ଭୁବନେଶ୍ବର: ସାଧାରଣତଃ ଆମେ ଜାଣିଛେ, ATMରୁ ଟଙ୍କା ବାହାରିଥାଏ । ବ୍ୟାଙ୍କ ଆକାଉଣ୍ଟରେ ଥିବା ଟଙ୍କାକୁ ଆମେ ଏଟିଏମ ମେସିନରୁ ଡେବିଟ କାର୍ଡ ସାହାଯ୍ୟରେ ଉଠାଇଥାଉ । ହେଲେ ଅନ୍ୟ ସାମଗ୍ରୀ ବି ଡେବିଟ କାର୍ଡ ଦ୍ବାରା ବାହାର କରାଯାଇ ପାରିବ । ଏମିତି ଟେକ୍ନୋଲୋଜି ବିଷୟରେ ହୁଏତ ଆପଣ କେବେ ଶୁଣିନଥିବେ । ଏଭଳି ଏକ ଉନ୍ନତ ଜ୍ଞାନକୌଶଳର ବ୍ୟବହାର କରାଯାଇ ATMରୁ ବାହାର କରାଯାଉଛି ଚାଉଳ । ଯାହାର ନାଁ ରାଇସ ଏଟିଏମ (Rice ATM) ।
Rice ATM କ'ଣ?
ରାଇସ ଏଟିଏମ (Rice ATM)ରୁ ସୁବିଧାରେ ହିତାଧିକାରୀଙ୍କୁ ଚାଉଳ ଯୋଗାଇବା ପାଇଁ ନୂଆ ନିୟମ କରିଛନ୍ତି ଓଡ଼ିଶା ସରକାର । ପାଇଲଟ ପ୍ରକଳ୍ପ ଭାବେ ଭୁବନେଶ୍ବରରୁ ଏହି ସେବାର ଶୁଭାରମ୍ଭ ହୋଇ ସାରିଛି । ଏଟିଏମରୁ ଚାଉଳ ଉଠାଇବା ପାଇଁ ଜରୁରୀ ରାସନ କାର୍ଡ । ତେବେ ରାସନ କାର୍ଡକୁ କେମିତି ଏଟିଏମରେ ବ୍ୟବହାର କରି ଚାଉଳ ଉଠାଇ ହେବ ଆସନ୍ତୁ ଜାଣିବା ।
ଓଡ଼ିଶାରେ Rice ATM ଶୁଭାରମ୍ଭ:
ଗତ ମାସ ଅଗଷ୍ଟ ୮ ତାରିଖ ଦେଶର ପ୍ରଥମ ଚାଉଳ ଏଟିଏମ (Rice ATM) ଭୁବନେଶ୍ବରରେ ମଞ୍ଚେଶ୍ବରଠାରେ ଶୁଭାରମ୍ଭ ହୋଇଛି । ଏହାକୁ ଓଡ଼ିଶା ଖାଦ୍ୟ ଯୋଗାଣ ଏବଂ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଉଦଘାଟନ କରିଛନ୍ତି । ପ୍ରଥମେ ଏହା ଭୁବନେଶ୍ବରରେ ଆରମ୍ଭ ହୋଇଥିବାବେଳେ ଆଗକୁ ସମସ୍ତ ୩୦ ଜିଲ୍ଲାରେ ଖୋଲିବା ନେଇ ଲକ୍ଷ୍ୟ ରଖିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀଙ୍କ ନେତୃତ୍ବାଧୀନ ରାଜ୍ୟ ସରକାର । ଏଭଳି ଉନ୍ନତ ସୁବିଧା ଓଡ଼ିଶାରେ ହିଁ ଉପଲବ୍ଧ ହେଉଛି । ଚାଉଳ ଏଟିଏମ ବ୍ୟବହାର କରିବାରେ ଓଡ଼ିଶା ଦେଶରେ ପ୍ରଥମ ରାଜ୍ୟ ଭାବେ ଉଭା ହୋଇଛି ।
ଚାଉଳ ବାହାର କରିବାର ଲିମିଟ୍:
ATM ଯଦି ସଫଳ ହୁଏ ତେବେ ଆଗାମୀ ଦିନରେ ଏହା ସବୁ ଜିଲ୍ଲା ଏବଂ ବ୍ଲକ ସ୍ତରରେ ଖୋଲିବ । ଜଣେ ଖାଉଟି ସର୍ବାଧିକ ୨୫ କେଜି ଯାଏଁ ଚାଉଳ ATMରୁ ବାହାର କରିପାରିବେ । ପ୍ରଥମ ପର୍ଯ୍ୟାୟରେ ସକାଳ 6ରୁ ସନ୍ଧ୍ୟା 6ଟା ପର୍ଯ୍ୟନ୍ତ ଏହି ଏଟିଏମ୍ କାର୍ଯ୍ୟକାରୀ ହେବ । ପରବର୍ତ୍ତୀ ସମୟରେ 24 ଘଣ୍ଟିଆ କାର୍ଯ୍ୟ କରିବା ପାଇଁ ଲକ୍ଷ୍ୟ ରଖିଛି ବିଭାଗ ।
ଇଟିଭି ଭାରତ, ଭୁବନେଶ୍ବର
