शिर्डी (अहमदनगर) Summer Matka Business : यंदाच्या वर्षी उन्हाची तीव्रता अधिक जाणवत असल्यानं गरिबांचं फ्रीज म्हणून ओळखल्या जाणाऱ्या मातीच्या माठांना बाजारात मागणीही तेवढीच वाढली आहे. यामुळं माठ विक्री व्यावसायिकांना यंदाच्या वर्षी तरी काहीसा दिलासा मिळणार असल्याचं चित्र सध्या राहाता तालुक्यातील आस्तगावमध्ये पाहायला मिळत आहे.
मातीसह भुशाच्या किंमतीत वाढ : राहाता तालुक्यातील आस्तगाव येथील कुंभार व्यावसायिकांनी वर्षभर केलेल्या मेहनतीनंतर बनविण्यात आलेल्या माठांना उन्हाळ्यात मोठ्या प्रमाणावर मागणी असते. यंदाच्या वर्षी मार्च महिन्याचा सुरुवातीलाच उन्हाचे चटके जाणवू लागल्यानं मातीच्या माठांच्या मागणीत मोठ्या प्रमाणात वाढ झाली आहे. तसंच माठ बनवण्यासाठी लागणाऱ्या मातीसह भुशाच्या किंमतीतही यंदा वाढ झाली आहे.
वेगवेगळ्या प्रकारच्या माठांना पसंती : सध्या बाजारात मोठ्या प्रमाणात नळ असलेल्या माठांना ग्राहक पसंती देत असल्याचं दिसून येतंय. महाराष्ट्रात प्रामुख्यानं काळे माठ बनविले जातात. मात्र, ग्राहक राजस्थान, गुजरातमधील लाल आणि नक्षी असलेल्या माठांनाही पसंती देत असल्यानं पारंपरिक माठांसह विविध प्रकारचे माठही बाजारात बघायला मिळताय.
माठातील पाण्यानंच तहान भागते : यासंदर्भात माठ व्यावसायिक हिराबाई रसाळ यांच्याशी संवाद साधण्यात आला असता त्या म्हणाल्या की, "कडाक्याचा उन्हाळा सुरू झाल्यानंतर लोक मातीच्या माठातील गारगार पाणी पिण्याला पसंती देतात. माठातील पाणी आरोग्यासाठीही चांगलं असते. मात्र, सध्या जारच्या पाण्याला काही नागरिक पसंती देत असल्याचं पाहायला मिळतंय. जारचं पाणी आता वाडी वस्तीवर, शहरात घर पोहोच मिळतंय. जारच्या पाण्याचा काही प्रमाणात फटका माठ विक्रीत्यांना बसलाय. मात्र, तुम्ही फ्रीज किंवा जारचं पाणी कितीही पिलं तरी तुमची तहान भागणार नाही. शेवटी माठातील गारगार पाणी पिल्यानंच तहान भागते."
हेही वाचा -
