ମୁମ୍ବାଇ: ଲଗାଣ ବର୍ଷାରେ ଉବୁଟୁବୁ ମାୟାନଗରୀ ମୁମ୍ବାଇ । ଗତକାଲିଠାରୁ ଜାରି ରହିଛି ତୁହାକୁ ତୁହା ବର୍ଷା । ଫଳରେ ବିଭିନ୍ନ ସ୍ଥାନରେ ପାଣି ଜମି ରହିଥିବାରୁ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ବର୍ଷା ଲାଗି ରହିବା କାରଣରୁ ଘରୁ ବାହାରିବା ମଧ୍ୟ ମୁସକିଲ ହୋଇପଡିଛି । ରାସ୍ତାରେ ଉପରେ ଆଣ୍ଠୁଏ ପାଣି ଚାଲୁଥିବାରୁ ଯାତାୟତ ବାଧାପ୍ରାପ୍ତ ହୋଇଛି । ପାଞ୍ଚ ଘଣ୍ଟା ମଧ୍ୟରେ ବିଭିନ୍ନ ଅଞ୍ଚଳରେ 100 ମିଲିମିଟରରୁ ଅଧିକ ବର୍ଷା ହୋଇଥିବା ରେକର୍ଡ କରାଯାଇଛି । ବର୍ଷା ସମୟରେ ଜଣେ ମହିଳା ମୁକୁଳା ଡ୍ରେନରେ ପଡିଯିବାରୁ ତାଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । ଆନ୍ଧେରୀର MIDCର ଗେଟ୍ ନମ୍ବର 8 ନିକଟରେ ଏହି ଘଟଣା ଘଟିଥିଲା । ଆଜି ମଧ୍ୟ ଲଗାଣ ବର୍ଷା ଜାରି ରହିଛି ।
ମୋଦିଙ୍କ ମହାରାଷ୍ଟ୍ର ଓ ପୁନେ ଗସ୍ତ ବାତିଲ:
ଆଜି ମହାରାଷ୍ଟ୍ର ଓ ପୁନେ ଗସ୍ତରେ ଆସିଥାନ୍ତେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କିନ୍ତୁ ବର୍ଷା ଲାଗି ରହିଥିବାରୁ ଏହି ଗସ୍ତକୁ ବାତିଲ କରାଯାଇଛି । ପୁନେରେ ମେଟ୍ରୋ ଟ୍ରେନ ଶୁଭାରମ୍ଭର କାର୍ଯ୍ୟକ୍ରମ ସହ 22 ହଜାର 600 କୋଟି ଟଙ୍କାର ଉନ୍ନଯନ ମୂଳକ ପ୍ରକଳ୍ପର ଲୋକାର୍ପଣ କାର୍ଯ୍ୟକ୍ରମ ରହିଥିଲା । ଗତକାଲି ପୁନେର ତିନି ଖଣ୍ଟା ମଧ୍ୟରେ 131 ମିମି ବର୍ଷା ହୋଇଥିବା ରେକର୍ଡ କରାଯାଇଛି ।
ମୁମ୍ବାଇ ସମେତ ୪ ଜିଲ୍ଲାକୁ ରେଡ ଆଲର୍ଟ:
ବୁଧବାର ସନ୍ଧ୍ୟାଠାରୁ ମୁମ୍ବାଇରେ ବର୍ଷା ହୋଇଛି । ଆଜି ମହାରାଷ୍ଟ୍ରର ମୁମ୍ବାଇ ସମେତ ଚାରିଟି ଜିଲ୍ଲାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ପ୍ରବଳ ବର୍ଷାକୁ ଦୃଷ୍ଟିରେ ରଖି ପାଣିପାଗ ବିଭାଗ ମୁମ୍ବାଇ ଏବଂ ଏହାର ଆଖପାଖ ଜିଲ୍ଲା ଥାନେ, ପାଲଘର, ରତ୍ନଗିରି ଏବଂ ରାୟଗଡକୁ ରେଡ ଆଲର୍ଟ ଜାରି କରିଛି ।
Konkan: Very Heavy Rainfall Observed during past 24 hrs till 0830 IST 26.09.2024#IMDWeatherUpdate #Weatherforecast #HeavyRain #monsoon #StayAlert #konkan@moesgoi @ndmaindia @airnewsalerts @DDNewslive@SDMAMaharashtra @Hosalikar_KS pic.twitter.com/ujewIxSs14
