧିକ ଆୟ: ୩୦%
On promoting #Investment, #Employment & #SocialSecurity, Union Budget 2024-25 proposes:
— Ministry of Finance (@FinMinIndia) July 23, 2024
👉 Angel tax for all classes of investors to be abolished, to bolster Indian start-up eco-system
👉 Corporate tax rate on foreign companies to be reduced from 40% to 35%
👉 Simpler tax… pic.twitter.com/MxHEQ6cBQU
ଅର୍ଥମନ୍ତ୍ରୀ ନିର୍ମଳା ସୀତାରମଣ ବଜେଟ ଅଭିଭାଷଣରେ କହିଛନ୍ତି, ''ନୂଆ ଟିକସ ଢାଞ୍ଚାରେ ବେତନଭୁକ୍ତ କର୍ମଚାରୀମାନେ ଆୟକରରେ ୧୭,୫୦୦ ଟଙ୍କା ସଞ୍ଚୟ କରିପାରିବେ । ୧୨ ଲକ୍ଷରୁ ୧୫ ଲକ୍ଷ ବାର୍ଷିକ ଆୟ କରୁଥିବା ଲୋକେ ୨୦ ପ୍ରତିଶତ ଟିକସ ଦେବେ ।''
ସେହିପରି ଭାରତୀୟ ଷ୍ଟାର୍ଟଅପ ଉଦ୍ୟୋଗକୁ ବଳ ଦେବାକୁ ମଧ୍ୟ ବଡ ଘୋଷଣା ହୋଇଛି । ଷ୍ଟାର୍ଟଅପ ଉଦ୍ୟୋଗୀଙ୍କ ଉପରେ ଲାଗୁ ହେଉଥିବା ଆଞ୍ଜେଲ ଟ୍ୟାକ୍ସକୁ ହଟାଯିବ । ଅର୍ଥମନ୍ତ୍ରୀ ସୀତାରମଣ ସବୁ ଶ୍ରେଣୀର ନିବେଶକଙ୍କ ପାଇଁ ଆଞ୍ଜେଲ ଟ୍ୟାକ୍ସ ଉଚ୍ଛେଦ ଘୋଷଣା କରିଛନ୍ତି । ଏହି ଟ୍ୟାକ୍ସ ପ୍ରତ୍ୟାହାର ପାଇଁ ଉଦ୍ୟୋଗ ଜଗତ ପକ୍ଷରୁ ଦୀର୍ଘ ଦିନ ହେଲା ଦାବି ହୋଇଆସୁଥିଲା । ଷ୍ଟାର୍ଟଅପ ଦେଶର ଆର୍ଥିକ ବିକାଶର ଇଞ୍ଜିନ ରୂପେ କାର୍ଯ୍ୟ କରୁଛି ବୋଲି କହିଛନ୍ତି ସୀତାରମଣ ।
