चार बायका असणाऱ्यांना लाडकी बहीण योजनेचा लाभ देणार का - मनसे - Mazi Ladki Bahin Yojana

Mazi Ladki Bahin Yojana : राज्याच्या अर्थसंकल्पात मुख्यमंत्री माझी लाडकी बहीण योजना जाहीर करण्यात आली. या योजनेनुसार राज्यातील महिलांना दरमहा 1500 रुपये मिळणार आहेत. मात्र या योजनेत बदल करण्याची मागणी मनसेनं केली आहे.

छत्रपती संभाजीनगर Mazi Ladki Bahin Yojana : माझी लाडकी बहीण योजनेचा लाभ देताना एक पत्नी दोन मुले असणाऱ्यांना द्या, अशी मागणी मनसे नेते प्रकाश महाजन यांनी केली आहे. लाडकी बहीण योजना चांगली असून तिला विरोध नाही. मात्र, नियम तयार करताना त्यात त्रुटी आहेत. मुंबई, नवी मुंबई, ठाणे या ठिकाणी राहणाऱ्या बंगलादेशी तसंच काही धर्मात चार बायका करण्याची मुभा आहे, अशा कुटुंबात एकाच घरात सर्वांना मदत करणार का? असा प्रश्न त्यांनी उपस्थितीत करत नियम कडक करण्याची मागणी त्यांनी केली.

दोन मुलांची अट : माझी लाडकी बहीण योजना राबवताना त्यात असलेले नियम कमकुवत आहेत. त्यामुळं गरजू कुटुंबीयांना फक्त मदत झाली पाहिजे. योजनेचा लाभ देताना त्यात कडक नियम करा, दोन मुलांची अट करा, एक बायको असा नियम करा. शोषितांना मदत करा. याबाबत सरकारनं नियोजन करावं. योजनेचे दुष्परिणाम लक्षात घेतले पाहिजे. विद्यार्थ्यांना परीक्षा देताना अनेक नियम असतात, डोमेसाईल मागितलं जातं. मतदान करताना अनेक नियम आहेत. सरकारी योजनांचा लाभ घेण्यासाठी नियम लावण्यात आले पाहिजे. कुणाच्या धर्माला विरोध नाही, पण सरकारनं विचार करावा, असं मत मनसे नेते प्रकाश महाजन यांनी व्यक्त केलं.