घाटकोपर होर्डिंग प्रकरण : जीआरपीच्या एसीपीचा नोंदवला जबाब; उद्या भिंडेला करणार न्यायालयात हजर - Ghatkopar Hoarding Collapse Case

Ghatkopar Hoarding Collapse Case : घाटकोपर इथं होर्डिंग कोसळून तब्बल 17 नागरिकांचा मृत्यू झाल्यानं देशभरात मोठी खळबळ उडाली. या प्रकरणी पोलिसांनी भावेश भिंडे याला अटक केली आहे. त्याची कोठडी आज संपणार आहे. तर एसआयटीनं जीआरपीचे सहायक पोलीस आयुक्त शहाजी निकम यांचा जबाब नोंदवला आहे.

मुंबई Ghatkopar Hoarding Collapse Case : घाटकोपर होर्डिंग कोसळल्यानं तब्बल 17 बळी गेले आहेत. या प्रकरणी तपास करणाऱ्या मुंबई पोलिसांच्या एसआयटीनं समन्स बजावलेले रेल्वे पोलीस (जीआरपी) सहायक पोलीस आयुक्त शहाजी निकम मंगळवारी सकाळी एसआयटीसमोर हजर झाले. रात्री उशिरापर्यंत त्यांचा जबाब नोंदवण्यात आला. या प्रकरणातील पहिला आरोपी भावेश भिंडे याची पोलीस कोठडी उद्या संपत असून पुन्हा त्याला न्यायालयात हजर केलं जाणार आहे.

शहाजी निकम यांचा जबाब महत्त्वाचा : अटक करण्यात आलेल्या आरोपी भावेश भिंडेला होर्डिंगची परवानगी देताना जीआरपीमध्ये सर्व प्रक्रिया पाळल्या गेल्या होत्या का, हे शोधण्यासाठी शहाजी निकम यांचा जबाब महत्त्वाचा ठरणार आहे. एसआयटीच्या एका अधिकाऱ्यानं सांगितलं की, "शहाजी निकम मंगळवारी सकाळी एसआयटीसमोर हजर झाले. एसीपी शहाजी निकम काही कागदपत्रे विसरले. त्यामुळे त्यांना परत जावं लागलं. रात्री उशिरापर्यंत त्यांचा जबाब नोंदवला गेला आहे.