मुंबई Rahul Shewale : मुंबईची लाईफलाईन म्हणून ओळखल्या जाणाऱ्या रेल्वेला आता लवकरच नवी ओळख मिळणार आहे. मुंबईतील ब्रिटिशकालीन 8 रेल्वे स्थानकांची नावं बदलून नवी नावं देण्यात यावी, अशी मागणी शिवसेना (शिंदे गट) लोकसभा गटनेते खासदार राहुल शेवाळे यांनी मुख्यमंत्री एकनाथ शिंदे यांच्याकडं केली आहे. या मागणीला राज्य सरकारनं तत्वतः मंजुरी दिली असून कॅबिनेट निर्णयानंतर राज्य सरकारच्या वतीनं हा प्रस्ताव केंद्र सरकारकडं पाठवला जाणार आहे.
राहुल शेवाळे यांनी आपल्या निवेदनात म्हटलंय की, मुंबईतील अनेक रेल्वे स्थानकं आजही ब्रिटिशकालीन नावानं ओळखली जातात. मात्र, या रेल्वे स्थानकांच्या परिसरातील इतिहास पाहता, या स्थानकांच्या नामांतराची मुंबईकरांची मागणी आहे. त्यामुळं करी रोड रेल्वे स्थानकाला लालबाग तर मरीन लाईन्स स्थानकाला मुंबादेवी यांसह एकूण सात रेल्वे स्थानकांचं नामांतर करण्याची मागणी या निवेदनात करण्यात आली आहे. तर राज्य सरकारच्या वतीनं यापूर्वीच मुंबई सेंट्रल रेल्वे स्थानकाचं नामांतर नाना जगन्नाथ शंकरशेठ रेल्वे स्थानक करण्यात यावं यासंदर्भातील प्रस्ताव केंद्र सरकारला पाठवला आला. त्यामुळं आता मुंबईतील एकूण 8 रेल्वे स्थानकांची नावं बदलणार आहेत.
भारतीय पारतंत्र्याची ओळख पुसण्यासाठी केंद्र सरकार प्रयत्नशील आहे. त्यामुळं मुंबईतील रेल्वे स्थानकांची ब्रिटिशकालीन नावं बदलण्याची जनतेची मागणी होती. ही जनतेची भावना राज्य सरकारपर्यंत पोहोचवली. या मागणीला तत्त्वत: मंजुरी दिल्याबद्दल माननीय मुख्यमंत्री एकनाथ शिंदे यांचं आभार मानतो. लवकरच याविषयी मंत्रिमंडळ निर्णय करून हा प्रस्ताव केंद्र सरकारकडं पाठवला जाईल- खासदार राहुल शेवाळे
नामांतरासाठी प्रस्तावित रेल्वे स्थानकं :
1. करी रोड - लालबाग
2. सँडहर्स्ट रोड - डोंगरी
3. मरीन लाईन्स - मुंबादेवी
4. चर्नी रोड - गिरगाव
5. कॉटन ग्रीन -काळाचौकी
6. डॉकयार्ड - माझगाव
7. किंग्ज सर्कल - तीर्थंकर पार्श्वनाथ
8. मुंबई सेंट्रल - नाना जगन्नाथ शंकरशेट
हेही वाचा -
