ରାୟପୁର: ଛତିଶଗଡ଼ ବସ୍ତର ଡିଭିଜନ ସୁକମା ଜିଲ୍ଲାରେ ନକ୍ସଲ ବିରୋଧୀ ଅପରେସନ ସୁରକ୍ଷାବଳକୁ ବଡ ସଫଳତା ମିଳିଛି । ଏକା ଥରକେ ନିପାତ ହୋଇଛନ୍ତି 10 ନକ୍ସଲ । ଗତକାଲି (ଗୁରୁବାର)ଠାରୁ ଜାରି ରହିଥିବା ଅପରେସନରେ ଆଜି ସଫଳତା ମିଳିଛି । 10 ନକ୍ସଲଙ୍କ ମୃତଦେହ ସମେତ ରାଇଫଲ ଓ ଅନ୍ୟ ମାରଣାସ୍ତ୍ର ଜବତ ଏବେ ମଧ୍ୟ ଅପରେସନ ଜାରି ରହିଥିବା ସ୍ଥାନୀୟ ଏସ.ପି କିରଣ ଚୌହାନ ଗଣମାଧ୍ୟମକୁ ସୂଚନା ଦେଇଛନ୍ତି ।
- 10 ନକ୍ସଲ ନିପାତ: ସୁକମା ଏସପି
ଏସପି କିରଣ ଚୌହାନଙ୍କ ସୂଚନା ଅନୁସାରେ,‘‘ବସ୍ତର ଡିଭିଜନ ସୁକମା ଜଙ୍ଗଲରେ ନକ୍ସଲ ଗତିବିଧି ନେଇ ସୂଚନା ମିଳିବା ପରେ ‘ଡିଆରଜି’ ଯବାନଙ୍କ ଏକ ୟୁନିଟ୍ ଅପରେସନ ଆରମ୍ଭ କରିଥିଲା । କୋଣ୍ଟା ଓ କିସ୍ତାରାମ ଜଙ୍ଗଲରେ ଏହି ଅପରେସନ ବେଳେ ନକ୍ସଲଙ୍କ ସହ ମୁହାଁମୁହିଁ ହେବା ପରେ ଉଭୟ ପଟୁ ଗୁଳି ବିନିମୟ ହୋଇଥିଲା । ଏଥିରେ 10 ଜଣ ନକ୍ସଲ ନିପାତ ହୋଇଛନ୍ତି । ଜଙ୍ଗଲରୁ 10 ମୃତଦେହ ଉଦ୍ଧାର କରାଯାଇଛି । ଅତ୍ୟାଧୁନିକ ରାଇଫଲ ସମେତ ଅନ୍ୟ ମାରଣାସ୍ତ୍ର ଓ ମାଓସାମଗ୍ରୀ ମଧ୍ୟ ସୁରକ୍ଷାବଳ ଜବତ କରିଛି ।’’
सुकमा जिले में आज सुबह सुरक्षाबलों ने एक बड़ी कार्रवाई में 10 नक्सलियों को मार गिराया।
— CMO Chhattisgarh (@ChhattisgarhCMO) November 22, 2024
मुख्यमंत्री श्री विष्णुदेव साय ने सुरक्षाबलों की इस उपलब्धि पर प्रसन्नता व्यक्त करते हुए कहा कि उनकी सरकार नक्सलवाद के प्रति ज़ीरो टॉलरेंस की नीति पर कार्य कर रही है। उन्होंने यह भी कहा कि… pic.twitter.com/8qL1jZlHEO
- ସୁରକ୍ଷାବଳକୁ ଶୁଭେଚ୍ଛା ଜଣାଇଲେ ମୁଖ୍ୟମନ୍ତ୍ରୀ ବିଷ୍ଣୁଦେବ:-
ସୁରକ୍ଷାବଳର ସଫଳତାରେ ମୁଖ୍ୟମନ୍ତ୍ରୀ ବିଷ୍ଣୁଦେବ ସାଏ ଟ୍ବିଟ୍ କରି ଧନ୍ୟବାଦ ଦେଇଛନ୍ତି । ଏହା ନକ୍ସଲ ବିରୋଧୀ ଅପରେସନରେ ବଡ ସଫଳତା ବୋଲି ସାଏ କହିଛନ୍ତି । ତାଙ୍କ ସରକାର ନକ୍ସଲବାଦ ପ୍ରତି ଶୂନ୍ୟ ସହିଷ୍ଣୁତା ଆଧାରରେ କାର୍ଯ୍ୟ କରୁଛି । ଆଗକୁ ମଧ୍ୟ ଏହା ଜାରି ରହିବ । ବସ୍ତର ଜୋନର ଶାନ୍ତି, ସ୍ଥିରତା ଓ ପ୍ରଗତିକୁ ନିଶ୍ଚିତ କରିବା ତାଙ୍କ ସରକାରର ପ୍ରାଥମିକତା ।
- ମାଲକାନଗିରିରେ ହୋଇଥିଲା ଏନକାଉଣ୍ଟର
ଗତକାଲି (ଗୁରୁବାର) ମାଲକାନଗିରି ମୀମାନ୍ତରେ ମଧ୍ୟ ଓଡିଶା ପୋଲିସ ଓ ବିଏସଏଫ ମିଳିତ ଭାବେ ଅପରେସନ କରିଥିଲେ । ଏଥିରେ ଜଣେ ନକ୍ସଲ ନିହତ ହୋଇଥିଲା । ଜଣେ ‘ଡିଭିଏଫ’ ଯବାନ ନକ୍ସଲଙ୍କ ଗୁଳିରେ ଗୁରୁତର ହୋଇଥିଲେ । ତାଙ୍କୁ ପ୍ରଥମେ ଜିଲ୍ଲା ମୁଖ୍ୟ ଚିକିତ୍ସାଳୟ ଓ ପରେ ବିଶାଖାପାଟଣାକୁ ଏୟାରଲିଫ୍ଟ କରାଯାଇଥିଲା । ଅନ୍ୟ କିଛି ନକ୍ସଲ ଛତିଶଗଡ ପଟକୁ ପଳାଇଯାଇଥିବା ପୋଲିସ ସନ୍ଦେହ କରୁଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