— India Meteorological Department (@Indiametdept) September 26, 2024
ବର୍ଷା ଯୋଗୁଁ ସ୍କୁଲ ଛୁଟି:
ମୁମ୍ବାଇରେ ପ୍ରବଳ ବର୍ଷା ହେତୁ ବ୍ରିହାନ ମୁମ୍ବାଇ ମ୍ୟୁନିସିପାଲିଟି କର୍ପୋରେସନରେ ଆଜି ସମସ୍ତ ସ୍କୁଲ ଏବଂ କଲେଜରେ ଛୁଟି ଘୋଷଣା କରାଯାଇଛି । ପ୍ରବଳ ବର୍ଷାକୁ ଦୃଷ୍ଟିରେ ରଖି ସହର ଏବଂ ଏହାର ଆଖପାଖ ଅଞ୍ଚଳରେ ରହୁଥିବା ସମସ୍ତ ଲୋକଙ୍କୁ ଘର ବାହାରକୁ ନ ଆସିବାକୁ ମୁମ୍ବାଇ ପୋଲିସ ପରାମର୍ଶ ଦେଇଛି। ଆଇଏମଡିର ସୂଚନା ଅନୁଯାୟୀ, ଆଜି ମୁମ୍ବାଇରେ ଆକାଶ ମେଘୁଆ ରହିବା ସହ ପ୍ରବଳ ବର୍ଷାହେବାର ସମ୍ଭାବନା ରହିଛି । ଆସନ୍ତାକାଲି ପର୍ଯ୍ୟନ୍ତ ମୁମ୍ବାଇରେ ପ୍ରବଳ ବର୍ଷା ଜାରି ରହିବ ବୋଲି ପୂର୍ବାନୁମାନ କରାଯାଇଛି ।
ବର୍ଷା ଯୋଗୁଁ ଟେନ ଓ ବିମାନ ଚଳାଚଳ ବାଧାପ୍ରାପ୍ତ:
ଗତକାଲି (ବୁଧବାର) ମୁମ୍ବାଇରେ ପ୍ରବଳ ବର୍ଷା ହୋଇଥିଲା । ଏହି କାରଣରୁ ତଳିଆ ଅଞ୍ଚଳରେ ବନ୍ୟା ପରିସ୍ଥିତି ସୃଷ୍ଟି ହୋଇଥିଲା । ଟ୍ରେନ ଚଳାଚଳ ମଧ୍ୟ ବାଧାପ୍ରାପ୍ତ ହୋଇଥିଲା । ଗତକାଲି କିଛି ଟ୍ରେନ ଅଟକି ରହିବାରୁ ଯାତ୍ରୀ ନାହିଁନଥିବା ଅସୁବିଧାର ସମ୍ମୁଖୀନ ହୋଇଥିଲେ । ସେହିପରି ମୁମ୍ବାଇକୁ ଆସୁଥିବା ବିମାନକୁ ଡାଇଭର୍ଟ କରାଯାଇଥିଲା । ଲଗାଣ ବର୍ଷା ହେତୁ ଗତକାଲି ରାତିରେ ଥାନେ ମୁମ୍ବ୍ରା ବାଇପାସରେ ଭୂସ୍ଖଳନ ହୋଇଥିଲା। ଏହି କାରଣରୁ 3 ଘଣ୍ଟାରୁ ଅଧିକ ସମୟ ପର୍ଯ୍ୟନ୍ତ ଉକ୍ତ ଅଞ୍ଚଳରେ ଟ୍ରାଫିକ ସମସ୍ୟା ଉପୁଜିଥିଲା ।
ୟୁପିର ୨୬ ଜିଲ୍ଲାରେ ବର୍ଷା:
ଗତ ତିନିଦିନ ହେବ ଉତ୍ତରପ୍ରଦେଶର ଅଧିକାଂଶ ଜିଲ୍ଲାର ପାଗ ଭଲ ରହିଥିଲେ ମଧ୍ୟ ବୁଧବାର ସକାଳୁ ବୁଲନ୍ଦ ସହରରେ ପ୍ରବଳ ବର୍ଷା ହୋଇଛି । ଆଜି ୨୬ଟି ଜିଲ୍ଲାରେ ବର୍ଷା ହେବା ନେଇ ପାଣିପାଗ ବିଭାଗ ପୂର୍ବାନୁମାନ କରିଛି । ଦକ୍ଷିଣ ପଶ୍ଚିମ ମୌସୁମୀ ପ୍ରତ୍ୟାବର୍ତ୍ତନ ସମୟ ଆସୁଥିବା ବେଳେ, ୟୁପି ସମେତ ବିଭିନ୍ନ ରାଜ୍ୟରେ ବର୍ଷା ହେଉଛି ।
