ନୂଆଦିଲ୍ଲୀ: ବହୁଚର୍ଚ୍ଚିତ କୋଲକାତା ମହିଳା ଡାକ୍ତର ଦୁଷ୍କର୍ମ ଓ ହତ୍ୟା ମାମଲା । ନିଜ ଆଡୁ ହସ୍ତକ୍ଷେପ କଲେ ସୁପ୍ରିମକୋର୍ଟ । RGK ମେଡିକାଲ କଲେଜରେ ଟ୍ରେନିଂ ଡାକ୍ତରଙ୍କୁ ହୋଇଥିବା ଦୁଷ୍କର୍ମ ଘଟଣାରେ CJIଙ୍କ ନେତୃତ୍ବରେ ଶୁଣାଣି ହେବ । ଆସନ୍ତା ମଙ୍ଗଳବାର CJI ଜଷ୍ଟିସ ଡି ୱାଇ ଚନ୍ଦ୍ରଚୂଡଙ୍କ ନେତୃତ୍ବରେ ଗଠିତ ୩ ଜଣିଆ ଖଣ୍ଡପୀଠ ମାମଲାର ଶୁଣାଣି କରିବେ ।
ସୁପ୍ରିମକୋର୍ଟରେ ଶୁଣାଣି:
ସୁପ୍ରିମକୋର୍ଟ ନିଜ ଆଡୁ ମାମଲାର ହସ୍ତକ୍ଷେପ କରିଛନ୍ତି । ଆସନ୍ତା ୨୦ ତାରିଖରେ CJI ଜଷ୍ଟିସ ଡି ୱାଇ ଚନ୍ଦ୍ରଚୂଡଙ୍କ ନେତୃତ୍ବରେ ଗଠିତ ୩ ଜଣିଆ ଖଣ୍ଡପୀଠ ମାମଲାର ଶୁଣାଣି କରିବେ । ଜଷ୍ଟିସ ଜେବି ପାରଦିୱାଲା ଓ ଜଷ୍ଟିସ ମନୋଜ ମିଶ୍ରା ଏହି ଖଣ୍ଡପୀଠରେ ସାମିଲ ଅଛନ୍ତି ।
Supreme Court takes suo moto cognisance of alleged rape and murder of trainee doctor at RG Kar Medical College and Hospital in Kolkata, to hear matter on August 20.#KolkataDeathCase pic.twitter.com/GYkW4qDyrK
— Press Trust of India (@PTI_News) August 18, 2024
କ'ଣ ଥିଲା ସେଦିନର ଘଟଣା ?
ଗତ 9 ତାରିଖରେ କୋଲକାତାର ଆର.ଜି କର ହସ୍ପିଟାଲ ଓ ମେଡିକାଲ କଲେଜରେ ସ୍ନାତକୋତ୍ତର ମେଡିକାଲ ଛାତ୍ରୀ 31 ବର୍ଷୀୟ କନିଷ୍ଠ ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା କରାଯାଇଥିଲା । 10 ତାରିଖ ସକାଳୁ ସେମିନାର ହଲରୁ ତାଙ୍କ ଅର୍ଦ୍ଧନଗ୍ନ, କ୍ଷତାକ୍ତ ମୃତଦେହ ଉଦ୍ଧାର ହୋଇଥିଲା । ଖବର ପାଇ ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଥିଲା । ବ୍ୟବଚ୍ଛେଦ ରିପୋର୍ଟରୁ ତାଙ୍କ ସହ ଦୁଷ୍କର୍ମ ହୋଇଥିବା ସ୍ପଷ୍ଟ ହେବା ପରେ କୋଲକାତା ସମେତ ସାରା ଦେଶରେ ଉଦବେଗ ସୃଷ୍ଟି ହୋଇଥିଲା ।
ମେଡିକାଲ କଲେଜ ଅଧ୍ୟକ୍ଷଙ୍କ ଇସ୍ତଫା:
