ଭୋପାଳ: ମଧ୍ୟପ୍ରଦେଶରେ ଭୟଙ୍କର ସଡକ ଦୁର୍ଘଟଣା । କନ୍ୟା ଘରକୁ ଯାଉଥିବା ବେଳେ ବାଟରେ ଛକିଥିଲା ମୃତ୍ୟୁ । ବରଯାତ୍ରୀ ଗାଡି ଓଲଟିବାରୁ 13 ଜଣଙ୍କର ମୃତ୍ୟୁ ହୋଇଥିବା ବେଳେ 16 ଜଣ ଆହତ ହୋଇଛନ୍ତି । ମୃତକଙ୍କ ମଧ୍ୟରେ 4 ଜଣ ଶିଶୁ ରହିଛନ୍ତି । ମଧ୍ୟପ୍ରଦେଶର ରାଜଗଡରେ ଏହି ଦୁର୍ଘଟଣା ଘଟିଛି । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହ ସମସ୍ତ ଆହତଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରିଛି। କୁହାଯାଉଛି ଯେ ଏହି ବିବାହ ଶୋଭାଯାତ୍ରା ରାଜସ୍ଥାନର ମୋତିପୁରାରୁ କୁଲାମପୁର ଯାଉଥିଲା । ଦୁର୍ଘଟଣାରେ ମୁଖ୍ୟମନ୍ତ୍ରୀ ମୋହନ ଯାଦବ ଏବଂ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଦୁଃଖ ପ୍ରକାଶ କରିଛନ୍ତି। ମୃତକଙ୍କ ପରିଚୟ ବର୍ତ୍ତମାନ ସୁଦ୍ଧା ମିଳିପାରି ନାହିଁ ।
ମୋହନ ଯାଦବ ଟ୍ବିଟ କରି କହିଛନ୍ତି, ''ରାଜଗଡ ଜିଲ୍ଲାର ପିପ୍ଲୋଡି ରୋଡରେ ଏକ ଟ୍ରାକ୍ଟର-ଟ୍ରଲିର ଓଲଟି ପଡ଼ିବାରୁ ରାଜସ୍ଥାନର ଜାୱାର ଜିଲ୍ଲାର 13 ଜଣଙ୍କର ଅକାଳ ମୃତ୍ୟୁ ଖବର ଅତ୍ୟନ୍ତ ଦୁଋଖଦାୟକ । ଘଟଣାସ୍ଥଳରେ ଆମର ନେତା ନାରାୟଣ ସିଂ ପାନୱାରଙ୍କ ସହ କଲେକ୍ଟର ଏବଂ ଏସପି ଉପସ୍ଥିତ ଅଛନ୍ତି। ଆମେ ରାଜସ୍ଥାନ ସରକାରଙ୍କ ସହ ଯୋଗାଯୋଗ କରୁଛୁ ଏବଂ ରାଜସ୍ଥାନ ପୋଲିସ ମଧ୍ୟ ଘଟଣାସ୍ଥଳରେ ପହଞ୍ଚିଛି। ଆହତଙ୍କ ଚିକିତ୍ସା ଜିଲ୍ଲା ଡାକ୍ତରଖାନା, ରାଜଗଡରେ ଚାଲିଛି ଏବଂ କିଛି ଗୁରୁତର ଆହତ ରୋଗୀଙ୍କୁ ଭୋପାଳକୁ ପଠାଯାଇଛି । ଶୋକସନ୍ତପ୍ତ ପରିବାରବର୍ଗଙ୍କୁ ମୋର ସମବେଦନା ଆହତଙ୍କ ଶୀଘ୍ର ଆରୋଗ୍ୟ ପାଇଁ ମୁଁ ପ୍ରାର୍ଥନା କରୁଛି ।"
ଏହା ମଧ୍ୟ ପଢନ୍ତୁ-ଭୋଜି ଖାଇ ଫେରୁଥିଲେ, ବାଟରେ ଟ୍ରକ ସହ କାର୍ ଧକ୍କାରେ ଚାଲିଗଲା 6 ଜୀବନ - Kendujhar Accident
ରାଷ୍ଟ୍ରପତି ଦ୍ରୌପଦୀ ମୁର୍ମୁ ଟ୍ବିଟ କରି କହିଛନ୍ତି, ''ରାଜଗଡ ଜିଲ୍ଲାରେ ଏକ ସଡ଼କ ଦୁର୍ଘଟଣାରେ ଅନେକ ଲୋକଙ୍କ ମୃତ୍ୟୁ ଖବର ଅତ୍ୟନ୍ତ ଦୁଃଖଦାୟକ । ମୃତକଙ୍କ ପରିବାରବର୍ଗଙ୍କୁ ମୁଁ ଗଭୀର ସମବେଦନା ଜଣାଉଛି, ଯେଉଁମାନେ ନିଜ ପ୍ରିୟଜନଙ୍କୁ ହରାଇଛନ୍ତି ଏବଂ ଆହତମାନଙ୍କୁ ଶୀଘ୍ର ଆରୋଗ୍ୟ କାମନା କରୁଛି ।''
ମିଳିଥିବା ସୂଚନା ଅନୁଯାୟୀ, ରାଜସ୍ଥାନର ମୋତିପୁରା ଗାଁର ଜାୱାର ପୋଲିସ ଷ୍ଟେସନରୁ ଟ୍ରାକ୍ଟର ଟ୍ରଲିରେ ଗତକାଲି 30 ଜଣ ଲୋକ ଏକ ବିବାହାରେ ଯୋଗ ଦେବା ପାଇଁ ବାହାରିଥିଲେ । ରାଜଗଡ ଜିଲ୍ଲାର ପିପ୍ଲୋଡି ଆଉଟପୋଷ୍ଟ ନିକଟରେ ଟ୍ରଲି ଓଲଟି ପଡ଼ିବାରୁ 13 ଜଣଙ୍କର ମୃତ୍ୟୁ ହୋଇଥିଲା। 16 ଜଣ ଆହତ ହୋଇଥିବା ବେଳେ ଦୁଇ ଗୁରୁତର ଆହତ ବ୍ୟକ୍ତିଙ୍କୁ ଭୋପାଳକୁ ରେଫର କରାଯାଇଛି ଏବଂ ଜିଲ୍ଲା ଡାକ୍ତରଖାନାରେ 13 ଜଣଙ୍କ ଚିକିତ୍ସା ଜାରି ରହିଛି।
