पुणे Tipu Sultan Memorial Issue : पुणे लोकसभा मतदारसंघात आता प्रचाराला जोरदार सुरुवात झाली असून काल एमआयएमचे उमेदवार अनिस सुंडके यांनी आम्ही जिंकलो तर पुण्यात येणाऱ्या काळात टिपू सुल्तान यांचं स्मारक उभारू, असं विधान त्यांनी केलं आहे. त्यांनी केलेल्या या विधानावर भाजपाने आक्षेप घेतला असून अनिस सुंडके यांनी केलेलं विधान हे अत्यंत चुकीचं आहे. वेळ पडल्यास भाजपा तसेच हिंदुत्ववादी संघटनेकडून तीव्र आंदोलन करू, असा इशारा यावेळी भाजपा शहराध्यक्ष धीरज घाटे सुंडके यांना दिला आहे.
ते असं वक्तव्य कसं करू शकतात? : पुण्यात भाजपाचे शहराध्यक्ष धीरज घाटे यांची पत्रकार परिषद आयोजित करण्यात आली होती. यावेळी त्यांनी आपली भूमिका मांडली. यावेळी धीरज घाटे म्हणाले की, एमआयएमचे उमेदवार अनिस सुंडके यांनी जे विधान केलं आहे ते अत्यंत चुकीचं आहे. पुणे शहर ही सांस्कृतिक राजधानी असून छत्रपती शिवाजी महाराज, शाहू, फुले, आंबेडकर यांची भूमी आहे. अशा या भूमीत अनिस सुंडके हे टिपू सुल्तान यांचं स्मारक उभारू असं वक्तव्य कसं करू शकतात? पुणे ही क्रांतिकारी, शूरवीरांची भूमी आहे. असं असताना अनिस सुंडके हे संबंध पुणेकरांचा अपमान कसा करू शकतात? असा प्रश्न घाटे यांनी उपस्थित केला.
टिपू सुल्तान हा परकीय आक्रमणकारी? : टिपू सुल्तान हा या देशाचा महापुरुष नव्हता आणि ना ही तो शूरवीर होता. टिपू सुल्तानने या देशावर आक्रमण केलं होतं. त्याने हजारो लोकांचे बळी घेतले आहे. अशा या नराधमाच्या स्मारकाची गोष्टच कशी करू शकता? त्यांनी केलेल्या अशा या वक्तव्याचा तीव्र निषेध करतो, असं यावेळी घाटे म्हणाले. पुणे शहरात गेल्या काही दिवसांपासून पुणे तसेच विकासाच्या मुद्द्यांवर निवडणुकीत बोललं जात होतं. आता टिपू सुल्तानचा मुद्दा समोर आल्यानं पुण्यात राजकीय वारे वाहू लागले आहेत. आता विकासावरून मुद्दा थेट धर्मांवरणावर गेलेला आहे.
हेही वाचा :
- "पक्ष चिन्हासारखं आमचं ग्राउंडही चोरीला गेलं, पण जनतेने निवडणूक...", रोहित पवारांचा अजित पवार गटावर हल्लाबोल - Lok Sabha Election 2024
- लोकसभा निवडणुकीच्या तिसऱ्या टप्प्यातील प्रचाराचा शेवटचा दिवस, कोल्हापुरात प्रचाराचा 'सुपर संडे' - Lok Sabha Election 2024
- ईशान्य मुंबईत संजय पाटील नावाचे 4 डमी उमेदवार, मतदारांना संभ्रमित करण्याचं हे षडयंत्र असल्याचा संजय पाटील यांचा आरोप - North East Mumbai Lok Sabha
