अमरावती Amravati Education News : अमरावती शहरासह विभागातील सर्वच प्रमुख शहरातील अनेक तालुक्यांच्या ठिकाणी कला, वाणिज्य, शाखेच्या पारंपरिक महाविद्यालयात विद्यार्थ्यांची प्रवेश संख्या घटली आहे. महाविद्यालयात प्रवेश घेतला तरी आम्ही महाविद्यालयात वर्षभर येणार नाही. केवळ परीक्षा देऊ, अशी अनेक विद्यार्थ्यांची भूमिका आहे. विद्यार्थ्यांची एकूण मानसिकता पाहता नवीन शिक्षण धोरण कसे यशस्वी होणार हा मोठा प्रश्न उभा ठाकला आहे. एकूणच या परिस्थितीसंदर्भात अमरावती महिला महाविद्यालयाचे प्राचार्य, डॉ. अविनाश मोहरील यांनी 'ईटीव्ही भारत' शी बातचीत केलीय.
शिकून काय अर्थ : कला शाखेतील किंवा वाणिज्य शाखेतील पारंपरिक विषय शिकून तीन वर्षाची पदवी घेतल्यावर आपल्याला कोणती नोकरी लागणार? याचा विचार विद्यार्थी करायला लागले आहेत. अगदी बारावी झाल्यावर एखाद्या मॉलमध्ये किंवा रुग्णालयात रिसेप्शनिस्ट म्हणून जॉब करताना तीन ते पाच हजार रुपये या युवक-युवतींना मिळत आहेत. त्यांच्या मोबाईल फोनचा रिचार्ज, एखादा वेळी पिझ्झा खाण्याची इच्छा पूर्ण करण्याइतपत विद्यार्थी स्वतः पैसे कमवत आहेत. गंभीर बाब म्हणजे सर्वसाधारण कुटुंबातील पालकांकडं त्यांच्या मुलांना महिन्याला काही पैसे देता येईल, इतके पैसेच नाहीत. त्यामुळं मुलांना आपल्या गरजा पूर्ण करण्यासाठी पैसे हवे आहेत. तीन वर्ष अभ्यास करून पदवी मिळवल्यावर हमखास नोकरी मिळेल का? याची शाश्वती या विद्यार्थ्यांना कोणीही देऊ शकत नाही. यामुळंच पारंपरिक शिक्षण घेऊन काय अर्थ? दुर्दैवानं असा विचार युवक करायला लागले आहेत.
नवीन शिक्षण धोरण राबवायचं कसं : नव्या राष्ट्रीय शिक्षण धोरणाची अंमलबजावणी आता पदवी अभ्यासक्रमाच्या पहिल्या वर्षापासून करायची आहे. डॉ. कस्तुरी रंगन यांच्या नेतृत्वात हे अतिशय उत्कृष्ट शिक्षण धोरण तयार झालं आहे. या नव्या राष्ट्रीय शिक्षण धोरणाद्वारे विद्यार्थ्यांना आता रोजगाराभिमुख शिक्षणाची हमी दिली जाणार आहे. एखाद्या व्यवसायात विद्यार्थी यशस्वी होऊ शकतात. याबाबत महत्त्वाचे धडे या शिक्षण पद्धतीद्वारे दिले जाणार आहेत. आज 27 ते 28 टक्क्यांवर असणारे उच्च शिक्षणातील सकल नोंदणीचे प्रमाण हे 2030 पर्यंत 50 टक्क्यांपर्यंत या धोरण अंतर्गत न्यायचे आहे. असं असताना विद्यार्थी महाविद्यालयातच आलेच नाहीत तर नव्या शिक्षण धोरणाचा उद्देश कसा यशस्वी होईल? हा मोठा गंभीर प्रश्न असल्याची चिंता डॉ. मोहरील यांनी व्यक्त केलीय.
