संविधानावर ते थेट नाही लपून हल्ला करतात -राहुल गांधी

लोकसभेतील विरोधी पक्षनेते राहुल गांधी आज महाराष्ट्र दौऱ्यावर आले आहेत. ते आज महाविकास आघाडीच्या प्रचाराला सुरुवात करणार आहेत.

नागपूर- लोकसभेतील विरोधी पक्षनेते राहुल गांधी म्हणाले, " संविधान फक्त पुस्तक नाही तर जगण्याचा अधिकार आहे. संविधान सर्वांना अधिकार देते. ते संविधानावर थेट हल्ला करत नाहीत, लपून हल्ला करतात. एक व्यक्ती देशाचं भवितव्य हिसकावून घेईल, असे संविधानात लिहिले नाही. डॉ. बाबासाहेब आंबेडकर कोट्यवधी लोकांचा आवाज होते. गांधी आणि आंबेडकर यांच्या मुखातून जनतेचा आवाज निघायचा. जाती आधारित जनगणना झाली पाहिजे. जातीगणनेचं खरं नाव हक्क आहे. संविधान नसते, तर निवडणूक आयोगही राहीला नसता. सामान्याला सत्ता, शक्तीची गरज आहे. सत्तेशिवाय सन्मान मिळणार नाही."

" संविधानात भगवान बुद्ध, सम्राट अशोक, महात्मा बसवेश्वर, राजर्षी शाहू महाराज, महात्मा फुले, सावित्रिबाई अशा महापुरुषांचा आवाज आहे. संविधानातील विचार हजारो वर्षांपूर्वीचे आहेत. संविधानात सर्व जाती, धर्माचा, प्रदेशाचा आदर आहे. याच संविधानावर भाजपा व आरएसएस सातत्याने हल्ले करत आहेत. आरएसएस संविधानावर थेट हल्ला करु शकत नाहीत, ते लपून हल्ला करतात, आरएसएसमध्ये हिंमत असती तर त्यांनी समोरुन हल्ला केला असता, असा घणाघाती हल्लाबोल लोकसभेतील विरोधी पक्षनेते राहुल गांधी यांनी केला.

राष्ट्रीय स्वयंसेवक संघावर तोफ डागली- नागपूरमध्ये संविधान सन्मान संमेलनात बोलताना राहुल गांधी यांनी भारतीय जनता पक्ष आणि राष्ट्रीय स्वयंसेवक संघावर तोफ डागली. ते पुढे म्हणाले, " डॉ. बाबासाहेब आंबेडकर, महात्मा गांधी हे स्वतःबद्दल बोलत नसत, ते जेव्हा बोलायचे तेव्हा तो कोट्यवधी लोकांचा आवाज असायचा. संविधानात सर्वांच्या विकासाबद्दल लिहिले आहे. संविधानामुळे प्राथमिक शिक्षण, उच्च शिक्षण, आयआयटी, आयआयएम, सार्वजनिक रुग्णालये आहेत. निवडणूक आयोग, सरकारी यंत्रणा आहेत. संविधानात एक व्यक्ती एक मतदान, प्रत्येक जात, धर्म, प्रदेशाचा आदर केला आहे. पण देशात ९० टक्के लोकांवर दररोज अन्याय होत आहे. त्याविरोध आपली लढाई आहे."

५० टक्क्यांची मर्यादासुद्धा हटवली जाईल- "अन्याय दूर करण्यासाठी जातनिहाय जनगणना गरजेची आहे. जातनिहाय जनगणनेची मागणी होत असल्यानं पंतप्रधान नरेंद्र मोदींची झोप उडाली आहे. जातनिहाय जनगणनेवर मी बोलतो तेव्हा नरेंद्र मोदी माझ्यावर देश तोडण्याची भाषा करतो असा आरोप करतात. जातनिहाय जनगणनेवर काय भूमिका घ्यायची यावर आरएसएसमध्येही मंथन सुरू आहे. त्यांनी कोणतीही भूमिका घेतली तरी जातनिहाय जनगणना करण्यापासून कोणीही रोखू शकत नाही. आरक्षणाची ५० टक्क्यांची मर्यादासुद्धा हटवली जाईल," असा निर्धार राहुल गांधी यांनी व्यक्त केला.

जेलमध्ये टाकले जाते- "शेतकऱ्याने कर्ज परतफेड केली नाही तर त्याला जेलमध्ये टाकले जाते. करोडो रुपये कर्ज घेऊन परदेशात पळून जातो त्याला उद्योगपती म्हणतात," असा टोला राहुल गांधी लगावला, आपल्या भाषणात त्यांनी शिशुमंदिरासाठी एवढा पैसा कुठून येतो असा सवाल उपस्थित केला. " हा पैसा गुजरात, राजस्थान, मध्य प्रदेश, नॅशनल हायवे, अदानी आणि अंबानीचा पैसा आहे असे म्हटले जाते," अशी त्यांनी टीका केली.

नागपूरात आगमन झाल्याबरोबर लोकसभेचे विरोधी पक्षनेते राहुल गांधी यांनी नागपुरात दिक्षाभूमीला भेट देऊन महामानव डॉ. बाबासाहेब आंबेडकर यांना अभिवादन केले. यावेळी त्यांच्यासोबत प्रभारी रमेश चेन्नीथला, काँग्रेसचे प्रदेशाध्यक्ष नाना पटोले, विधानसभेतेली विरोधी पक्ष नेते विजय वडेट्टीवार उपस्थित होते. काँग्रेसचे अध्यक्ष मल्लिकार्जुन खरगे आणि राहुल गांधी वांद्रे कुर्ला कॉम्प्लेक्स येथे महाविकास आघाडीची सभा घेणार आहेत. बीकेसी मैदानावरील सभेत राष्ट्रवादी काँग्रेस पक्षाचे (एसपी) अध्यक्ष शरद पवार, शिवसेना (यूबीटी) अध्यक्ष उद्धव ठाकरे, राष्ट्रवादीचे (एसपी) प्रदेशाध्यक्ष जयंत पाटील हे नेतेदेखील संबोधित करणार आहेत.

उपमुख्यमंत्री देवेंद्र फडणवीस यांच्या टीकेला विजय वडेट्टीवार यांचं प्रत्युत्तर- उपमुख्यमंत्री देवेंद्र फडणवीस यांनी राहुल गांधींच्या भोवती अराजक पसरविणारे लोक असल्याची टीका केली. या टीकेला काँग्रेस नेते विजय वडेट्टीवार यांनी जोरदार प्रत्युत्तर दिले. विधानसभेतील विरोधी पक्षनेते वडेट्टीवार म्हणाले, "भाजपानं राहुल गांधींच्या कार्यक्रमाला 'नौटंकी' म्हटले तर त्याचा अर्थ भाजप घाबरत आहे. कार्यक्रमाला 'शहरी नक्षलवादी' म्हणणे हा समाजाचा अपमान आहे. तुम्ही त्यांना 'शहरी नक्षलवादी' म्हणत असाल तर हे 'शहरी नक्षल' कोण आहेत, याची गृहमंत्र्यांनी चौकशी करावी. तुम्ही सामाजिक संघटनांचा अपमान केला आहे. ते विधानसभा निवडणुकीत बदला घेतील," असे वडेट्टीवार म्हणाले.

हेही वाचा-