जालना Maratha Reservation Protest : मराठा आंदोलक मनोज जरांगे यांनी जालना इथं मराठा समाजाची बैठक घेऊन लोकसभा निवडणूक 2024 मध्ये उमेदवार देण्याविषयी निर्णय घेण्याचं जाहीर केलं होतं. मात्र लोकसभा निवडणुकीसाठी गावागावातून उमेदवार उभे न करता त्याऐवजी प्रत्येक जिल्ह्यातून उमेदवार द्यावा आणि मराठा समाजाने त्या उमेदवाराला विजयी करण्यासाठी प्रयत्नांची पराकाष्ठा करावी, असा जरांगे समर्थकांमध्ये मतप्रवाह आहे. त्यामुळे आता उमेदवार देण्याविषयीचा निर्णय 30 तारखेला जाहीर करणार असल्याचं मनोज जरांगे यांनी रविवारी झालेल्या बैठकीत जाहीर केलं. त्यामुळे अंतरवाली सराटी इथं झालेल्या बैठकीत कोणताही निर्णय झाली नसल्याची चर्चा राजकीय वर्तुळात केली जात आहे. दुसरीकडं करमाळा तालुक्यातील सभेला आंदोलक न आल्यानं मनोज जरांगे यांनी आयोजकांवर संताप व्यक्त केल्याचं वृत्त प्रसारमाध्यांतून आलं. त्यामुळेच मनोज जरांगेंनी सावध पावलं टाकत निर्णय पुढं लांबवल्याची माहिती सूत्रांनी दिली आहे.
अंतरवाली सराटीत मराठा समाजाची बैठक : मराठा आंदोलक मनोज जरांगे यांनी अंतरवाली सराटीत राज्यातील मराठा समाज बांधवांची एक निर्णय बैठक घेतली. या बैठकीमध्ये त्यांनी समाजाला बऱ्याच गोष्टीपासून प्रेरित केलं. समाजाची सुद्धा काही मतं पुढील आंदोलनाविषयी जाणून घेतले. यादरम्यान त्यांनी सरकारवर घणाघाती टीका करत "सरकारनं मराठा आरक्षणाचा प्रश्न वेळीच मार्गी लावावा, नसता येणाऱ्या निवडणुकीत हा मुद्दा सरकारसाठी घातक ठरणार आहे. हा मराठा समाज तुमचे पांढरे कपडे उतरल्याशिवाय राहणार नाही," असा इशारा सुद्धा जरांगे पाटील यांनी रविवारी आंतरवाली इथं दिला आहे.
आंदोलनाकडं फिरवली नागरिकांनी पाठ : "करमाळा तालुक्यातील मराठा आंदोलकांनी मनोज जरांगे यांच्या सभेसाठी अगोदर 19 एकर जमीन राखीव ठेवली होती. मात्र आंदोलक येणार नसल्याची चाहूल लागल्यानं आयोजकांनी ती केवळ 5 एकरवर आणली. मात्र तरीही आंदोलकांनी मनोज जरांगे यांच्या आंदोलनाकडं पाठ फिरवल्यानं सभास्थळ रिकामं राहिलं. त्यामुळे मनोज जरांगे आयोजकांवर चांगलेच संतापून त्यांनी तिथून 5 मिनिटात काढता पाय घेतला," अशी माहिती सूत्रांनी दिली. मात्र या सभेची चांगलीच चर्चा रंगली आहे.
सरकारला सत्तेची गुर्मी : "लोकसभा निवडणुकीमध्ये मराठा समाजांनी प्रत्येक समाजातील 'योग्य' व्यक्तीला उमेदवारी देऊन उभी करुन आपल्याला सरकारमध्ये पाठवायची आहे. जेणेकरुन या सरकारला जी सत्तेची गुर्मी आलेली आहे, ती आपण उतरवायची आहे. ती या मायबाप जनतेच्या पाठिंब्याशिवाय पूर्ण होणार नाही. आतापर्यंत मराठा समाजांनी नेत्यांसाठी भरपूर केलेलं आहे. आता फक्त जातीसाठी करायचे आहे. त्यामुळे मराठा बांधवांनी एक निर्णय घेत कुठल्याही पक्षाच्या उमेदवारांना पाठिंबा न देता आपण जे उमेदवार अपक्ष उभे करत आहोत, त्यांना जाहीरपणे पाठिंबा देत भरघोस मतांनी विजयी करावं," असं आवाहन यावेळी मनोज जरांगे यांनी राज्यातील जनतेला केलं आहे.
प्रत्येक गावागावात बैठका घेणार : येणाऱ्या 30 तारखेपर्यंत प्रत्येक गावागावात बैठका घेणार आहोत. या बैठकीनंतर प्रत्येक जिल्ह्यातून एक अपक्ष उमेदवार देणार आहे. यावेळी जरांगे पाटील यांनी मराठा समाजातील नेत्यांच्या कार्यकर्त्यांना आव्हान केलं आहे की तुम्ही आतापर्यंत नेत्यांसाठी भरपूर केलं. आता जातीसाठी काम करा. नेत्यांनी तुमच्या जातीचं वाटोळं केलं आहे. त्यामुळे आणखी वाटोळं होऊ नये, म्हणून समाजाच्या पाठीशी खंबीरपणे उभं राहून मराठा आरक्षणासाठी लढा द्या, असं आवाहन मनोज जरांगे यांनी केलं.
हेही वाचा :
- Lok Sabha Elections : प्रत्येक गावातून दोन उमेदवार....; मराठा युवक लोकसभा निवडणुकीच्या रिंगणात, अशी असेल रणनीती
- Manoj Jarange Patil : तर सरकारवर पश्चातापाची वेळ आणेल, मनोज जरांगे पाटलांचा सरकारला इशारा
- Maratha Kranti Morcha : जरांगेंनी सांगितल्याप्रमाणे मराठा उमेदवारांनी निवडणुकीला उभे करु नये, काही मराठा संघटनांचं मत