ମେଡିକାଲ କଲେଜର ଅଧ୍ୟକ୍ଷ ଡାକ୍ତର ସନ୍ଦୀପ ଘୋଷ ନିଜ ପଦରୁ ଇସ୍ତଫା ଘୋଷଣା କରିଛନ୍ତି । ତାଙ୍କ ନାମରେ ରାଜନୈତିକ ବିବୃତ୍ତି ଦିଆଯାଉଥିବାରୁ ସେ ନିଜ ପଦ ଛାଡିବା ଉଚିତ ବୋଲି କହିଛନ୍ତି । ସେ ଘଟଣାରେ ମର୍ମାହତ, ପୀଡିତା କନିଷ୍ଠ ଡାକ୍ତର ତାଙ୍କ ଝିଅ ପରି, ଅଭିଯୁକ୍ତ କଠୋର ଦଣ୍ଡପାଉ ବୋଲି ଡାକ୍ତର ଘୋଷ କହିଛନ୍ତି । ଅନ୍ୟପଟେ ଘଟଣାରେ ପୋଲିସ ଅଭିଯୁକ୍ତକୁ ଗିରଫ କରିଥିଲା ।
ତୀବ୍ର ହେଉଛି ପ୍ରତିବାଦ:
ନ୍ୟାୟ ଦାବିରେ ଦେଶବ୍ୟାପୀ ପ୍ରତିବାଦର ନିଆଁ ବ୍ୟାପିବାରେ ଲାଗିଛି । ଇଣ୍ଡିଆନ ମେଡିକାଲ ଆସୋସିଏସନ (IMA)ପକ୍ଷରୁ ଦେଶବ୍ୟାପୀ ବିରୋଧ ପ୍ରଦର୍ଶନ କରାଯାଇଥିଲା । ଅନ୍ୟପଟେ ବିଭିନ୍ନ ରାଜ୍ୟର ଡାକ୍ତରୀ ଛାତ୍ରମାନେ ନିଜ ସୁରକ୍ଷାଙ୍କୁ ନେଇ ଚିନ୍ତା ପ୍ରକଟ କଲେଣି । ଅନେକ ମେଡିକାଲ କଲେଜ ଏବଂ ହସ୍ପିଟାଲରେ ଡାକ୍ତରମାନେ କାର୍ଯ୍ୟବନ୍ଦ ଆନ୍ଦୋଳନ କରୁଥିବା ଦେଖିବାକୁ ମିଳିଛି ।
ଆକ୍ସନ ମୋଡରେ ଗୃହ ମନ୍ତ୍ରାଳୟ:
ଆକ୍ସନମୋଡକୁ ଆସିଛି କେନ୍ଦ୍ର ଗୃହ ମନ୍ତ୍ରଣାଳୟ । ଜାରି ରହିଥିବା ଡାକ୍ତର ଆନ୍ଦୋଳନ ଓ ଆଇନ ଶୃଙ୍ଖଳା ସ୍ଥିତି ସମ୍ପର୍କରେ 2 ଘଣ୍ଟାରେ ଥରେ ଅପଡେଟ ଦେବାକୁ ପ୍ରତ୍ୟକ ରାଜ୍ୟକୁ ନିର୍ଦ୍ଦେଶ ଦେଇଛି ଗୃହ ମନ୍ତ୍ରଣାଳୟ । ରାଜ୍ୟ ପୋଲିସ ପ୍ରଶାସନକୁ ଗୃହ ମନ୍ତ୍ରଣାଳୟ ତରଫରୁ ଏନେଇ ଚିଠି ହୋଇଛି । ଚିଠିରେ ଉଲ୍ଲେଖ ରହିଥିବା ନିର୍ଦ୍ଦେଶ ଅନୁସାରେ, ବିରୋଧ ପ୍ରଦର୍ଶନବେଳେ ଆଇନ ଶୃଙ୍ଖଳା ବ୍ୟବସ୍ଥା ଉପରେ ପ୍ରତି ରାଜ୍ୟ ନଜର ରଖିବେ। ରାଜ୍ୟଗୁଡିକରେ ସ୍ଥିତି କିପରି ରହିଛି ସେନେଇ ଗୃହ ମନ୍ତ୍ରଣାଳୟକୁ ପ୍ରତି ଦୁଇ ଘଣ୍ଟାରେ ଅପଡେଟ ଦେବେ । ଫ୍ୟାକ୍ସ, ଇ-ମେଲ, ହ୍ବାଟ୍ସଆପ ଦ୍ୱାରା ଗୃହ ମନ୍ତ୍ରଣାଳୟର ନିୟନ୍ତ୍ରଣ କକ୍ଷକୁ ରିପୋର୍ଟ ପଠାଇବେ । ଗୃହ ମନ୍ତ୍ରଣାଳୟ ହ୍ବାଟ୍ସଆପ ନମ୍ବର, ଫ୍ୟାକ୍ସ ଆଇଡି ଓ ଇ-ମେଲ ଆଇଡି ମଧ୍ୟ ପ୍ରଦାନ କରାଯାଇଛି ।
