ନୂଆଦିଲ୍ଲୀ: ପରଲୋକରେ ପୂର୍ବତନ ବୈଦେଶିକ ମନ୍ତ୍ରୀ କେ. ନଟୱର ସିଂ । ଦୀର୍ଘ ଦିନ ଧରି ସେ ସ୍ବାସ୍ଥ୍ୟଗତ ସମସ୍ୟାରେ ପୀଡିତ ଥିଲେ । ଗତକାଲି (ଶନିବାର) ଗୁରୁଗ୍ରାମର ଏକ ଘରୋଇ ହସ୍ପିଟାଲରେ ଚିକିତ୍ସାଧିନ ଅବସ୍ଥାରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି । ମୃତ୍ୟୁବେଳକୁ ତାଙ୍କୁ 95 ବର୍ଷ ବୟସ ହୋଇଥିଲା । ଜଣେ ଦକ୍ଷ କୂଟନୀତିଜ୍ଞ ତଥା ଦକ୍ଷ ରାଜନେତା ଭାବରେ ସେ ବେଶ ଜଣାଶୁଣା ଥିଲେ । ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂ ସରକାରରେ କ୍ୟାବିନେଟ ମନ୍ତ୍ରୀ ଥିଲେ । ଆସନ୍ତାକାଲି ଲୋଧି ରୋଡରେ ତାଙ୍କର ଶେଷକୃତ୍ୟ ସମ୍ପନ୍ନ କରାଯିବ । କେ. ନଟୱର ସିଂଙ୍କ ଦେହାନ୍ତରେ ଶୋକବ୍ୟକ୍ତ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
Pained by the passing away of Shri Natwar Singh Ji. He made rich contributions to the world of diplomacy and foreign policy. He was also known for his intellect as well as prolific writing. My thoughts are with his family and admirers in this hour of grief. Om Shanti. pic.twitter.com/7eIR1NHXgJ
— Narendra Modi (@narendramodi) August 11, 2024
ଶୋକ ବ୍ୟକ୍ତ କଲେ ମୋଦି: ପ୍ରଧାନମନ୍ତ୍ରୀ ଟ୍ବିଟ କରି କହିଛନ୍ତି, ''କେ. ନଟୱର ସିଂଙ୍କ ଦେହାନ୍ତ ଖବରରେ ମୁଁ ଦୁଃଖିତ । କୂଟନୀତି ଏବଂ ବୈଦେଶିକ ନୀତିରେ ତାଙ୍କର ଅବଦାନ ମହତ୍ତ୍ବପୂର୍ଣ୍ଣ । ସେ ତାଙ୍କର ଉଚ୍ଚକୋଟୀର ଲେଖନି ପାଇଁ ମଧ୍ୟ ବେଶ ପରିଚିତ ଥିଲେ । ଏଭଳି ଦୁଃଖଦ ସମୟରେ ମୁଁ ତାଙ୍କର ପରିବାର ବର୍ଗଙ୍କୁ ସମେବଦନା ଜଣାଉଛି ।'' ନଟୱର ସିଂଙ୍କ ଘର ରାଜସ୍ଥାନର ଭରତପୁରରେ । ସେ ମେ' 16, 1929ରେ ଭରତପୁରରେ ଜନ୍ମଗ୍ରହଣ କରିଥିଲେ । ସେ ଜଣେ ଭାରତୀୟ କୂଟନୀତିଜ୍ଞ ଓ ରାଜନେତା ଥିଲେ । ମେ' 2004ରୁ ଡିସେମ୍ବର 2005 ପର୍ଯ୍ୟନ୍ତ ମନମୋହନ ସିଂ ସରକାରରେ ବୈଦେଶିକ ବ୍ୟାପାର ମନ୍ତ୍ରୀ ଭାବରେ କାର୍ଯ୍ୟ କରିଥିଲେ । ତାଙ୍କ ପୁଅ ଜଗତ ସିଂ ବର୍ତ୍ତମାନ ଭାରତପୁରର ନାଡବାଇରୁ ବିଜେପି ବିଧାୟକ ରହିଛନ୍ତି । ନଟୱର ସିଂଙ୍କ ପତ୍ନୀ ହେମିନ୍ଦର କୌର ହେଉଛନ୍ତି ପଞ୍ଜାବ ପୂର୍ବତନ ମୁଖ୍ୟମନ୍ତ୍ରୀ ଅମରିନ୍ଦର ସିଂଙ୍କ ଭଉଣୀ । ନଟଓ୍ବରଙ୍କ ଶେଷକୃତ୍ୟ ଦିଲ୍ଲୀରେ ଅନୁଷ୍ଠିତ ହେବ । ଦୁଇଥର ଲୋକସଭା ସାଂସଦ ଏବଂ ଥରେ ରାଜ୍ୟସଭା ସଦସ୍ୟ ଭାବେ ନିର୍ବାଚିତ ହୋଇଥିଲେ ।
Former External Affairs Minister Natwar Singh passed away following prolonged illness, at Medanta Hospital in Gurugram (Haryana) around 11.30 pm last night. His last rites will be performed at Lodhi Road Crematorium tomorrow, 12th August.
