साताऱ्यातून डॉ. अतुल भोसलेंनीच खासदार व्हावं, आ. जयकुमार गोरे यांचं मोठं वक्तव्य; पाहा व्हिडिओ

सातारा Lok Sabha Election 2024 : सातारा लोकसभा मतदारसंघातून महायुतीची उमेदवारी कुणाला मिळणार, हे अद्याप स्पष्ट झालं नसलं तरी भाजपाचे राज्यसभा खासदार उदयनराजे भोसले यांनी निवडणुकीची तयारी सुरू करून आपण इच्छुक असल्याचं दाखवून दिलं आहे. मात्र, भाजपाचे आमदार जयकुमार गोरे यांच्या एका वक्तव्यानं उदयनराजेंची अडचण झाली आहे. साताऱ्यातून अतुल बाबांनीच खासदार व्हावं, अशी आमची इच्छा असल्याचं विधान त्यांनी कराड तालुक्यातील एका जाहीर सभेत केलं आहे. त्यामुळं उदयनराजेंच्या उमेदवारीला पक्षातूनच विरोध आहे का? अशी चर्चा सुरू झाली आहे. तर लोकसभा निवडणूक लढवण्यास अतुल भोसले हे इच्छुक नसून ते कराड दक्षिण विधानसभा मतदार संघातूनच निवडणूक लढवणार आहेत. तथापि, विकासाभिमुख नेतृत्व असलेल्या अतुल भोसले यांना संधी द्या. खरंतर अतुल भोसले यांनी खासदार व्हावं, अशी आम्हा सर्वांची इच्छा आहे, असं आमदार गोरे म्हणाले आहेत. त्यावरून आता विविध चर्चांना सुरू झाल्याचं बघायला मिळतंय.