मुंबई- विधानसभेची निवडणूक मुख्यमंत्री एकनाथ शिंदे यांच्या नेतृत्वाखाली महायुतीनं लढवलीयं. यात देवेंद्र फडणवीस आणि अजित पवारांनीदेखील मोठे कष्ट घेतले. मुख्यमंत्री पदासाठी शिवसेनेकडून एकनाथ शिंदेंच नाव पुढ केले जाईल. मात्र, या विषयी अंतिम निर्णय वरिष्ठ पातळीवर घ्यायचा आहे. मनातील मुख्यमंत्री एकनाथ शिंदे असल्याची भावना राज्याचे मंत्री तथा शिवसेनेचे नेते दिपक केसरकर यांनी व्यक्त केली. ते शिर्डीत साई दर्शनानंतर माध्यमांशी बोलत होते.
- सिंधुदुर्ग जिल्ह्यात सावंतवाडी मध्ये विद्यमान शालेय शिक्षण आणि मराठी भाषा मंत्री दिपक केसरकर यांनी शिर्डीत साईबाबा दर्शन घेतले. त्यांनी लवकरच सत्तास्थापन होणार असल्याचे संकेत दिले.
ठाकरेंच्या बोलण्याला अर्थ नाही-उद्धव ठाकरेंनी बोलताना ते फडण'वीस' असतील तर आमच्याकडेदेखिल वीस (आमदार) असल्याची खोचक टिप्पणी केली होती. यावर केसरकरांनी ठाकरेंना चांगलच सुनावलंय. मंत्री केसरकर म्हणाले, " उद्धव ठाकरे निवडणुकीत शंभरी पार करू शकले नाहीत. फडणवीसांनी 130 आमदार निवडून आणले. हे काही सोपं काम नाही. त्यामुळे उद्धव ठाकरेंच्या बोलण्याला काही अर्थ नाही. शेवटी यात मोदींचा करिश्मा , फडणवीसांची मेहनत आणि एकनाथ शिंदेनी खांद्याला खांदा लावून काम केलंय. तसेच प्रेरणास्थान बाळासाहेब ठाकरे आहेत."
फडणवीसांनादेखील तसं मोठं पद द्यावं- "अगदी सामान्य व्यक्तींसाठी मुख्यमंत्री एकनाथ शिंदे गाडी थाबंवतात. आमच्या पक्षाच्या दृष्टीनं आम्ही एकनाथ शिंदेच मुख्यमंत्री व्हावेत, अशी अपेक्षा व्यक्त करतोय. त्याचबरोबर देवेंद्र फडणवीसांनादेखील तसं मोठं पद द्यावं. मात्र, मी लहान व्यक्ती आहे. शिंदे, फडणवीस आणि अजितदादा ठरवतील," असंदेखील केसरकर यांनी स्पष्ट केलंय.
साईबाबांच्या आशीर्वादानंच महायुतीला यश -अनेक विजयी उमेदवार उपमुख्यमंत्री देवेंद्र फडणवीस यांच्या सागर बंगल्यावर गेले होते. आपण शिर्डीला साईचरणी कसे आले? असे विचारले असता मंत्री दिपक केसरकर यांनी पहिले प्राधान्य साईबाबांना असल्याचं सांगितलं. साईबाबांच्या आशीर्वादानंच महायुतीला यश मिळालंय. आपण शिर्डीला येताना देवेंद्र फडणवीस यांना भेटून आल्याचं शिवसेना नेते केसरकर यांनी सांगितलं.
