କୋଲକାତା: ନେତାଙ୍କ ଅମାନବିକତା ! ସ୍ପଷ୍ଟ ଦିବାଲୋକରେ ରାସ୍ତା ମଝିରେ ମହିଳାଙ୍କ ଉପରେ ଅତ୍ୟାଚାର । ଶତାଧିକ ଲୋକଙ୍କ ଉପସ୍ଥିତିରେ ରାସ୍ତା ମଝିରେ ଜଣେ ମହିଳା ଓ ବ୍ୟକ୍ତିଙ୍କୁ ବାଉଁଶରେ ନିର୍ଦ୍ଧୁମ ପିଟିଲେ ଟିଏମସି ନେତା । ଏଭଳି ଏକ ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଲୋକଲୋଚନକୁ ଆସିଛି । ଭିଡିଓଟି ପଶ୍ଚିମବଙ୍ଗର ଚୋପ୍ରା ଅଞ୍ଚଳର ହୋଇଥିବା ଜଣାପଡିଛି । ଅନ୍ୟପଟେ ପୋଲିସ ମାମଲାର ତଦନ୍ତ କରି ଅଭିଯୁକ୍ତ ନେତାକୁ ଗିରଫ କରିଥିବା ବେଳେ ଏହାକୁ ନେଇ ରାଜନୀତି ଜୋର ଧରିଛି । ମମତା ସରକାରଙ୍କ କୁଶାସନ କହି ଟାର୍ଗେଟ କରିଛି ବିଜେପି ।
ସୂଚନା ଅନୁଯାୟୀ, ପଶ୍ଚିମବଙ୍ଗର ଉତ୍ତର ଦିନାଜପୁର ଜିଲ୍ଲାର ଚୋପ୍ରା ଅଞ୍ଚଳରେ ଜଣେ ମହିଳା ଓ ପୁରୁଷଙ୍କ ମଧ୍ୟରେ ଅନୈତିକ ସମ୍ପର୍କ ଥିବା ଅଭିଯୋଗରେ କଙ୍ଗାରୁ କୋର୍ଟ ବସାଇଥିଲେ ଥିଲେ ସ୍ଥାନୀୟ ଅଞ୍ଚଳର ଜଣେ ଟିଏମସି ନେତା । ଏହି ଅଭିଯୋଗରେ ସ୍ପଷ୍ଟ ଦିବାଲୋକରେ ଶତାଧିକ ଲୋକଙ୍କ ଉପସ୍ଥିତିରେ ମହିଳା ଓ ପୁରୁଷଙ୍କୁ ଅତି ଅମାନୁଷିକ ଭାବେ ବାଉଁଶରେ ପିଟିଥିଲେ ତୃଣମୂଳ କଂଗ୍ରେସ ନେତା । ଏଭଳି ଘଟଣା ସବୁଠି ଆଲୋଡନ ସୃଷ୍ଟି କରିଛି ।
ମାଡ ମାରିବାର ଭିଡିଓ ଭାଇରାଲ: ଭାଇରାଲ ଭିଡିଓରେ ଦେଖାଯାଉଛି ଯେ ଜଣେ ମହିଳା ଓ ପୁରୁଷଙ୍କୁ ଜଣେ ବ୍ୟକ୍ତି ବାଉଁଶରେ ନିର୍ଦ୍ଧୁମ ମାଡ ମାରୁଛନ୍ତି । ଶତାଧିକ ଲୋକେ ସେଠାରେ ଉପସ୍ଥିତ ଥିଲେ ମଧ୍ୟ ସମସ୍ତେ କେବଳ ଏହି ଦୃଶ୍ୟକୁ ଦେଖିଚାଲିଛନ୍ତି ।
A horrific video has come to light from West Bengal, reminding of the brutalities that exist only in theocracies.
— Jagat Prakash Nadda (@JPNadda) July 1, 2024
To make matters worse, the TMC cadre and MLAs are justifying the act.
Be it Sandeshkhali, Uttar Dinajpur or many other places, Didi’s West Bengal is UNSAFE for…
ତୃଣମୂଳ କଂଗ୍ରେସର ଜିଲ୍ଲା ଅଧ୍ୟକ୍ଷ କହ୍ନେୟାଲାଲ ଅଗ୍ରଓ୍ବାଲ ଏହି ଘଟଣାକୁ ଦୁର୍ଭାଗ୍ୟପୂର୍ଣ୍ଣ ବୋଲି କହିଛନ୍ତି । ଅନ୍ୟପଟେ ବିଜେପି ଘଟଣାକୁ ତୀବ୍ର ନିନ୍ଦା କରିବା ସହ ମମତା ବାନାର୍ଜୀଙ୍କ କୁଶାସନର ଚିତ୍ର ବୋଲି କହିଛି । ବିଜେପି ଆଇଟି ସେଲ ମୁଖ୍ୟ ଅମିତ ମାଲବ୍ୟ ଭାଇରାଲ ଭିଡିଓକୁ ଏକ୍ସରେ ରିଟ୍ୱିଟ କରିବା ସହ ଘଟଣାକୁ ତୀବ୍ର ନିନ୍ଦା କରିଛନ୍ତି । ସେ କହିଛନ୍ତି ଯେ, ଏହା ମମତା ସରକାରର ନଗ୍ନ ଚିତ୍ର । ସିପିଆଇ(ଏମ) ମଧ୍ୟ ଏହି ଘଟଣାକୁ ନେଇ ମମତା ସରକାରଙ୍କୁ ଟାର୍ଗେଟ କରିଛି ।
ଅନ୍ୟପଟେ ଭିଡିଓ ଭାଇରାଲ ହେବା ପରେ ପୋଲିସ ଘଟଣାର ତଦନ୍ତ କରି ମାଡ ମାରିଥିବା ବ୍ୟକ୍ତିଙ୍କୁ ରବିବାର ସନ୍ଧ୍ୟାରେ ଗିରଫ କରିଛି । ବ୍ୟକ୍ତି ଜଣକ ଟିଏମସି ନେତା ତେଜମୂଳ ଓରଫ ଜେସିବି ହୋଇଥିବା ଜଣାପଡିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
