ରାଞ୍ଚି: ତୃତୀୟ ଥର ଲାଗି ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ହେମନ୍ତ ସୋରେନ । ଆଜି ସନ୍ଧ୍ୟା 5ଟାରେ ବିଧିବଦ୍ଧ ଭାବେ ସେ ପଦ ଓ ଗୋପନୀୟତାର ଶପଥ ପାଠ କରିଛନ୍ତି । ଝାଡ଼ଖଣ୍ଡ ରାଜନୀତି ଇତିହାସ ପୃଷ୍ଠା ଲେଉଟାଇଲେ କେବଳ ବିଜେପି ନେତା ରଘୁବର ଦାସଙ୍କ ବ୍ୟତୀତ ଅନ୍ୟ କୌଣସି ବି ମୁଖ୍ୟମନ୍ତ୍ରୀ ନିଜର କାର୍ଯ୍ୟକାଳ ସମ୍ପୂର୍ଣ୍ଣ କରିପାରିନାହାନ୍ତି । ଆଉ ଏକ ଖାସ କଥା ହେଉଛି ଝାଡ଼ଖଣ୍ଡ ଏକ ସ୍ବତନ୍ତ୍ର ରାଜ୍ୟ ମାନ୍ୟତା ପାଇବା ପରେ ଗତ 24 ବର୍ଷ ମଧ୍ୟରେ ଦେଖିଲାଣି 13ଜଣ ମୁଖ୍ୟମନ୍ତ୍ରୀଙ୍କ ଚେହେରା ।
2000 ନଭେମ୍ବର 15 ତାରିଖ । ସ୍ବତନ୍ତ୍ର ରାଷ୍ଟ୍ର ଭାବେ ଗଠନ ହେଲା ଝାଡ଼ଖଣ୍ଡ । ଖଣିଜ ସମ୍ପଦରେ ଭରା ଝାଡ଼ଖଣ୍ଡ ରାଜନୈତିକ ଭାବେ ମଧ୍ୟ ଏକ ଖଣି ଖାଦାନରୁ କମ ନୁହେଁ । ରାଜନୈତିକ ବାଦ ବିବାଦ ମଧ୍ୟରେ ରାଜ୍ୟ ଗତ 24ବର୍ଷରେ ଦେଖିଛି 13ଜଣ ମୁଖ୍ୟମନ୍ତ୍ରୀ । ଏହାସହିତ ରାଜ୍ୟରେ 3ଥର ରାଷ୍ଟ୍ରପତି ଶାସନ ମଧ୍ୟ ଲାଗୁ ହୋଇଛି । ଅନ୍ୟପଟେ ଝାଡ଼ଖଣ୍ଡରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟକାଳ ଦେଖିଲେ ଏହା ହାରାହାରି 1.5 ବା ଦେଢ ବର୍ଷ ରହିଛି । ସ୍ବାଧୀନ ପ୍ରାର୍ଥୀ ମୁଖ୍ୟମନ୍ତ୍ରୀ ଦାୟିତ୍ବ ସମ୍ଭାଳିବାରେ ଗୌରବ ଅର୍ଜନ କରିଛି ଝାଡ଼ଖଣ୍ଡ । ଯିଏକି 2ବର୍ଷ ପର୍ଯ୍ୟନ୍ତ ରାଜ୍ୟର ମୁଖିଆ ଭାବେ ଶାସନ ଭାର ଗ୍ରହଣ କରିଥିଲେ ।
ଝାଡ଼ଖଣ୍ଡର 10ଦିନିଆ ମୁଖ୍ୟମନ୍ତ୍ରୀ:-
ଶିବୁ ସୋରେନ ବିହାରରୁ ଝାଡ଼ଖଣ୍ଡକୁ ଅଲଗା ରାଜ୍ୟ ଭାବେ ଗଠନ କରିବା ଦିଗରେ ପ୍ରମୁଖ ଭୂମିକା ଗ୍ରହଣ କରିଥିଲେ । ମୁଖ୍ୟମନ୍ତ୍ରୀ ଭାବରେ ସେ ମାତ୍ର 10 ଦିନ ଏହି ପ୍ରତିଷ୍ଠିତ ଗାଦିରେ ବସିଥିଲେ । 