ନୂଆଦିଲ୍ଲୀ: ମଧ୍ୟପ୍ରାଚ୍ୟରେ ଯୁଦ୍ଧ ସ୍ଥିତି ମଧ୍ୟରେ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ସହ କଥା ହୋଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଗତକାଲି ରାତିରେ ଉଭୟ ରାଷ୍ଟ୍ରମୁଖ୍ୟଙ୍କ ମଧ୍ୟରେ ଟେଲିଫୋନିକ୍ ବାର୍ତ୍ତାଳାପ ହୋଇଛି । ବର୍ତ୍ତମାନର ବିଶ୍ବରେ ଆତଙ୍କବାଦ ପାଇଁ କୌଣସି ସ୍ଥାନ ନାହିଁ । ଭାରତ ମଧ୍ୟପ୍ରାଚ୍ୟରେ ଶାନ୍ତି ଓ ସ୍ଥିରତା ନିଶ୍ଚିତ କରିବା ପାଇଁ ସମସ୍ତ ସହଯୋଗ କରିବ ବୋଲି ପ୍ରଧାନମନ୍ତ୍ରୀ ନିଜ ଇସ୍ରାଏଲୀ ପ୍ରତିପକ୍ଷଙ୍କୁ ଭରସା ଦେଇଛନ୍ତି । ଏହି ବାର୍ତ୍ତାଳାପ ସମ୍ପର୍କରେ ନିଜେ ପ୍ରଧାନମନ୍ତ୍ରୀ ମୋଦି ଓ ବିଦେଶ ମନ୍ତ୍ରଣାଳୟ ଟ୍ବିଟ୍ କରି ସୂଚନା ଦେଇଛନ୍ତି ।
- ଆତଙ୍କବାଦ ବିରୋଧୀ ଲଢେଇକୁ ନୂଆଦିଲ୍ଲୀର ସମର୍ଥନ:-
ପ୍ରଧାନମନ୍ତ୍ରୀ ମୋଦି ନିଜ ‘ଏକ୍ସ’ ହ୍ୟାଣ୍ଡେଲରେ ପୋଷ୍ଟ କରି କହିଛନ୍ତି,‘‘ପଶ୍ଚିମ-ଏସିଆର ସାମ୍ପ୍ରତିକ ସ୍ଥିତି ସମ୍ପର୍କରେ ପ୍ରଧାନମନ୍ତ୍ରୀ ନେତନ୍ୟାହୁଙ୍କ ସହ କଥା ହେଲି । ବର୍ତ୍ତମାନ ବିଶ୍ବରେ ଆତଙ୍କବାଦର କୌଣସି ସ୍ଥାନ ନାହିଁ । ଶାନ୍ତି ଏବଂ ସ୍ଥିରତା ନିଶ୍ଚିତ କରିବା ଦିଗରେ ଯେକୌଣସି ପ୍ରୟାସକୁ ଭାରତ ସମର୍ଥନ କରିବା ପାଇଁ ପ୍ରତିଶ୍ରୁତିବଦ୍ଧ ।’’
Spoke to Prime Minister @netanyahu about recent developments in West Asia. Terrorism has no place in our world. It is crucial to prevent regional escalation and ensure the safe release of all hostages. India is committed to supporting efforts for an early restoration of peace and…
— Narendra Modi (@narendramodi) September 30, 2024
- ପ୍ରଥମରୁ ଇସ୍ରାଏଲକୁ ସମର୍ଥନ କରିଆସିଛି ଭାରତ:-
