मुंबई : बॉलीवूड अभिनेता सैफ अली खानवर हल्ला करणाऱ्या मोहम्मद शहजाद या आरोपीच्या पोलीस कोठडीत वाढ करण्यात आली आहे. आरोपीची पोलीस कोठडी शुक्रवारी संपत असल्यानं पोलिसांनी त्याला मुंबईतील वांद्रे न्यायालयासमोर हजर केलं. त्यावेळी न्यायालयानं पोलीस कोठडी वाढवून हवी का, असा प्रश्न विचारला. त्यावेळी पोलिसांतर्फे पोलीस कोठडी वाढवण्याची मागणी करण्यात आली.
या आरोपीचे गुन्हा घडला तेव्हा वापरलेले कपडे, गुन्ह्यात वापरलेल्या वस्तू जप्त केल्या आहेत. मात्र, गुन्ह्यात वापरलेले बूट मिळालेले नाहीत, त्याचा शोध घ्यायचा आहे. त्यामुळे पोलीस कोठडीची मुदत अजून सात दिवस वाढवून द्यावी, अशी मागणी वकिलांनी केली. हा गंभीर गुन्हा आहे. अद्याप या गुन्ह्यात वापरलेल्या वस्तू जमा करायच्या आहेत. तसंच अजूनही या प्रकरणाचा तपास होणं गरजेचं आहे. सिमकार्ड नेमकी कोणाची आहेत, याबाबत आरोपी उडवा उडवीची उत्तरे देत आहे. सीसीटीव्ही फुटेज आणि आरोपीचा चेहरा हे देखील तपासायचं आहे. त्यामुळे आरोपीची पोलीस कोठडी वाढवून द्यावी, अशी मागणी वकिलांनी केली.
तर, आरोपीची पोलीस कोठडी वाढू नये, अशी मागणी आरोपीच्या वकीलांतर्फे करण्यात आली. सदर घटना घडली तेव्हा आरोपीनं कोणतीच आरडा ओरड केली नाही. त्यानंतर थेट जखमी अवस्थेतील सैफ अली खानला ऑटो रिक्षातून नेण्यात आलं. आरोपीला पुन्हा पोलीस कोठडी देण्याची कोणतीही गरज भासत नाही. त्याचे कपडे आणि इतर वस्तू जप्त करण्यात आल्या आहेत. त्यामुळ पोलीस कोठडी देऊ नये, अशी मागणी आरोपीच्या वकिलांनी केली.
सैफ अली खानच्या पूर्ण बिल्डिंगमध्ये सीसीटीव्ही कॅमेरा नाही. तेथील चित्रिकरण उपलब्ध नाही. संशयित आरोपीचा आणि अटक केलेल्या आरोपीचा चेहरा मॅच होत नाही. अशी भूमिका आरोपीच्या वकिलांनी मांडली. या प्रकरणाबाबत आरोपीच्या नातेवाईकांना माहिती देण्यात आलेली नाही अशी तक्रार वकिलांनी केली. दोन्ही बाजूंचा युक्तीवाद ऐकल्यानंतर न्यायालयानं आरोपीची पोलीस कोठडी वाढवून देण्यात येत असल्याचे जाहीर केले. त्यामुळे आरोपीला २९ जानेवारीपर्यंत पोलीस कोठडी देण्यात आली आहे. आरोपीला ठाण्यातून अटक केल्यानंतर पोलिसांनी त्याला वांद्रे न्यायालयात गेल्या रविवारी हजर केलं होतं. त्यावेळी त्याला शुक्रवारपर्यंतची पोलीस कोठडी सुनावण्यात आली होती.
हेही वाचा :