'ଗୁରୁଜୀ' ନାମରେ ବେଶ ଜଣାଶୁଣା ଶିବୁ ସୋରେନ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (JMM) ସ୍ଥାପନ କରିଥିଲେ । ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ପିତା ଶିବୁ ସୋରେନଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ ଜମି ଘୋଟାଲା ମାମଲାରେ ଗିରଫ କରିଥିଲା ।
ଝାଡ଼ଖଣ୍ଡର ପ୍ରାରମ୍ଭିକ ବର୍ଷ; ନିର୍ବାଚନ ଓ ଗଠବନ୍ଧନ
ବର୍ଷ 2000ରୁ 2014 ମଧ୍ୟରେ ଝାଡ଼ଖଣ୍ଡ 5ଜଣ ମୁଖ୍ୟମନ୍ତ୍ରୀଙ୍କ ନେତୃତ୍ବାଧୀନ 9ଟି ସରକାର ଶାସନ ଭାର ସମ୍ଭାଳିଥିଲେ ଓ 3ବର୍ଷ ରାଷ୍ଟ୍ରପତି ଶାସନ ଲାଗୁ ହୋଇଥିଲା । ବିଜେପିର ବାବୁଲାଲ ମାରାଣ୍ଡି ଝାଡ଼ଖଣ୍ଡର ପ୍ରଥମ ମୁଖ୍ୟମନ୍ତ୍ରୀ ହୋଇଥିଲେ । ଯିଏକି 2ବର୍ଷ ଓ 3 ମାସ ମୁଖ୍ୟମନ୍ତ୍ରୀ ରହିଥିଲେ । ବାବୁଲାଲ ମୁଖ୍ୟମନ୍ତ୍ରୀ ଗାଦିରେ ବସିବା ପରେ ରାଜ୍ୟ ରାଜନୀତିରେ ହଲଚଲ ସୃଷ୍ଟି ହୋଇଥିଲା । ବିଜେପିର ଅନ୍ତ କନ୍ଦଳ ପଦାରେ ପଡ଼ିଥିଲା । ତେବେ 2000ରୁ 2014 ମଧ୍ୟରେ ବାବୁଲାଲ ମାରାଣ୍ଡି, ଅର୍ଜୁନ ମୁଣ୍ଡା, ଶିବୁ ସୋରେନ, ମଧୁ କୋଡା ଓ ହେମନ୍ତ ସୋରେନ ମୁଖ୍ୟମନ୍ତ୍ରୀ ହୋଇଥିବା ବେଳେ ଏମାନଙ୍କ ହାରାହାରି କାର୍ଯ୍ୟକାଳ 15ମାସ ଥିଲା । 14ବର୍ଷ ଅବଧି ମଧ୍ୟରେ ଜେଏମଏମର ଶିବୁ ସୋରେନ ଓ ବିଜେପିର ଅର୍ଜୁନ ମୁଣ୍ଡା 3-3 ଥର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ । ସେପଟେ ହେମନ୍ତ ସୋରେନ, ମଧୁ କୋଡା ଓ ବାବୁଲାଲ ମାରାଣ୍ଡି ଥରେ ଲେଖାଏଁ ଶପଥ ନେଇଥିଲେ । ଝାଡଖଣ୍ଡ ବିଧାନସଭାରେ ସଂଖ୍ୟାଗରିଷ୍ଠତା ପ୍ରମାଣ ଦେଇନପାରିବାରୁ ଶିବୁ ସୋରେନଙ୍କ ମୁଖ୍ୟମନ୍ତ୍ରୀ ଭାବେ କାର୍ଯ୍ୟକାଳ ମାତ୍ର 10ଦିନ ରହିଥିଲା । ଏହି ସମୟରେ ଝାଡ଼ଖଣ୍ଡରେ ତିନି ତିନି ଥର ରାଷ୍ଟ୍ରପତି ଶାସନ ଲାଗୁ ହୋଇଥିଲା ।
