ହାଇଦ୍ରାବାଦ: ଶ୍ରମିକଙ୍କ ପାଇଁ ଖୁସି ଖବର ଆଣିଲେ କେନ୍ଦ୍ର ସରକାର । ଶ୍ରମିକଙ୍କ ସର୍ବନିମ୍ନ ମଜୁରୀ ବୃଦ୍ଧି ନେଇ ଘୋଷଣା ହୋଇଛି । ଆସନ୍ତା ଅକ୍ଟୋବର ୧ରେ ଏହି ନୂଆ ଦରମା ଲାଗୁ ହେବ । ଅଣକୁଶଳୀ, କୁଶଳୀ, ଅର୍ଦ୍ଧ କୁଶଳୀ ଏବଂ ଅତ୍ୟଧିକ କୁଶଳୀ ଶ୍ରମିକଙ୍କ ମାସିକ ମଜୁରୀ ବୃଦ୍ଧି କରାଯାଇଛି । କହିରଖୁଛୁ ଯେ, ପ୍ରତି ବର୍ଷ ଏପ୍ରିଲ ଓ ଅକ୍ଟୋବର ମାସରେ ମହଙ୍ଗା ଭତ୍ତା (VDA)ରେ ଉପଭୋକ୍ତା ମୂଲ୍ୟ ସୂଚକାଙ୍କ (CPI) ଅନୁସାରେ ସଂଶୋଧନ କରିଥାନ୍ତି କେନ୍ଦ୍ର ସରକାର । ଚଳିତ ବର୍ଷ ମଧ୍ୟ ଦଶହରା ପୂର୍ବରୁ ମିଳିଛି ଖୁସି ଖବର ।
କାହାର ମଜୁରୀ କେତେ ବୃଦ୍ଧି ହୋଇଛି:
ଅଣକୁଶଳୀ ଶ୍ରମିକଙ୍କ ପାଇଁ ମାସିକ ୨୦,୩୫୮ଟଙ୍କା, ଅର୍ଦ୍ଧ କୁଶଳୀ ୨୨ହଜାର ୫୬୮ ଟଙ୍କା ରହିବ । ସେହିପରି କୁଶଳୀ ଶ୍ରମିକ ପାଇବେ ୨୪, ୮୦୪ ଓ ଅତ୍ୟଧିକ କୁଶଳୀ ଶ୍ରମିକଙ୍କ ପାଇଁ ଏହି ରାଶି ୨୬ ହଜାର ୯୧୦ ରହିବ ।
ଦୈନିକ ମଜୁରୀ କେତେ ପାଇବେ:
ବର୍ଦ୍ଧିତ ମଜୁରୀ ଅନୁସାରେ ଅଣକୁଶଳୀ ଶ୍ରମିକ ଦୈନିକ ୭୮୩ଟଙ୍କା, ଅର୍ଦ୍ଧ କୁଶଳୀ ଶ୍ରମିକ ୮୬୮ ଟଙ୍କା, କୁଶଳୀ ଶ୍ରମିକ ୯୫୪ଟଙ୍କା ଓ ଅତ୍ୟଧିକ କୁଶଳୀ ୧୦୩୫ ଟଙ୍କା ଲେଖାଏଁ ସର୍ବନିମ୍ନ ମଜୁରୀ ପାଇବେ ।
କେଉଁ କ୍ଷେତ୍ରର କର୍ମଚାରୀ ହେବେ ଉପକୃତ:
ଏହି ଦରମା ବୃଦ୍ଧି ଫଳରେ ଭବନ ନିର୍ମାଣ, ଲୋଡିଂ ଅନଲୋଡିଂ, ସୁରକ୍ଷା, ସଫେଇ, ହାଉସକିପିଂ, ଖଣି, କୃଷି ଆଦି କ୍ଷେତ୍ରରେ କେନ୍ଦ୍ର ସରକାରଙ୍କ ଅଧୀନରେ କାମ କରୁଥିବା ଶ୍ରମିକମାନେ ଉପକୃତ ହେବେ । କନଷ୍ଟ୍ରକ୍ସନ କାମରୁ ଆରମ୍ଭ କରି ସଫେଇ କାମ କରୁଥିବା କର୍ମଚାରୀ ଏହାଦ୍ବାରା ଯଥେଷ୍ଟ ଉପକୃତ ହେବେ । କେନ୍ଦ୍ର ସରକାରଙ୍କ ପକ୍ଷରୁ ଏହି ଖୁସି ଖବର ମିଳିବା ପରେ ଶ୍ରମିକମାନେ ବର୍ଦ୍ଧିତ ମଜୁରୀକୁ ନେଇ ବେଶ ଖୁସି ଥିବା ଦେଖିବାକୁ ମିଳିଛି ।
ରାଜ୍ୟରେ ପୂର୍ବରୁ ବୃଦ୍ଧି ହୋଇଥିଲା ମଜୁରୀ:
ଗତ ଜୁଲାଇ ମାସରେ ରାଜ୍ୟରେ 450 ଟଙ୍କା ସର୍ବନିମ୍ନ ମଜୁରୀ ବୃଦ୍ଧି ହୋଇଥିଲା । ନୂଆ ସରକାରଙ୍କ କ୍ୟାବିନେଟ ବୈଠକରେ ଏହି ନିଷ୍ପତ୍ତି ଗ୍ରହଣ ହୋଇଥିଲା । ଏହାପୂର୍ବରୁ ରାଜ୍ୟରେ ସର୍ବନିମ୍ନ ମଜୁରୀ 352 ଟଙ୍କା ଥିବାବେଳ ଏହାକୁ 450ଟଙ୍କାକୁ ବୃଦ୍ଧି କରାଯାଇଛି ।
