ମୁମ୍ବାଇ: ଦେଶରେ ଲୋକସଭା ନିର୍ବାଚନ ଭୋଟ ଗଣତି ଜାରି ରହିବା ସହ ଷ୍ଟକ ବଜାରରେ ହଲଚଲ ଆରମ୍ଭ ହୋଇଯାଇଛି । ପ୍ରାରମ୍ଭିକ ଟ୍ରେଣ୍ଡରେ ବିଜେପି ନେତୃତ୍ବାଧୀନ ଏନଡିଏ ଆଗୁଆ ଥିଲେ ହେଁ ବିଜୟ ଚିତ୍ର ସ୍ପଷ୍ଟ ହୋଇନଥିବାରୁ ଆଜି (ମଙ୍ଗଳବାର) ଷ୍ଟକ ମାର୍କେଟରେ ବଡ ହ୍ରାସ ଦେଖିବାକୁ ମିଳିଛି । ବଜାର ଖୋଲିବା ମାତ୍ରେ ବମ୍ବେ ଷ୍ଟକ ବଜାରର ସେନସେକ୍ସ ୨୦୦୦ରୁ ଅଧିକ ପଏଣ୍ଟ ହ୍ରାସ ପାଇଛି । ନ୍ୟାସନାଲ ଷ୍ଟକ ଏକ୍ସଚେଞ୍ଜର ନିଫ୍ଟି ମଧ୍ୟ ସକାଳ ସାଢେ ୯ଟା ସୁଦ୍ଧା ୩.୦୩ ପ୍ରତିଶତ ବଡ ହ୍ରାସ ସହ ୨୨,୫୫୭ ରହିଛି । ସେନସେକ୍ସ ୩ ପ୍ରତିଶତ ଖସି ୭୪,୧୦୭ରେ କାରବାର କରୁଛି ।
ଏକ୍ଜିଟ ପୋଲରେ ବିଜେପି ନେତୃତ୍ବାଧୀନ ଏନଡିଏ ମେଣ୍ଟ ବିପୁଳ ଜନମତ ମିଳିବା ଆକଳନ କରାଯିବା ପରେ ଗତକାଲି (ଶୁକ୍ରବାର) ସର୍ବକାଳୀନ ରେକର୍ଡ ଛୁଇଁଥିଲା ଷ୍ଟକ ବଜାର । ଶୁକ୍ରବାର ବନ୍ଦ ତୁଳନାରେ ସୋମବାର ବିଏସଇ ସେନସେକ୍ସ ୨୦୦୦ ପଏଣ୍ଟ ଉଛୁଳି କାରବାର ଆରମ୍ଭ କରିଥିଲା । ପରବର୍ତ୍ତୀ ସମୟରେ ସେନସେକ୍ସ ୨୫୦୭ ପଏଣ୍ଟ ବୃଦ୍ଧି ପାଇ ୭୬,୪୬୯ ପଏଣ୍ଟରେ ବନ୍ଦ ହୋଇଥିଲା । ସେହିପରି ନ୍ୟାସନାଲ ଷ୍ଟକ ଏକ୍ସଚେଞ୍ଜର ନିଫ୍ଟି ୭୩୩ ପଏଣ୍ଟ ବୃଦ୍ଧି ସହ ୨୩,୨୬୪ ପଏଣ୍ଟରେ ବନ୍ଦ ହୋଇଥିଲା । ଫଳରେ ବ୍ୟାଙ୍କିଙ୍ଗ ସେକ୍ଟରଠାରୁ ଆରମ୍ଭ କରି ରିଅଲ ଇଷ୍ଟେଟ, ସବୁ କ୍ଷେତ୍ରର କମ୍ପାନୀଗୁଡିକର ସେୟାର ମୂଲ୍ୟରେ ବଡ ବୃଦ୍ଧି ଘଟିଥିଲା ।
ଏହା ମଧ୍ୟ ପଢନ୍ତୁ: ଏକଜିଟ ପୋଲ ରିପୋର୍ଟ ପରେ ଉଛୁଳିଲା ସେୟାର ବଜାର, ଭାଙ୍ଗିଲା 4 ବର୍ଷର ରେକର୍ଡ - Share Market
ଏହା ମଧ୍ୟ ପଢନ୍ତୁ: ମହଙ୍ଗା ହେଲା ଅମୂଲ କ୍ଷୀର, ଲିଟର ପିଛା 2 ଟଙ୍କା ବୃଦ୍ଧି - Amul Milk Price Hikes
ଏହି ଦୃଷ୍ଟିରୁ ଆଜି ଲୋକସଭା ଫଳାଫଳ ଆସିବାକୁ ଥିବାରୁ ଷ୍ଟକ ବଜାରରେ ନୂଆ ରେକର୍ଡ ସ୍ଥାପନ ହେବ ବୋଲି ଆଶା କରାଯାଉଥିଲା । ହେଲେ ଆଜି ବଜାର ଖୋଲିବା ପରେ ଉଭୟ ବିଏସଇ ସେନସେକ୍ସ ଏବଂ ଏନଏସଇର ନିଫ୍ଟିରେ ବଡ ହ୍ରାସ ଦେଖିବାକୁ ମିଳିଛି । ଏଠାରେ ଉଲ୍ଲେଖଯୋଗ୍ୟ ଯେ, ପ୍ରାରମ୍ଭିକ ଟେଣ୍ଡ ଅନୁସାରେ ବର୍ତ୍ତମାନ ଏନଡିଏ ୨୯୭ ଆସନରେ ଆଗୁଆ ଥିବାବେଳେ ଇଣ୍ଡିଆ ମେଣ୍ଟ ୧୯୧ ଆସନରେ ଆଗରେ ରହିଛି । ଚଳିତ ଲୋକସଭା ନିର୍ବାଚନରେ କିଏ ଗଢିବ ସରକାର, ତାହାର ଚିତ୍ର ଆଜି ଅପରାହ୍ନ ସୁଦ୍ଧା ସ୍ପଷ୍ଟ ହୋଇଯିବ ।
