बाबा सिद्दीकी यांच्या पार्थिवावर शासकीय इतमामात होणार दफन विधी; उपमुख्यमंत्र्यांची माहिती

अजित पवारांनी कूपर रुग्णालयात जात सिद्दीकी कुटुंबीयांची भेट घेतली. त्यानंतर माध्यमांशी बोलताना बाबा सिद्दीकी यांच्या पार्थिवावर शासकीय इतमामात दफन विधी होणार असल्याची माहिती त्यांनी दिली.

मुंबई : राष्ट्रवादी काँग्रेसचे पवार गटाचे नेते बाबा सिद्दीकी यांच्यावर शासकीय इतमामात दफनविधी केला जाणार असून, त्याबाबतचे शासन आदेश जारी करण्यात आल्याची माहिती उपमुख्यमंत्री अजित पवार यांनी दिली आहे. बाबा सिद्दीकी यांच्या पार्थिवाचं शव विच्छेदन कूपर रुग्णालयात करण्यात येत आहे. दरम्यान, उपमुख्यमंत्री अजित पवार यांनी कूपर रुग्णालयात जात सिद्दीकी यांच्या कुटुंबीयांची भेट घेतली. त्यानंतर त्यांनी माध्यमांशी संवाद साधला.

काय म्हणाले अजित पवार? : 2004 ते 2008 या काळात बाबासाहेब यांनी विभागाचे मंत्रीपद भूषवलंय. सोबतच त्यांनी म्हाडाचे अध्यक्ष म्हणून देखील काम केलंय. त्यांचे सामाजिक कार्य आणि राजकारणातील योगदान पाहता त्यांच्यावर शासकीय इतमामात दफन विधी केले जातील, अशी माहिती उपमुख्यमंत्री अजित पवार यांनी दिली आहे. पुढं ते म्हणाले की, "काल घडलेली घटना, ती कशी घडली यावर माझा अजिबात विश्वास बसत नाही. आमदार आणि मंत्री म्हणून त्यांचं काम खूप चांगलं होते. पोलीस या प्रकरणाचा तपास करत आहेत. पोलिसांची पथके वेगवेगळ्या राज्यात गेली आहेत. घटनेचा तपास सुरू आहे."

आरोपींना न्यायालयात हजर करणार : याबाबत अधिक माहिती अशी की, बाबा सिद्दीकी यांचे शव विच्छेदन पूर्ण झाल्यानंतर त्याचे पार्थिव अंतिम दर्शनासाठी त्यांच्या निवासस्थानी ठेवण्यात येणार आहे. तर, दुसरीकडं ताब्यात घेण्यात आलेल्या दोन आरोपींना आज न्यायालयात हजर केलं जाणार आहे. आरोपींना न्यायालयात हजर केल्यानंतर गुन्हे शाखेचे अधिकारी पत्रकार परिषद घेऊन याबाबत अधिक माहिती देणार आहेत.

हेही वाचा -