ନୂଆଦିଲ୍ଲୀ: ଗିରଫଦାରୀ ବିରୋଧରେ ଦିଲ୍ଲୀ ହାଇକୋର୍ଟରେ ଦ୍ବାରସ୍ଥ ହେଲେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ । କେଜ୍ରିଓ୍ବାଲ ଏବେ ଇଡି ରିମାଣ୍ଡରେ ଅଛନ୍ତି । ତେବେ ଆଜି ଦାଖଲ କରାଯାଇଥିବା ଆବେଦନରେ ଉଭୟ ଗିରଫଦାରୀ ଓ ତଳକୋର୍ଟଙ୍କ ରିମାଣ୍ଡ ଅନୁମତିକୁ ଖାରଜ କରିବାକୁ ଚ୍ୟାଲେଞ୍ଜ କରାଯାଇଛି । ଏହି ଗିରଫଦାରୀ ବେଆଇନ ଓ ରାଜନୈତିକ ଉଦ୍ଦେଶ୍ୟମୂଳକ, ତେଣୁ ତୁରନ୍ତ ଏହି ମାମଲାର ଶୁଣାଣି କରିବା ପାଇଁ କେଜ୍ରିଓ୍ବାଲଙ୍କ ଲିଗାଲ ଟିମ ପକ୍ଷରୁ ଅପିଲ ମଧ୍ୟ କରାଯାଇଛି । ଆସନ୍ତାକାଲି ରବିବାର ସତ୍ତ୍ବେ ମଧ୍ୟ ଦିଲ୍ଲୀ ହାଇକୋର୍ଟ ଏହି ମାମଲାର ଶୁଣାଣି କରିବା ପାଇଁ ଆବେଦନକାରୀ ପକ୍ଷ ଆବେଦନ କରିଥିଲେ ସୁଦ୍ଧା 27ରେ ଶୁଣାଣି ହୋଇପାରେ ।
ଗୁରୁବାର ରାତିରେ କେଜ୍ରିଓ୍ବାଲଙ୍କୁ ଗିରଫ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ । ଆଜି ତାଙ୍କୁ ରାଉଜ ଆଭିନ୍ୟୁ କୋର୍ଟର ସ୍ବତନ୍ତ୍ର ସିବିଆଇ କୋର୍ଟରେ ହାଜର କରାଯାଇଥିଲା । କେଜ୍ରିଓ୍ବାଲ ହିଁ ଏହି ଘୋଟାଲା ମାମଲାରେ କିଙ୍ଗପିନ୍ ବୋଲି କହିଥିଲା କେନ୍ଦ୍ରୀୟ ସଂସ୍ଥା । ଅଧିକ ଜେରାର ଆବଶ୍ୟକତା ଦର୍ଶାଇ ରିମାଣ୍ଡ ମଧ୍ୟ ଆବେଦନ କରିଥିଲା । କୋର୍ଟ କେଜ୍ରିଓ୍ବାଲଙ୍କୁ 6ଦିନିଆ ରିମାଣ୍ଡରେ ପଠାଇଛନ୍ତି । ମାର୍ଚ୍ଚ 28 ତାରିଖ ପର୍ଯ୍ୟନ୍ତ ସେ ପ୍ରବର୍ତ୍ତନ ନିର୍ଦ୍ଦେଶାଳୟ ରିମାଣ୍ଡରେ ଜେରା ହେବ । ପରେ ତାଙ୍କୁ କୋର୍ଟରେ ପୁଣି ହାଜର କରାଯିବ । ଏବେ ଉଭୟ ଗିରଫଦାରୀ ଓ ରିମାଣ୍ଡରେ ପଠାଯିବାକୁ ଦିଲ୍ଲୀ ହାଇକୋର୍ଟରେ ଚ୍ୟାଲେଞ୍ଜ କରିଛନ୍ତି କେଜ୍ରିଓ୍ବାଲ ।
ଆଜି ଶୁଣାଣି ବେଳେ କେଜ୍ରିଓ୍ବାଲଙ୍କ ପକ୍ଷରୁ ବରିଷ୍ଠ କଂଗ୍ରେସ ନେତା ତଥା ଆଇନଜୀବୀ ଅଭିଷେକ ମନୁ ସିଙ୍ଘଭିଙ୍କ ସମେତ ଅନ୍ୟ ବରିଷ୍ଠ ଆଇନଜୀବୀ ରମେଶ ଗୁପ୍ତା, ରଜତ ଗୁପ୍ତା ଓ ମୁଦିତ ଜୈନ ପକ୍ଷ ରଖିଥିଲେ । ସେହିପରି ପ୍ରବର୍ତ୍ତନ ନିର୍ଦ୍ଦେଶାଳୟ ପକ୍ଷରୁ ଅତିରିକ୍ତ ସଲିସିଟର ଜେନେରାଲ ଏସ.ଭି ରାଜୁ ହାଜର ହୋଇଥିଲେ । ତଦନ୍ତକାରୀ ସଂସ୍ଥା 10ଦିନ ରିମାଣ୍ଡ ମାଗିଥିବା ବେଳେ କୋର୍ଟ 6ଦିନ ରିମାଣ୍ଡକୁ ମଞ୍ଜୁର କରିଛନ୍ତି । 28ରେ ପୁଣି ଥରେ କେଜ୍ରିଓ୍ବାଲଙ୍କୁ ହାଜର କରାଯିବ ।
