ପ୍ରୟାଗରାଜ (ୟୁପି): ଆସନ୍ତାକାଲି (ସୋମବାର) ମହାକୁମ୍ଭରେ ହେବାକୁ ଯାଉଛି ବସନ୍ତ ପଞ୍ଚମୀ ଅମୃତ ସ୍ନାନ । କୋଟି କୋଟି ସାଧୁ,ସନ୍ଥ ଓ ଶ୍ରଦ୍ଧାଳୁ ଏହି ମାହାର୍ଘ୍ୟ ମୁହୂର୍ତ୍ତରେ ପବିତ୍ର ତ୍ରିବେଣୀ ସଙ୍ଗମରେ ସ୍ନାନ କରିବେ । ତେବେ 29 ତାରିଖ ମୌନି ଅମାବାସ୍ୟାରେ ଘଟିଥିବା ଅଘଟଣର ପୁନରାବୃତ୍ତି ନହେବା ପାଇଁ ସମସ୍ତ ବ୍ୟବସ୍ଥା କରାଯାଉଛି । ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ନିଜେ ପ୍ରସ୍ତୁତି ସମୀକ୍ଷା କରିବା ସହ ସମ୍ପୂର୍ଣ୍ଣ ତ୍ରୁଟିଶୂନ୍ୟ ବ୍ୟବସ୍ଥା ନିଶ୍ଚିତ କରିବାକୁ ପ୍ରଶାସନକୁ କଡା ନିର୍ଦ୍ଦେଶ ଦେଇଛନ୍ତି ।
- ପ୍ରସ୍ତୁତି ସମୀକ୍ଷା କଲେ ଯୋଗୀ
ଗତକାଲି (ଶନିବାର) ଅପରାହ୍ନରେ ମୁଖ୍ୟମନ୍ତ୍ରୀ ଯୋଗୀ ଏନେଇ ଏକ ଉଚ୍ଚସ୍ତରୀୟ ସମୀକ୍ଷା ବୈଠକ କରିଛନ୍ତି । ଶ୍ରଦ୍ଧାଳୁଙ୍କ ସମ୍ଭାବିତ ଭିଡକୁ ଦୃଷ୍ଟିରେ ରଖି ସମସ୍ତ ବ୍ୟବସ୍ଥା କରିବାକୁ ସେ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି । ବରିଷ୍ଠ ଅଧିକାରୀମାନଙ୍କ ଉପରେ ଭିନ୍ନ ଭିନ୍ନ ଦାୟିତ୍ବ ନ୍ୟସ୍ତ କରାଯାଇଛି । ଅମୃତ ସ୍ନାନ ପାଇଁ ଆଖାଡାଗୁଡିକର ଶୋଭାଯାତ୍ର ଯଥା ସମୟରେ ଓ ପାରମ୍ପରିକ ଭାବେ ଶେଷ କରିବା ସହ ଶ୍ରଦ୍ଧାଳୁଙ୍କ ପାଇଁ ମଧ୍ୟ ସମସ୍ତ ବ୍ୟବସ୍ଥା ଗ୍ରହଣ କରିବାକୁ କୁହାଯାଇଛି ।
- ଅମୃତ ସ୍ନାନ ତିଥିରେ ବନ୍ଦ ରହିବ ଭିଆଇପି ପ୍ରୋଟୋକଲ
ସେହିପରି ପାର୍କିଂ ଓ ଟ୍ରାଫିକ୍ ବ୍ୟବସ୍ଥାକୁ ସୁବ୍ୟବସ୍ଥିତ କରି ଶ୍ରଦ୍ଧାଳୁଙ୍କ ପାଇଁ ଆବଶ୍ୟକ ସ୍ଥାନ ଫାଙ୍କା ରଖିବାକୁ କୁହାଯାଇଛି । ଏହି ଅମୃତସ୍ନାନ ସମୟରେ କୁମ୍ଭ ନଗରୀର ଭିଆଇପି ପ୍ରୋଟୋକଲ ମଧ୍ୟ ବନ୍ଦ ରଖାଯିବ । ପର୍ଯ୍ୟାପ୍ତ ମାତ୍ରାରେ ପୋଲିସ୍ ଫୋର୍ସ, ସ୍ବେଚ୍ଛାସେବୀ, ମେଡିକାଲ ଟିମ୍, ରାପିଡ ଆକ୍ସନ ଟିମ୍ ପ୍ରମୁଖ ମୁତୟନ ରହିବେ । ମୌନି ଅମାବାସ୍ୟା ପରି ସ୍ଥିତି ସୃଷ୍ଟି ନହେବା ପାଇଁ ସବୁସ୍ତରରେ ତ୍ରୁଟିଶୂନ୍ୟ ବ୍ୟବସ୍ଥା କରିବା ଓ ଏଥିରେ ସାମାନ୍ୟ ଅବହେଳା ନହେବା ପାଇଁ ମୁଖ୍ୟମନ୍ତ୍ରୀ କଡା ନିର୍ଦ୍ଦେଶ ଦେଇଛନ୍ତି ।
ଏହା ମଧ୍ୟ ପଢନ୍ତୁ:- ମହାକୁମ୍ଭ ମେଳାରେ ନିଖୋଜ 1200ରୁ ଅଧିକ ଶ୍ରଦ୍ଧାଳୁ ସାମ୍ନାକୁ ଆସିଲା ମହାକୁମ୍ଭ ଦଳାଚକଟାର କାରଣ: 30 ମୃତ, 60ରୁ ଊର୍ଦ୍ଧ୍ବ ଆହତ |
- ଯାଇଥିଲା 30 ଶ୍ରଦ୍ଧାଳୁଙ୍କ ଜୀବନ
ମୌନି ଆମାବାସ୍ୟାରେ ଅମୃତ ସ୍ନାନ ତିଥି ଥିବା କାରଣରୁ ସଙ୍ଗମରେ ପ୍ରାୟ 5 କୋଟି ଶ୍ରଦ୍ଧାଳୁଙ୍କ ସମାଗମ ହୋଇଥିଲା । ମାତ୍ରାଧିକ ଭିଡ କାରଣରୁ ସ୍ଥିତି ନିୟନ୍ତ୍ରଣ ବାହାରକୁ ଚାଲିଯାଇଥିଲା । ଦଳାଚକଟାରେ 30 ଜଣଙ୍କ ମୃତ୍ୟୁ ହୋଇଥିଲା ବେଳେ ଏକାଧିକ ଗୁରୁତରଙ୍କ ସହ 60ରୁ ଅଧିକ ଆହତ ହୋଇଥିଲେ । ଅନେକ ଶ୍ରଦ୍ଧାଳୁ ସେମାନଙ୍କ ପରିଜନଙ୍କଠାରୁ ମଧ୍ୟ ଅଲଗା ହୋଇଯାଇଥିଲେ । ମହାକୁମ୍ଭ ପରି ମହାଆଧ୍ୟାତ୍ମିକ ସଙ୍ଗମରେ ଏପରି ଦୁଖଃଦ ଘଟଣା ପୁରା ଦେଶକୁ ସ୍ତବ୍ଦ କରିଦେଇଥିଲା ।
- ଚାଲିଛି ନ୍ୟାୟିକ ତଦନ୍ତ
ଅଘଟଣରେ ପ୍ରଧାନମନ୍ତ୍ରୀ ମୋଦି, ମୁଖ୍ୟମନ୍ତ୍ରୀ ଯୋଗୀ ପ୍ରମୁଖ ଘଟଣାରେ ଶୋକ ବ୍ୟକ୍ତ କରିଥିଲେ । ମୃତକଙ୍କ ପରିବାର ସଦସ୍ୟଙ୍କୁ 25 ଲକ୍ଷ ଟଙ୍କା ଲେଖାଏଁ ଅନୁକମ୍ପା ରାଶି ଘୋଷଣା କରିଥିଲେ ଉତ୍ତର ପ୍ରଦେଶ ସରକାର । ଘଟଣାର ନ୍ୟାୟିକ ତଦନ୍ତ ନିର୍ଦ୍ଦେଶ ଦେଇଥିଲେ ମୁଖ୍ୟମନ୍ତ୍ରୀ ଯୋଗୀ । ତେବେ ଆସନ୍ତାକାଲି (ସୋମବାର) ବସନ୍ତ ପଞ୍ଚମୀ ଅବସରରେ ଅମୃତ ସ୍ନାନ ପାଇଁ ତିଥି ଅଛି । ପୂର୍ବ ଅଘଟଣର ଅନୁଶୀଳନ ପରେ ଯୋଗୀ ସରକାର ସମସ୍ତ ପୂର୍ବ ପ୍ରସ୍ତୁତି ନିଶ୍ଚିତ କରିବାରେ ଲାଗିଛି ।
ଇଟିଭି ଭାରତ, ବ୍ୟୁରୋ