ପାଲେଷ୍ଟାଇନ ଅଧିକୃତ ଗାଜାରୁ ସଞ୍ଚାଳିତ ହେଉଥିବା ଆତଙ୍କୀ ସଂଗଠନ ‘ହମାସ’ ଗତବର୍ଷ (2023) ଅକ୍ଟୋବର 7 ତାରିଖରେ ଇସ୍ରାଏଲ ଉପରେ ଆକ୍ରମଣ କରିବା ସମୟରେ ଭାରତ ଇସ୍ରାଏଲକୁ ସମର୍ଥନ ଘୋଷଣା କରିବା ସହ ଆକ୍ରମଣକୁ କଡା ଶବ୍ଦରେ ନିନ୍ଦା କରିଥିଲା । ସେତେବେଳେ ମଧ୍ୟ ପ୍ରଧାନମନ୍ତ୍ରୀ ମୋଦି ନିଜ ପ୍ରତିପକ୍ଷ ପ୍ରଧାନମନ୍ତ୍ରୀ ନେତାନ୍ୟାହୁଙ୍କ ସହ ଫୋନରେ କଥା ହୋଇଥିଲେ । ଆତଙ୍କବାଦୀ ଆକ୍ରମଣକୁ ନିନ୍ଦା କରିବା ସହ ଇସ୍ରାଏଲୀ ନାଗରିକଙ୍କ ପ୍ରତି ନୂଆଦିଲ୍ଲୀ ସମବେଦନା ଜଣାଇଥିଲା । ଭାରତ-ଇସ୍ରାଏଲ ମଧ୍ୟରେ ଗତ 3ଦଶନ୍ଧି ଧରି ଉତ୍ତମ ଦ୍ବିପାକ୍ଷିକ ସମ୍ପର୍କ ରହିଆସିଛି । ଅନ୍ତର୍ଜାତୀୟ ମଞ୍ଚରେ ଦୁଇଦେଶ ପରସ୍ପରକୁ ସମର୍ଥନ କରିଆସୁଛନ୍ତି ।
- ମଧ୍ୟପ୍ରାଚ୍ୟରେ ଆତଙ୍କବାଦ ବିରୋଧରେ ଲଢୁଛି ଇସ୍ରାଏଲ:-
ମଧ୍ୟପ୍ରାଚ୍ୟରେ ଏକାଧିକ ଆତଙ୍କୀ ସଂଗଠନ ବିରୋଧରେ ଏବେ ଯୁଦ୍ଧ ଲଢୁଛି ଇସ୍ରାଏଲ । ନିକଟରେ ଲେବନନରୁ ସଞ୍ଚାଳିତ ହେଉଥିବା କୁଖ୍ୟାତ ଆତଙ୍କୀ ସଂଗଠନ ‘ହିଜବୁଲ୍ଲା’ର ମୁଖ୍ୟ ହାସନ ନସରଲ୍ଲାକୁ ଇସ୍ରାଏଲ ସେନା ନିପାତ କରିବାରେ ସଫଳ ହୋଇଛି । ‘ହିଜବୁଲ୍ଲା’କୁ ସମୁଳେ ନାଶ କରିବା ପାଇଁ ଇସ୍ରାଏଲ ସେନାର ଗ୍ରାଉଣ୍ଡ ଅପରେସନ ମଧ୍ୟ ଆରମ୍ଭ ହେବାକୁ ଯାଉଛି । ଗୋଟିଏ ପରେ ଗୋଟିଏ ଆତଙ୍କୀ ସଂଗଠନ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରୁଥିବା ଇସ୍ରାଏଲକୁ ଆମେରିକା ସମେତ ପଶ୍ଚିମ ରାଷ୍ଟ୍ରସମୂହଙ୍କ ସମର୍ଥନ ରହିଛି । ଗତବର୍ଷଠାରୁ ପ୍ରଥମେ ପାଲେଷ୍ଟାନୀୟ ଆତଙ୍କୀ ସଂଗଠନ ‘ହମାସ’ ଓ ପରେ ଲେବନନର ଆତଙ୍କୀ ସଂଗଠନ ‘ହିଜବୁଲ୍ଲା’କୁ ଧରାଶାୟୀ କରିବାରେ ଇସ୍ରାଏଲ ଡିଫେନ୍ସ ଫୋର୍ସ ସଫଳ ହୋଇଛି । ଏବେ ୟେମେନରୁ ସଞ୍ଚାଳିତ ହେଉଥିବା ଅନ୍ୟ ଏକ ଇରାନ ସମର୍ଥିତ ଆତଙ୍କବାଦୀ ସଂଗଠନ ‘ହୁତି’ ବିରୋଧରେ ମଧ୍ୟ ଇସ୍ରାଏଲ ସେନା କାର୍ଯ୍ୟାନୁଷ୍ଠାନ ଗ୍ରହଣ କରିପାରେ । କାରଣ ହୁତି ଏବେ ଇସ୍ରାଏଲକୁ ଆକ୍ରମଣ କରିବା ଆରମ୍ଭ କଲାଣି ।
ବ୍ୟୁରୋ ରିପୋର୍ଟ, ଇଟିଭି ଭାରତ
