ହଟିଲା 'ନୋ ଡିଟେନସନ ପଲିସି', ଏଣିକି ଫେଲ ହେଲେ ଆଉ ହେବନି କ୍ଲାସ ପଦୋନ୍ନତି

କେନ୍ଦ୍ର ଶିକ୍ଷା ମନ୍ତ୍ରାଳୟ ପକ୍ଷରୁ ବଡ ଘୋଷଣା । ପଞ୍ଚମ ଓ ଅଷ୍ଟମରେ ଫେଲ ହେଲେ ହେବନି କ୍ଲାସ ପଦୋନ୍ନତି ।

ନୂଆଦିଲ୍ଲୀ: କେନ୍ଦ୍ର ଶିକ୍ଷା ମନ୍ତ୍ରାଳୟ ପକ୍ଷରୁ ବଡ ଘୋଷଣା । ହଟିଲା 'ନୋ ଡିଟେନସନ ପଲିସି' (No Detention Policy) । ଏଣିକି ବାର୍ଷିକ ପରୀକ୍ଷାରେ ଫେଲ ହେଲେ ଆଉ ହେବନି କ୍ଲାସ ପଦୋନ୍ନତି । ଛାତ୍ରଛାତ୍ରୀଙ୍କ ପାଠପଢାରେ ସୁଧାର ଆଣିବାକୁ ଏଭଳି ନିଷ୍ପତ୍ତି ନିଆଯାଇଥିବା ମନ୍ତ୍ରଣାଳୟ ପକ୍ଷରୁ କୁହାଯାଇଛି ।

କଣ ରହିଛି ନୂଆ ନୀତି

ଆଜି(ସୋମବାର) କେନ୍ଦ୍ର ଶିକ୍ଷା ମନ୍ତ୍ରଣାଳୟ ପକ୍ଷରୁ ନୋ ଡିଟେନସନ ପଲିସି (No Detention Policy)କୁ ଉଚ୍ଛେଦ କରାଯାଇଛି । ବର୍ତ୍ତମାନ ପଞ୍ଚମ ଓ ଅଷ୍ଟମ ଶ୍ରେଣୀର ବାର୍ଷିକ ପରୀକ୍ଷାରେ ଫେଲ ହେଲେ ଛାତ୍ରଛାତ୍ରୀମାନଙ୍କୁ ଉପର କ୍ଲାସକୁ ପଦୋନ୍ନତି କରାଯିବ ନାହିଁ । ଅସଫଳ ଛାତ୍ରଛାତ୍ରୀମାନଙ୍କୁ ୨ ମାସ ମଧ୍ୟରେ ଆଉ ଏକ ପରୀକ୍ଷା ଦେବାକୁ ପଡିବ । ଯଦି ସେଥିରେ ସେମାନେ ପାସ୍ କରନ୍ତି ତେବେ ଉପର କ୍ଲାସକୁ ଯାଇପାରିବେ । କିନ୍ତୁ ଫେଲ ହେଲେ ସେହି କ୍ଲାସରେ ରହି ପୁଣି ଥରେ ପଢିବାକୁ ପଡିବ ।

STORY | Centre scraps 'no-detention policy' for classes 5, 8 students who fail to clear year-end exams

READ: https://t.co/oRtyNd4QaS pic.twitter.com/jtQo8StrDn

— Press Trust of India (@PTI_News) December 23, 2024

ନୂଆ ନୀତିର ଉଦ୍ଦେଶ୍ୟ

ଶିକ୍ଷା କ୍ଷେତ୍ରରେ ଛାତ୍ରଛାତ୍ରୀଙ୍କୁ ମଜଭୁତ କରିବା ପାଇଁ ଏଭଳି ନିଷ୍ପତ୍ତି ନିଆଯାଇଥିବା କେନ୍ଦ୍ର ଶିକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି । ଏହି ନୀତିର ଉଦ୍ଦେଶ୍ୟ ଛାତ୍ରଛାତ୍ରୀମାନଙ୍କୁ ଶିଖିବାର କ୍ଷମତାକୁ ଆହୁର ଭଲ କରିବା ଓ ଶିକ୍ଷା ଗ୍ରହଣ ବ୍ୟବସ୍ଥାରେ ସୁଧାର ଆଣିବା ।

'ନୋ ଡିଟେନସନ ପଲିସି' (No Detention Policy) କଣ

ଶିକ୍ଷାଗତ ଅଧିକାର 2009 ଅଧିନରେ ଥିବା 'ନୋ ଡିଟେନସନ ପଲିସି' ଅନୁଯାୟୀ, ପ୍ରାଥମିକ ବିଦ୍ୟାଳୟ (ପ୍ରଥମରୁ ଅଷ୍ଟମ ଶ୍ରେଣୀ) ଶିକ୍ଷା ନ ସରିବା ପର୍ଯ୍ୟନ୍ତ କୌଣସି ଛାତ୍ରଛାତ୍ରୀଙ୍କୁ ଫେଲ କରାଯିବ ନାହିଁ କିମ୍ବା ବିଦ୍ୟାଳୟରୁ ବାହାର କରାଯିବ ନାହିଁ । ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ସମସ୍ତ ପିଲା ପରବର୍ତ୍ତୀ ଶ୍ରେଣୀକୁ ଉତୀର୍ଣ୍ଣ ହେବେ । ବର୍ତ୍ତମାନ ଏହି ନିୟମକୁ କେନ୍ଦ୍ର ସରକାର ଉଚ୍ଛେଦ କରିଛନ୍ତି ।

କେନ୍ଦ୍ର ଶିକ୍ଷା ମନ୍ତ୍ରାଳୟ ସଚିବ ସଞ୍ଜୟ କୁମାର କହିଛନ୍ତି," ପଞ୍ଚମ ଓ ଅଷ୍ଟମ ଶ୍ରେଣୀରେ ସମସ୍ତ ପ୍ରକାର ପ୍ରୟାସ କରିବା ପରେ ଯଦି ଛାତ୍ରଛାତ୍ରୀଙ୍କୁ ଫେଲ କରିବାକୁ ପଡୁଛି ତେବେ ତାଙ୍କୁ ଫେଲ କରାଯିବ । କିନ୍ତୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ କୌଣସି ଛାତ୍ରଛାତ୍ରୀଙ୍କୁ ବିଦ୍ୟାଳୟରୁ ବାହାର କରାଯିବନାହିଁ । ରାଷ୍ଟ୍ରୀୟ ଶିକ୍ଷା ନୀତି ଆଧାରରେ ଆମେ ଏୟା ଚାହୁଁଛୁ ଯେ ସବୁ ଛାତ୍ରଛାତ୍ରୀଙ୍କ ପାଠ ପଢା ଅନେକ ଗୁଣାରେ ଭଲ ହେଉ । ଏହି ଉଦ୍ଦେଶ୍ୟକୁ ସାର୍ଥକ କରିବା ପାଇଁ ଯେଉଁ ଛାତ୍ରଛାତ୍ରୀମାନେ କୌଣସି କାରଣବଶତଃ ପାଠ ପଢାରେ ସେତେଟା ଭଲ ନୁହଁନ୍ତି ସେମାନଙ୍କ ଉପରେ ବିଶେଷ ଧ୍ୟାନ ଦିଆଯାଉ । ସେଥିପାଇଁ ନିୟମରେ ପରିବର୍ତ୍ତନ କରାଯାଇଛି ।"

ଏହାମଧ୍ୟ ପଢନ୍ତୁ...

ବ୍ୟୁରୋ ରିପୋର୍ଟ, ଇଟିଭି ଭାରତ