ଲକ୍ଷ୍ନୌ: ଉତ୍ତରପ୍ରଦେଶ ହାଥରସ୍ରେ ଦଳଚକଟା ଘଟଣାରେ ୧୨୩ ଜଣଙ୍କ ମୃତ୍ୟୁ ସାରା ଦେଶକୁ ସ୍ତବ୍ଧ କରିଦେଇଛି । ଏଭଳି ଦୁଃଖଦ ସମୟରେ କଂଗ୍ରେସ ନେତା ରାହୁଲ ଗାନ୍ଧୀ ଆଜି(ଶୁକ୍ରବାର) ଆଲିଗଡରେ ପହଞ୍ଚି ପୀଡିତ ପରିବାରକୁ ଭେଟିଛନ୍ତି । ମୃତକଙ୍କ ପରିଜନଙ୍କୁ ଭେଟି ସମବେଦନା ଜଣାଇଛନ୍ତି କଂଗ୍ରେସ ନେତା । ସେହିପରି ଆହତମାନଙ୍କୁ ଭେଟି ସେମାନଙ୍କର ସ୍ବାସ୍ଥ୍ୟବସ୍ଥା ପଚାରି ବୁଝିଛନ୍ତି । ଏଥିସହ ଏହି ଘଟଣାକୁ ସଂସଦରେ ଉପସ୍ଥାପନ କରିବେ ବୋଲି ପୀଡିତଙ୍କୁ ପ୍ରତିଶ୍ରୁତି ଦେଇଛନ୍ତି ରାହୁଲ ।
बहुत परिवारों को नुकसान हुआ है, वे दुखी हैं.
— Congress (@INCIndia) July 5, 2024
पीड़ित परिवारों ने कहा कि प्रशासन की कमी थी.
कार्यक्रम में जिस हिसाब का पुलिस बंदोबस्त होना चाहिए था, वो नहीं था.
इन परिवारों को सही मुआवजा दिया जाए.
: नेता विपक्ष श्री @RahulGandhi pic.twitter.com/G0tTYKH1tj
ଆଜି ସକାଳେ ରାହୁଲ ଗାନ୍ଧୀ ଦିଲ୍ଲୀରୁ ସଡକ ମାର୍ଗରେ ଆଲିଗଡକୁ ଯାଇଥିଲେ । ତାଙ୍କ ସହ ଉତ୍ତରପ୍ରଦେଶ ରାଜ୍ୟ କଂଗ୍ରେସ ମୁଖ୍ୟ ଅଜୟ ରାୟ, ରାଜ୍ୟ କଂଗ୍ରେସ ପ୍ରଭାରୀ ଅଭିନାଶ ପାଣ୍ଡେ, ଦଳର ମୁଖପାତ୍ର ସୁପ୍ରିୟା ଶ୍ରୀନେତ ଏବଂ ଆଉ କିଛି କଂଗ୍ରେସ କର୍ମୀ ରହିଥିଲେ । ରାହୁଲ ଆଲିଗଡର ପିଲଖାନା ଗାଁରେ ପହଞ୍ଚି ହାଥରସ୍ ଦଳଚକଟାରେ ମୃତକଙ୍କ ପରିବାର ଲୋକଙ୍କୁ ଭେଟି ତାଙ୍କର କଥା ଶୁଣିଥିଲେ । ଏଥିପାଇଁ ପୋଲିସ ପକ୍ଷରୁ ସେଠାରେ କଡା ସୁରକ୍ଷା ବ୍ୟବସ୍ଥା ଗ୍ରହଣ କାରଯାଇଥିଲା ।
ପୀଡିତଙ୍କ ଭେଟିବା ପରେ ରାହୁଲ ଗଣାମଧ୍ୟମକୁ କହିଥିଲେ ଯେ, ଏହା ଏକ ଘଡିସନ୍ଧି ସମୟ । ପୀଡିତ ପରିବାର ଗରୀବ ଶ୍ରେଣୀର । ସେମାନେ ବହୁତ ଦୁଃଖରେ ଅଛନ୍ତି । ସେମାନଙ୍କୁ ଠିକ୍ ସମୟରେ କ୍ଷତିପୂରଣ ଦିଆଯିବା ଉଚିତ୍ । ୟୁପି ମୁଖ୍ୟମନ୍ତ୍ରୀ ଖୋଲା ହୃଦୟରେ ସେମାନଙ୍କୁ ସହାୟତା କରନ୍ତୁ । ମୃତକଙ୍କ ପରିଜନଙ୍କ ସହ କଥାବର୍ତ୍ତା ସମୟରେ ଏହି ଅଘଟଣ ପଛରେ ପ୍ରଶାସନିକ ଅବହେଳା ସାମ୍ନାକୁ ଆସିଛି । କାର୍ଯ୍ୟକ୍ରମରେ ଯେମିତି ପୋଲିସ ବନ୍ଦୋବସ୍ତ ହେବା କଥା, ସେମିତି ନଥିଲା । ଯେଉଁଥିପାଇଁ ଦଳଚକଟା ଅଘଟଣ ଘଟିଥିଲା ।
ପୋଲିସର ସୂଚନା ଅନୁଯାୟୀ, ଗତ ମଙ୍ଗଳବାର ଦିନ ଆତ୍ମଘୋଷିତ ଭୋଲେ ବାବାଙ୍କ ସତସଙ୍ଗ କାର୍ଯ୍ୟକ୍ରମ ହଜାର ହଜାର ଲୋକ ରୁଣ୍ଡ ହୋଇଥିଲେ । ବାବାଙ୍କ ପ୍ରବଚନ ପରେ ତାଙ୍କର ପାଦଧୂଳି ଆଣିବାକୁ ଲୋକଙ୍କ ମଧ୍ୟରେ ଠେଲାପେଲା ହୋଇଥିଲା । ସ୍ଥିତି ଅଣାୟତ ହୋଇ ଦଳଚକଟା ସ୍ଥିତି ଉପୁଜିଥିଲା । ଏଥିରେ ବହୁ ମହିଳା ଓ ଶିଶୁଙ୍କ ସମେତ ଶତାଧିକ ଲୋକ ଅଣନିଶ୍ବାସୀ ହୋଇ ତଳେ ପଡିଯାଇଥିଲେ । ଏହି ଅଘଟଣରେ ୧୨୩ ଶ୍ରଦ୍ଧାଳୁଙ୍କ ମୃତ୍ୟୁ ଘଟିଥିଲା । ସେପଟେ ଏହି ଘଟଣା ପରେ ଆତ୍ମଘୋଷିତ ଭୋଲେ ବାବା ଫେରାର ହୋଇଯାଇଥିବା ବେଳେ ପୋଲିସ ୬ ଜଣଙ୍କୁ ଗିରଫ କରିଛି । ସେମାନେ ସତସଙ୍ଗରେ ସ୍ବେଚ୍ଛାସେବୀ ଭାବେ କାମ କରୁଥିଲେ । ଅନ୍ୟପଟେ ଉତ୍ତରପ୍ରଦେଶ ସରକାର ଏହି ଘଟଣାର ତଦନ୍ତ ପାଇଁ ଏକ ୩ ଜଣିଆ ନ୍ୟାୟିକ କମିଶନ ଗଠନ କରିଛନ୍ତି ।