— ANI (@ANI) August 11, 2024
(File photo) pic.twitter.com/MVIqc0zmOu
କୂଟନୀତିଜ୍ଞଙ୍କ ଠାରୁ ରାଜନେତା ପର୍ଯ୍ୟନ୍ତ ଯାତ୍ରା: ନଟୱର ସିଂ ଜଣେ ଭାରତୀୟ କୂଟନୀତିଜ୍ଞ ତଥା ଦକ୍ଷ ରାଜନେତା ଥିଲେ । ସେ 1953ରେ ଭାରତୀୟ ବୈଦେଶିକ ସେବାରେ ଯୋଗ ଦେଇଥିଲେ । ୟୁନିସେଫର କାର୍ଯ୍ୟନିର୍ବାହୀ ବୋର୍ଡରେ ଭାରତର ପ୍ରତିନିଧି ଭାବରେ କାର୍ଯ୍ୟ କରିଥିଲେ । 1963ରୁ 1966 ମଧ୍ୟରେ ମିଳିତ ଜାତିସଂଘର ଅନେକ କମିଟିରେ କାର୍ଯ୍ୟ କରିଥିଲେ । 1966 ମସିହାରେ ଇନ୍ଦିରା ଗାନ୍ଧୀଙ୍କ ଶାସନ ସମୟରେ ତାଙ୍କୁ ପ୍ରଧାନମନ୍ତ୍ରୀଙ୍କ ସଚିବାଳୟରେ ନିୟୋଜିତ କରାଯାଇଥିଲା । 1971ରୁ 1973 ପର୍ଯ୍ୟନ୍ତ ପୋଲାଣ୍ଡଓ 1980ରୁ 1982 ପର୍ଯ୍ୟନ୍ତପାକିସ୍ତାନରେ ଭାରତର ରାଷ୍ଟ୍ରଦୂତ ଭାବରେ କାର୍ଯ୍ୟ କରିଥିଲେ ନଟୱର ସିଂ । ବୈଦେଶିକ ବ୍ୟାପାର ମନ୍ତ୍ରଣାଳୟରେ ମଧ୍ୟ ସେ ସଚିବ ରହିଥିଲେ । 1984 ମସିହାରେ ନଟୱର ସିଂଙ୍କୁ ପଦ୍ମ ଭୂଷଣ ପୁରସ୍କାରରେ ସମ୍ମାନିତ କରାଯାଇଥିଲା ।
ମନମୋହନ ସିଂ ସରକାରରେ ନଟୱର କ୍ୟାବିନେଟ ମନ୍ତ୍ରୀ ଥିଲେ: 1984ରେ ସେ ସରକାରୀ ଚାକିରି ଛାଡି କଂଗ୍ରେସର ହାତ ଧରିଥିଲେ । ରାଜସ୍ଥାନର ଭରତପୁର ନିର୍ବାଚନମଣ୍ଡଳୀରୁ ଏମପି ଭାବେ ଲୋକସଭାକୁ ନିର୍ବାଚିତ ହୋଇଥିଲେ । 1985ରେ, ସେ କେନ୍ଦ୍ର ରାଷ୍ଟ୍ରମନ୍ତ୍ରୀ ଭାବେ ଶପଥ ନେଇଥିଲେ । 1986ରେ ସେ ବୈଦେଶିକ ରାଷ୍ଟ୍ରମନ୍ତ୍ରୀ ହୋଇଥିଲେ । 1991ରେ ସେ କଂଗ୍ରେସ ହାତ ଛାଡି ଅଲ ଇଣ୍ଡିଆ ଇନ୍ଦିରା କଂଗ୍ରେସ ଦଳ ଗଠନ କରିଥିଲେ । ପୁଣି 1998ରେ ସେ କଂଗ୍ରେସକୁ ଫେରିଥିଲେ । 1998ରେ ସାଧାରଣ ନିର୍ବାଚନ ଲଢି ଭରତପୁରରୁ ସାଂସଦ ଭାବେ ନିର୍ବାଚିତ ହୋଇଥିଲେ । 2002ରେ ସେ ରାଜ୍ୟସବାକୁ ନିର୍ବାଚିତ ହୋଇଥିଲେ । 2004ରେ ମନମୋହନ ସିଂ ତାଙ୍କୁ ବୈଦେଶିକ ବ୍ୟାପାର ମନ୍ତ୍ରୀ ଭାବରେ ନିଯୁକ୍ତ କରିଥିଲେ ।
ନିଜ ଲେଖନି ପୁସ୍ତକକୁ ନେଇ ଥିଲେ ଚର୍ଚ୍ଚାରେ: ଭାରତୀୟ ବୈଦେଶିକ ନୀତିରେ ନଟଓ୍ବର ସିଂଙ୍କ ଗଭୀର ଛାପ ଛାଡିଛନ୍ତି । ସେ ନେହେରୁ-ଗାନ୍ଧୀ ପରିବାରର ଘନିଷ୍ଠ ଥିଲେ । ଲେଖାଲେଖି ପ୍ରତି ନଟଓ୍ବର ବେଶ ଆଗ୍ରହୀ ଥିଲେ । ଏଥିପାଇଁ ସେ ନିଜକୁ ଜଣେ ଭଲ ଲେଖକ ଭାବେ ମଧ୍ୟ ପରିଚିତ କରାଇଥିଲେ । ସେ ଅନେକ ପୁସ୍ତକ ଲେଖିଛନ୍ତି, ତାଙ୍କ ଆତ୍ମଜୀବନୀ 'ଓ୍ବାନ ଲାଇଫ ଇଜ ନଟ୍ ଏନଫ' ପୁସ୍ତକକୁ ନେଇ ବିବାଦରେ ଥିଲେ ।
