ହାଇଦ୍ରାବାଦ: ଆଉ ମାତ୍ର କିଛି ଦିନ ପରେ ଲୋକସଭା ନିର୍ବାଚନ । ଏହାକୁ ନେଇ ସବୁଠି ପ୍ରସ୍ତୁତି ଜୋର ଧରିଛି । ପ୍ରତିଦିନ ବଦଳୁଥିବା ରାଜନୀତିର ରଙ୍ଗ ଭିତରେ ଆଉ ଏକ ନୂଆ ଖବର ସାମନାକୁ ଆସିଛି । ଏଥର ତେଲେଙ୍ଗାନାରେ ବିଆରଏସ ଓ ବିଏସପି ମେଣ୍ଟ ହୋଇ ଲଢିବେ ନିର୍ବାଚନ । ଗତ ୫ ତାରିଖରେ ମେଣ୍ଟ ଘୋଷଣା ସରିଥିବାବେଳେ ଏବେ ହୋଇଛି ସିଟ୍ ସେୟାରିଂ । ତେବେ ଭାରତ ରାଷ୍ଟ୍ର ସମିତି(BRS) 2ଟି ସାଂସଦ ସିଟ୍ ବହୁଜନ ସମାଜ ପାର୍ଟି (BSP)କୁ ଆବଣ୍ଟନ କରିବାକୁ ନିଷ୍ପତ୍ତି ନେଇଥିବା ଜଣାପଡିଛି । ହାଇଦ୍ରାବାଦ ଏବଂ ନାଗରକୁର୍ଣ୍ଣୁଲ ସଂସଦୀୟ କ୍ଷେତ୍ର ସମ୍ଭାଳିବ BSP ।
BSP ର ପ୍ରଦେଶ ଅଧ୍ୟକ୍ଷ ଆର ଏସ ପ୍ରବୀଣ କୁମାର ଲଢିବେ ନିର୍ବାଚନ । ସେ ନାଗରକୁର୍ଣ୍ଣୁଲରୁ ପ୍ରାର୍ଥୀ ହେବେ ବୋଲି ଜଣାପଡ଼ିଛି । ଅପରପକ୍ଷେ, BRS ୧୫ଟି ସିଟ୍ ପାଇଁ ନିର୍ବାଚନ ମୈଦାନକୁ ଓହ୍ଲାଇବ । ଏନେଇ ଆଜି BRS ପକ୍ଷରୁ ପ୍ରେସ ବିଜ୍ଞପ୍ତି ଜାରି କରାଯାଇଛି । ସୂଚନା ଅନୁସାରେ, ତେଲେଙ୍ଗାନାରେ BRS ଏବଂ BSP ମେଣ୍ଟ ନେଇ ଗତ ୫ ତାରିଖରେ ଘୋଷଣା କରାଯାଇଥିଲା । ୱାରଙ୍ଗଲ ଆସନରୁ ଲଢିବେ କାଦିୟମ କାବ୍ୟ, ଚେୱେଲ୍ଲାରୁ କାସନୀ ଜ୍ଞାନେଶ୍ବର, ଜହରିବାଦରୁ ଗଲି ଅନିଲକୁମାର ଏଭଂ ନିଜାମାବାଦରୁ ବାଜିରେଡ୍ଡୀ ଗୋବର୍ଦ୍ଧନ ପ୍ରାର୍ଥୀ ହେବେ ବୋଲି ଜଣାପଡ଼ିଛି ।
ମାଲୋତୁ କବିତା ମେହବୁବାବଦରୁ ପ୍ରାର୍ଥୀ ହେବେ । ମେହବୁବନଗରରୁ ମନ୍ନେ ଶ୍ରୀନିବାସ ରେଡ୍ଡୀ ନିର୍ବାଚନ ଲଢିବେ । ନାମା ନେଗେଶ୍ବର ରାଏ ଖମମରୁ ଏବଂ ଅତ୍ରମ ସକ୍କୁ ଆଦିଲାବାଦରୁ ସଂସଦ ପ୍ରାର୍ଥୀ ହେବେ । ସେହିପରି ରାଗିଡି ଲକ୍ଷ୍ମା ରେଡ୍ଡୀ ମଲକାଜଗିରିିରୁ ପ୍ରାର୍ଥୀ ହେବେ ବୋଲି ସ୍ଥିର ହୋଇଛି । କରିମନଗରରୁ ବିନୋଦକୁମାର, ପେଦାପଲ୍ଲୀରୁ କୋପୁଲ୍ଲା ଇଶ୍ବର ପ୍ରାର୍ଥୀ ହେବେ । ସବୁଠୁ ବଡ଼ କଥା ହେଉଛି ଲକ୍ଷ୍ମା ରେଡ୍ଡୀଙ୍କୁ ଗତ ବିଧାନସଭା ନିର୍ବାଚନ ନିର୍ବାଚନରେ ଉପ୍ପଲରୁ କଂଗ୍ରେସର ଆଶାୟୀ ପ୍ରାର୍ଥୀ ଥିବାବେଳେ ଟିକେଟ ପାଇବାରୁ ବଞ୍ଚିତ ହୋଇଥିଲେ । ଯେଉଁଥିରେ ସେ ଅସନ୍ତୋଷ ହୋଇ ଦଳ ଛାଡି ବିଆରଏସରେ ସାମିଲ ହୋଇଥିବାବେଳେ ବର୍ତ୍ତମାନ ସାଂସଦ ପ୍ରାର୍ଥୀ ହୋଇଛନ୍ତି ।
ଉତ୍ତରପ୍ରଦେଶରେ BSPର ଦବଦବା ଏବେବି ରହିଥିବା ବେଳେ, ଆସନ୍ତା ଲୋକସଭା ନିର୍ବାଚନ ପାଇଁ ଜୋରଦାର ପ୍ରସ୍ତୁତି ଚଳାଇଛି ମାୟାବତୀଙ୍କ ଦଳ । ହାତୀ ଏବେ ତେଲେଙ୍ଗାନା ଉପରେ ରଖିଛି ନଜର । କେ ଚନ୍ଦ୍ର ଶେଖର ରାଓଙ୍କ ଭାରତ ରାଷ୍ଟ୍ର ସମିତି (BRS)ସହ ମେଣ୍ଟ କରିଛି ବହୁଜନ ସମାଜ ପାର୍ଟି (BSP) । ଆଉ ଚଳିତ ଲୋକସଭା ନିର୍ବାଚନ ପାଇଁ ଗତ ୫ ତାରିଖରେ ନିଜେ ଏହି ମେଣ୍ଟ ଘୋଷଣା କରିଥିଲେ କେସିଆର ।
ବ୍ୟୁରୋ ରିପୋର୍ଟ, ଇଟିଭି ଭାରତ
