ନୂଆଦିଲ୍ଲୀ: ଘୋଟାଲା ମାମଲାରେ ଗିରଫ ହୋଇ ତଦନ୍ତକାରୀ ସଂସ୍ଥା ରିମାଣ୍ଡରେ ଥିଲେ ସୁଦ୍ଧା ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇନାହାନ୍ତି ଅରବିନ୍ଦ କେଜ୍ରିଓ୍ବାଲ । ଇଡି ରିମାଣ୍ଡରେ ଥାଇ ମଧ୍ୟ ସେ ସରକାରୀ କାମ ଜାରି ରଖିଛନ୍ତି । କଷ୍ଟଡିରୁ ନିଜ କ୍ୟାବିନେଟକୁ ସରକାରୀ ନିର୍ଦ୍ଦେଶ ମଧ୍ୟ ଦେଉଛନ୍ତି । ହେଲେ କେଜ୍ରିଓ୍ବାଲ ଇସ୍ତଫା ନଦେବା ନେଇ ବିଜେପି ନେତାମାନେ ପ୍ରଶ୍ନ ଉଠାଇଛନ୍ତି । କେନ୍ଦ୍ରମନ୍ତ୍ରୀ ଅନୁରାଗ ଠାକୁର ଗତକାଲି ଏହି ପ୍ରସଙ୍ଗରେ କେଜ୍ରିଓ୍ବାଲଙ୍କୁ ସମାଲୋଚନା କରିଛନ୍ତି ।
ଅନୁରାଗ କହିଛନ୍ତି, ତାଙ୍କର କ୍ଷମତାରେ ରହିବାର ଅଭିଳାଷ ଏତେ ଯେ, ସେ ଗିରଫ ହୋଇ ଜେଲକୁ ଗଲା ପରେ ମଧ୍ୟ ଇସ୍ତଫା ଦେଇନାହାନ୍ତି । ହେଲେ ଆଇନ ସମସ୍ତଙ୍କ ପାଇଁ ସମନ । ମୋଦି ଶାସନରେ କେହି ଜଣେ ବି ଦୁର୍ନୀତିଗ୍ରସ୍ତ ଆଇନରୁ ରକ୍ଷା ପାଇବେ ନାହିଁ । ସମସ୍ତଙ୍କ ବିରୋଧରେ ଉଚିତ କାର୍ଯ୍ୟାନୁଷ୍ଠାନ ଗ୍ରହଣ କରିବ ।
ଅନ୍ୟପଟେ ଗତକାଲି(ବୁଧବାର) କେଜ୍ରିଓ୍ବାଲଙ୍କ ଆବେଦନର ଶୁଣାଣି କରି ଦିଲ୍ଲୀ ହାଇକୋର୍ଟ କୌଣସି ଅନ୍ତରୀଣ ବେଲ ପ୍ରଦାନ କରିବା ପାଇଁ ମନା କରିବା ସହ ତଦନ୍ତକାରୀ ସଂସ୍ଥା ଠାରୁ ସବିଶେଷ ରିପୋର୍ଟ ମାଗିଛନ୍ତି । ଆସନ୍ତା ମାସ 3 ତାରିଖରେ ମାମଲାର ପରବର୍ତ୍ତୀ ଶୁଣାଣି ହେବ । ତେବେ ଗିରଫଦାରୀକୁ ପ୍ରଥମ ଦିନରୁ ବେଆଇନ ବୋଲି କହିଆସିଛି ଆମ ଆଦମୀ ପାର୍ଟି । କେଜ୍ରିଓ୍ବାଲ ହିଁ ଦିଲ୍ଲୀର ମୁଖ୍ୟମନ୍ତ୍ରୀ ରହିବେ । ତାଙ୍କୁ ଉଦ୍ଦେଶ୍ୟମୂଳକ ଭାବେ ଗିରଫ କରାଯାଇଛି । ସେ ଦୋଷୀ ସାବ୍ୟସ୍ତ ହୋଇନାହାନ୍ତି । ତେଣୁ ତାଙ୍କ ଇସ୍ତଫା ନେଇ କୌଣସି ଆଇନଗତ କିମ୍ବା ସାମ୍ବିଧାନିକ ଆବଶ୍ୟକତା ନାହିଁ ବୋଲି ଦଳ ପକ୍ଷରୁ ସ୍ପଷ୍ଟ ମଧ୍ୟ କରାଯାଇ ସାରିଛି ।
ଏହି ମାମଲାରେ ପୂର୍ବରୁ ଗିରଫ ହୋଇଥିବା ଆମ ଆଦମୀ ପାର୍ଟି ନେତାମାନେ ଏପର୍ଯ୍ୟନ୍ତ ମଧ୍ୟ ବେଲ ପାଇବାରେ ସଫଳ ହୋଇନାହାନ୍ତି । ମନୀଷ ସିସୋଦିଆ ଗିରଫ ହେବା ପରେ ଉପମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ । ସେହିପରି ଅନ୍ୟତମ ଦଳୀୟ ନେତା ତଥା ପୂର୍ବତନ ସ୍ବାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜୈନ ମଧ୍ୟ ଆର୍ଥିକ ହେରଫେର ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ ଦ୍ବାରା ଗିରଫ ହେବା ପରେ ଇସ୍ତଫା ଦେଇଥିଲେ । ଏବେ ପର୍ଯ୍ୟନ୍ତ ଉଭୟ ନେତା ନିୟମିତ ବେଲ ପାଇନାହାନ୍ତି । ଏବେ କେଜ୍ରିଓ୍ବାଲଙ୍କୁ କେବେ ବେଲ ପ୍ରଦାନ କରୁଛନ୍ତି କୋର୍ଟ, ତାହା ଉପରେ ସମସ୍ତଙ୍କ ନଜର ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
