ଲକ୍ଷ୍ନୌ: ପୁଣି ଚର୍ଚ୍ଚାରେ ବିବାଦୀୟ ବିଜେପି ନେତା ବ୍ରିଜଭୂଷଣ ଶରଣ ସିଂ । ହେଲେ ଏଥର ନିଜ ପାଇଁ ନୁହେଁ ବରଂ ପୁଅ ପାଇଁ । ଉତ୍ତରପ୍ରଦେଶ କୈସରଗଞ୍ଜରୁ ବିଜେପି ସାଂସଦ ପ୍ରାର୍ଥୀ ହୋଇଥିବା ବ୍ରିଜଭୂଷଣଙ୍କ ସାନପୁଅ କରଣ ଭୂଷଣଙ୍କ କାରକେଡ୍ ଆଜି ୩ ଜଣ ପିଲାଙ୍କୁ ଧକ୍କା ଦେଇଛି । ଏଥିରେ ଘଟଣାସ୍ଥଳରେ ଦୁଇ ଜଣଙ୍କ ମୃତ୍ୟୁ ହୋଇଥିବାବେଳେ ଜଣେ ଗୁରୁତର ଆହତ ହୋଇଛନ୍ତି । ସେପଟେ ଦୁର୍ଘଟଣା ପରେ କରଣଙ୍କ ସମେତ ତାଙ୍କ କାରକେଡ ସାମିଲ ସବୁ ଲୋକ ଫେରାର୍ ହୋଇଯାଇଥିବାବେଳେ ଘଟଣାସ୍ଥଳରେ ଚାପା ଉତ୍ତେଜନା ସୃଷ୍ଟି ହୋଇଛି ।
ସୂଚନା ମୁତାବକ, ଆଜି ଉତ୍ତରପ୍ରଦେଶର ଗୋଣ୍ଡା ଜିଲ୍ଲାର ବୈକୁଣ୍ଠ ଡିଗ୍ରୀ କଲେଜ ନିକଟରେ ଏହି ଦୁର୍ଘଟଣା ଘଟିଛି । ବିଜେପି ସାଂସଦ ପ୍ରାର୍ଥୀ କରଣଙ୍କ କାରକେଡ୍ ଦ୍ରୁତଗତିରେ ଆଗକୁ ବଢୁଥିଲା । ଏତିକି ବେଳେ କାରକେଡରେ ସାମିଲ ଗୋଟିଏ ଫର୍ଚୁନ କାର୍ ଅନିୟନ୍ତ୍ରିତ ହୋଇ ୩ ଜଣ ପିଲାଙ୍କ ଉପରେ ମାଡି ଯାଇଥିଲା । ଦୁର୍ଘଟଣା ଏତେ ଭୟଙ୍କର ଥିଲା ଯେ, ଘଟଣାସ୍ଥଳରେ ଦୁଇ ଜଣଙ୍କର ମୃତ୍ୟୁ ହୋଇଯାଇଛି ।
ଦୁର୍ଘଟଣା ଘଟାଇଥିବା ଫର୍ଚୁନ ଗାଡି ମଧ୍ୟ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛି । ସ୍ଥାନୀୟ ଉତ୍ୟକ୍ତ ଲୋକେ ଗାଡିକୁ ନିଜ କବ୍ଜା ନେବା ସହ ହୋହଲ୍ଲା କରୁଛନ୍ତି । ସେପଟେ ଏହି ଘଟଣା ପରେ କରଣଙ୍କ କାରକେଡରେ ସାମିଲ ସବୁ ଲୋକେ ଫେରାର୍ ହୋଇଯାଇଛନ୍ତି । ଘଟଣାସ୍ଥଳରେ ତୀବ୍ର ଉତ୍ତେଜନା ପ୍ରକାଶ ପାଇଥିବା ବେଳେ ସ୍ଥିତି ନିୟନ୍ତ୍ରଣ କରିବାକୁ ବ୍ୟାପକ ପୋଲିସ ଫୋର୍ସ ଡକାଯାଇଛି ।
ଏଠାରେ କହିରଖୁଛୁ କି, ମହିଳା କୁସ୍ତିଯୋଦ୍ଧା ଯୌନ ନିର୍ଯାତନା ଘଟଣାରେ ବିବାଦୀୟ ରହିଛନ୍ତି ବ୍ରିଜଭୂଷଣ ଶରଣ ସିଂ । ଏହାକୁ ନେଇ ବହୁ ବାଦବିବାଦ ହେବାରୁ ଚଳିତ ନିର୍ବାଚନରେ ବିଜେପି କୈସରଗଞ୍ଜରେ ବ୍ରିଜଭୂଷଣଙ୍କ ଟିକଟ କାଟି ତାଙ୍କ ସାନ ପୁଅ କରଣ ଭୂଷଣଙ୍କୁ ପ୍ରାର୍ଥୀ କରିଛି ।
