राहुल गांधी यांचा लातुरात अचानक मुक्काम, अमित देशमुख यांनी दिली 'ही' माहिती - Lok Sabha Election 2024

लातूर Lok Sabha Election 2024 : लोकसभा निवडणुकीचं रणांगण तापलं असून प्रचार शिगेला पोहोचलाय. त्यामुळे बड्या नेत्यांच्या प्राचार सभांमधून एकमेकांवर वार-प्रतिवार होत आहेत. राज्याच्या विविध भागात प्रचाराच्या मॅरेथॉन सभा होत आहेत. त्यातच सोलापूरची प्रचारसभा आटोपून राहुल गांधी यांनी लातुरात अचानक मुक्काम केला. लातुरातून नाईट लँडीगची व्यवस्था नसल्यानं त्यांनी लातुरात मुक्काम ठोकल्याची माहिती प्रसार माध्यमांना देण्यात आली.  

महाविकास आघाडीच्या सोलापूर लोकसभेच्या काँग्रेसच्या उमेदवार प्रणिती शिंदे यांच्या प्रचारासाठी राहुल गांधी यांची जाहीर प्रचार सभा 24 एप्रिलला संपन्न झाली. या सभेसाठी राहुल गांधी दिल्लीवरून विमानानं थेट लातूरच्या विमानतळावर पोहोचले. लातूर विमानतळाहून हेलिकॉप्टरनं सोलापूरच्या दिशेनं मार्गस्थ झाले. सभा संपल्यानंतर सायंकाळी राहुल गांधी पुन्हा लातूरच्या विमानतळावर आले. परंतु लातूर विमानतळावर नाईट लँडिंगची व्यवस्था नसल्यानं त्यांनी अचानक लातूरमध्ये मुक्कामी थांबण्याचा निर्णय घेतला. लातूर शहरातील बार्शी रोडवरील हॉटेल ग्रँड इथं काँग्रेस कार्यकर्ते पदाधिकाऱ्यांनी मोठ्या उत्साहात राहुल गांधी यांचं स्वागत केलं. रात्रीच्या मुक्कामादरम्यान राहुल गांधी यांनी मराठवाड्यातील सर्व लोकसभा मतदारसंघाचा लातूर शहराचे काँग्रेसचे नेते आमदार अमित देशमुख यांच्याकडून सविस्तर आढावा घेतला. शिवाय लातूर लोकसभा मतदारसंघातील परिस्थितीवर चर्चा केली. आज सकाळी 7 वाजता लातूरच्या विमानतळावरून राहुल गांधी दिल्लीच्या दिशेनं रवाना झाले. राहुल गांधी यांची ही अचानक भेट होती. पूर्वनियोजित काहीही नव्हते, अचानक मुक्काम केला, असं काँग्रेसचे स्टार प्रचारक तथा लातूर शहराचे आमदार अमित देशमुख यांनी माध्यमांशी बोलताना सांगितलं आहे.