କେବଳ ରଘୁବର ଦାସ 'ପୂର୍ଣ୍ଣକାଳୀନ ମୁଖ୍ୟମନ୍ତ୍ରୀ'
ଅର୍ଜୁନ ମୁଣ୍ଡାଙ୍କୁ 2014 ନିର୍ବାଚନରେ ସିଂହଭୂମ ନିର୍ବାଚନମଣ୍ଡଳୀରେ ପରାସ୍ତ କରିଥିଲେ ବିଜେପିର ରଘୁବର ଦାସ । ଏହାପରେ ରଘୁବର ମୁଖ୍ୟମନ୍ତ୍ରୀ ହୋଇଥିଲେ । ଝାଡ଼ଖଣ୍ଡ ରାଜନୀତିରେ ଏହାପରେ ସ୍ଥିରତା ଦେଖିବାକୁ ମିଳିଥିଲା । ଝାଡ଼ଖଣ୍ଡ ମୁଖ୍ୟମନ୍ତ୍ରୀ ଭାବେ କେବଳ ରଘୁବର ଦାସ ନିଜର କାର୍ଯ୍ୟକାଳ ପୂର୍ଣ୍ଣ କରିଛନ୍ତି । ପୂର୍ଣ୍ଣକାଳୀନ ମୁଖ୍ୟମନ୍ତ୍ରୀ ହେବା ସତ୍ତ୍ବେ 2019ରେ ସେ ନିର୍ବାଚନରେ ପରାଜୟ ବରଣ କରିଥିଲେ । ଏହାପରେ ହେମନ୍ତ ସୋରେନ ନେତୃତ୍ବାଧୀନ ଜେଏମଏମ ଓ ସହଯୋଗୀ ଦଳ ସରକାର ଗଠନ କରିଥିଲେ । କଂଗ୍ରେସ ଓ ଅନ୍ୟ କିଛି ଛୋଟ ଦଳକୁ ନେଇ ସରକାର ଗଠନ କରିଥିଲା ଜେଏମଏମ ।
13ତମ ମୁଖ୍ୟମନ୍ତ୍ରୀ ହେମନ୍ତ ସୋରେନ:-
ବହୁଚର୍ଚ୍ଚିତ ଜମି ଦୁର୍ନୀତି ମାମଲାରେ ଚଳିତ ବର୍ଷ ଜାନୁଆରୀ ୩୧ ତାରିଖରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ହେମନ୍ତ ସୋରେନଙ୍କୁ ଗିରଫ କରିଥିଲା । ଏହି ସମୟରେ ସେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ । ତାଙ୍କ ସ୍ଥାନରେ ଦଳର ବରିଷ୍ଠ ନେତା ଚମ୍ପାଇ ସୋରେନ ଫେବୃଆରୀ ୨ରେ ମୁଖ୍ୟମନ୍ତ୍ରୀ ପଦର ଶପଥ ନେଇଥିଲେ । ଗତ ୨୯ ତାରିଖରେ ହେମନ୍ତ ନିୟମିତ ଜାମିନରେ ବାହାରିବା ପରେ ସେ ପୁଣି ଥରେ ମୁଖ୍ୟମନ୍ତ୍ରୀ ଗାଦିରେ ବସିପାରନ୍ତି ବୋଲି ଚର୍ଚ୍ଚା ହେଉଥିଲା । ସେ ଗିରଫ ହେବା ପରେ ଦଳର ବରିଷ୍ଠ ନେତା ଚମ୍ପାଇ ସୋରେନ ମୁଖ୍ୟମନ୍ତ୍ରୀ ହୋଇଥିଲେ । ହେମନ୍ତ ଜାମିନରେ ଆସିବା ପରେ ଚମ୍ପାଇ ଆଜି ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିବା ବେଳେ ସନ୍ଧ୍ୟାରେ ହେମନ୍ତ ରାଜ୍ୟର 13ତମ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
