पुणे Controversial IAS Pooja Khedkar : प्रचंड अभ्यास आणि मेहनत करुन विद्यार्थी आयएएस, आयपीएस दर्जाचे अधिकारी बनतात. त्यामुळं त्यांच्याकडे बघण्याचा समाजाचा दृष्टीकोनही पॉझिटिव्ह असतो. घरातील पालक आपल्या मुलांनाही अशाच सक्सेस झालेल्या अधिकाऱ्यांबद्दल सांगत असतात. त्यांना रोल मॉडेल बनवतात. त्यामुळं असे वरिष्ठ सनदी अधिकारी आपली प्रतिमा जपण्याचा प्रयत्न करत असतात. आयएएस पूजा खेडकर यांच्याबाबत मात्र वेगळंच घडताना दिसतंय. वाचा 'ऑडी'ची कहाणी....
'ऑडी'वर 21 चलन : प्रशिक्षणार्थी सनदी अधिकारी पूजा खेडकर यांच्या गाडीनं वाहतूक नियमांचं उल्लंघन केल्याचं समोर आलं. त्यांच्या ऑडी कारवर वाहतुकीचे नियम मोडल्या प्रकरणी 21 चलन असल्याचं समोर आलं आहे. पूजा खेडकर यांची नुकतीच वाशिम जिल्ह्यात बदली करण्यात आली आहे. पुणे जिल्हा दंडाधिकारी कार्यालयात प्रशिक्षणार्थी म्हणून काम करत असताना त्यांनी नियम धाब्यावर बसून त्यांच्या खासगी ऑडी कारवर अंबर दिवा लावला होता. तसंच त्यांनी कारवर 'महाराष्ट्र शासन' असं लिहिलं होतं. तेव्हापासून पूजा खेडकर देशभरात चर्चेत आहेत. पुणे जिल्ह्यात प्रशिक्षणार्थी सहायक जिल्हाधिकारी असलेल्या पूजा खेडकर यांच्याबाबत आता धक्कादायक माहिती समोर आली. पूजा खेडकर यांच्या आलिशान ऑडी कारवर वाहतूक नियमांचे उल्लंघन केल्याबद्दल 21 दंड आकारल्याचं समोर आलं आहे.
व्हॉट्स अँपवर पाठवली नोटीस : पूजा खेडकर यांच्या बंगल्याबाहेर झाकून ठेवण्यात आलेली ऑडी कार त्या पुणे जिल्हाधिकारी कार्यालयात जाण्यासाठी वापरत होत्या. या कारवर त्यांनी 'महाराष्ट्र शासन' अशी पाटी लावली होती आणि नारंगी रंगाचा दिवा लावला होता. पोलिसांच्या मते हा वाहतूक नियमांचा भंग असून, पोलिसांनी १७७ अंतर्गत कारवाई करायचं ठरवलंय. त्यासाठी पुणे पोलीस खेडकर यांच्या बाणेर रस्त्यावरील बंगल्यासमोर आले असता पूजा खेडकर यांच्या आई मनोरमा खेडकर यांनी दरवाजा उघडण्यास नकार दिला. पुणे पोलिसांनी पूजा खेडकर यांना व्हॉट्स अँपवर नोटीस पाठवली. या नोटीशीत MH -12 AR 7000 क्रमांकाच्या या गाडीचा उपयोग नियमबाह्य पद्धतीने करण्यात आल्याने तपास करायचा आहे, असं सांगत ही गाडी चतुःश्रृंगी पोलीस ठाण्याच्या वाहतूक विभागात जमा करण्यास सांगण्यात आलंय.
मनोरमा खेडकरांनी घातला वाद : वादाच्या केंद्रस्थानी असलेल्या महिला अधिकारी पूजा खेडकर यांच्या आई मनोरमा खेडकर यांनी कारवाईसाठी गेलेल्या पोलिसांना धमकी दिली. "जर तुम्ही गेटच्या आत येण्याचा प्रयत्न केलात तर तुम्हा सर्वांना तुरुंगात टाकेन," असं त्या म्हणाल्या. यावेळी विविध माध्यमांचे प्रतिनिधीही उपस्थित होते. पूजाची आईही त्यांच्यावर धावली. त्यामुळं या कारवाईवरून पोलीस आणि पूजाच्या कुटुंबीयांमध्ये बराच वेळ वाद सुरू होता. धमकी दिल्याचा व्हिडिओ व्हायरल होत आहे.
सुविधा मागितल्यानं वाद : पूजा खेडकर 30 जुलै 2025 पर्यंत वाशिम येथे उर्वरित प्रशिक्षण कालावधी पूर्ण करणार आहेत. पूजा खेडकर या महाराष्ट्र केडरच्या IAS अधिकारी आहेत. त्यांनी UPSC परीक्षेत देशात 841 रॅंक मिळवला होता. अलीकडेच पूजा खेडकर यांनी व्हीआयपी नंबर प्लेट असलेली खासगी ऑडी कार वापरल्यानं तसंच अधिकाऱ्यांना उपलब्ध नसलेल्या सुविधा मागितल्यानं नवीन वादाला तोंड फुटलंय. या पार्श्वभूमीवर पूजा यांच्या संपत्तीची माहिती समोर आली.
अहवाल सामान्य प्रशासन विभागाला पाठवला : पुण्याचे जिल्हाधिकारी सुहास दिवसे यांनी सामान्य प्रशासन विभागाला सादर केलेल्या अहवालानुसार, "खेडकर यांनी 3 जून रोजी प्रशिक्षणार्थी म्हणून नोकरीवर रुजू होण्यापूर्वीच स्वतंत्र केबिन, कार, निवासी क्वार्टर, कॉन्स्टेबलची तरतूद करण्याची वारंवार मागणी केली." मागण्या पूर्ण करण्यासाठी पूजा खेडकर यांचे वडील निवृत्त प्रशासकीय अधिकारी यांनी जिल्हाधिकारी कार्यालयावर दबाव आणल्याचंही बोललं जात आहे.
अपंगत्व प्रमाणपत्र बनावट : UPSC परीक्षा उत्तीर्ण होण्यासाठी खेडकर यांनी बनावट अपंगत्व प्रमाणपत्र, इतर मागासवर्गीय (ओबीसी) प्रमाणपत्र सादर केल्याचा आरोप होत आहे. तसंच त्यांनी मानसिक आजाराचं प्रमाणपत्रही सादर केलं होतं, असा दावा करण्यात आला. एप्रिल 2022 मध्ये, त्यांना अपंगत्व प्रमाणपत्राच्या पडताळणीसाठी दिल्लीतील ऑल इंडिया इन्स्टिट्यूट ऑफ मेडिकल सायन्सेस (एम्स) येथे हजर राहण्यास सांगण्यात आलं होतं. परंतु त्यांनी COVID-19 संसर्गाचं कारण देत उपस्थित राहण्यास नकार दिला होता.
'हे' वाचलंत का :
- दिव्यांग असल्याचं सांगून पूजा खेडकर झाल्या IAS? खेडकर आहेत 17 कोटींची संपत्तीच्या मालकीण - IAS Officer Pooja Khedkar
- 110 एकर शेतजमीन, 7 फ्लॅट्स अन् 17 लाखाचं घड्याळ; आयएएस पूजा खेडकर यांची संपत्ती ऐकून तुम्हीही व्हाल थक्क, ऑडीवर 'इतका' दंड - pooja Khedkar Property
- दृष्टिदोष दाखवून पूजा खेडकर आयएएस, सरकारनं चौकशी करावी; सामाजिक कार्यकर्ते विजय कुंभार यांची मागणी - Pooja Khedkar IAS
