मुंबई : सीबीआय कार्यालयातील ईओबी विभागात डीएसपी पदावर काम करणाऱ्या अधिकाऱ्याला सायबर गुन्हेगारांनी आर्थिक चुना लावला. सायबर चोरट्यानं या अधिकाऱ्याच्या बँक खात्यातून दोन लाख रुपये लंपास केले आहेत. याप्रकरणी तक्रारदार संजय कुमार खुल्लर (वय 59) यांनी दिलेल्या तक्रारीवरून बीकेसी पोलीस ठाण्यात गुन्हा दाखल करण्यात आला आहे. ही फसवणुकीची घटना 26 एप्रिल ते 4 मे दरम्यान घडली आहे.
पोलिसांनी तीन अज्ञात व्यक्तीविरोधात गुन्हा दाखल केला असल्याची माहिती बीकेसी पोलीस ठाण्याचे वरिष्ठ पोलीस निरीक्षक रघुनाथ कदम यांनी दिली आहे. तक्रारदार संजय कुमार खुल्लर हे गेल्या चार वर्षांपासून बीकेसी येथील सीबीआय कार्यालयात डीएसपी म्हणून काम करत आहेत.
तक्रारदार यांनी पोलिसांना दिलेल्या माहितीनुसार, 26 एप्रिल रोजी दुपारी दोन वाजून 25 मिनिटांच्या सुमारास बीकेसी येथील सीबीआय कार्यालयात काम करत असताना तक्रारदार संजय कुमार खुल्लर यांच्या मोबाईल क्रमांकावर कॉल करून आशिष शर्मा नावाच्या कथित व्यक्तीनं कॉल केला. दिल्ली पोलीस क्राईम ब्रँचचा अधिकारी असल्याची बतावणी करून तक्रारदार यांचे नाव आणि आधार कार्ड क्रमांक सांगून पडताळणी करण्यास सांगितलं. नाव आणि आधार कार्ड क्रमांक हा तक्रारदार खुल्लर यांचाच होता. त्यामुळे खुल्लर यांना तो दिल्ली गुन्हे शाखेचा अधिकारी असल्याचा विश्वास वाटला.
सायबर चोरट्यानं व्हॉट्सअपवरून केला कॉल- समोरून बोलणाऱ्या आशिष शर्मा या कथित व्यक्तीनं अधिकाऱ्याचे पार्सल दिल्ली आयजीआयजीआय एअरपोर्टवर जप्त झाल्याचं सांगितले. पार्सलमध्ये आठ पासपोर्ट, पाच बँक क्रेडिट कार्ड, 170 ग्राम एमडी, चार किलो क्लोन्ज आणि 45 हजार रुपये रोख रक्कम असल्याचं समोरच्या व्यक्तीनं सांगितलं. त्यावर तक्रारदार यांनी ते पार्सल स्वतःचं नसल्याचं सांगितलं. सायबर गुन्हेगारांनी फसवणुकीकरिता जाळे टाकण्यास पुन्हा सुरुवात केली. तक्रारदार यांच्या व्हाट्सअपवर हॅलो दिल्ली क्राइम ब्रांचअसा मेसेज आला. त्यानंतर व्हाट्सअप मोबाईल क्रमांकावरून त्यांचा कॉल आला. त्यावर दिल्ली पोलीसचा लोगो होता. या आलेल्या कॉलवर सायबर चोरटा हा तक्रारदाराशी एकूण 49 मिनिटे बोलला.
व्हॉट्सअपवरच दिली बनावट नोटीस- तक्रारदार यांनी स्वतःचे आधार कार्ड कोणाला दिले? असे सांगून त्यानं समोरून अधिकाऱ्याला धमकी देण्यास सुरुवात केली. त्यानंतर मनी लाँड्रिंगच्या गुन्ह्यामध्ये अटक करणार असल्याचीदेखील भीती दाखवण्यात आली. व्हाट्सअपवरून व्हिडिओ कॉलवर तक्रारदार यांचे आयकार्ड आणि आधार कार्ड तपासून दिल्ली पोलिसांच्या नावे व्हाट्सअपवरच नोटीस पाठविली. अशाप्रकारे सीबीआय अधिकाऱ्याला जास्तीत जास्त घाबरवण्यात आले. त्यानंतर समोरील अज्ञात व्यक्तींनी दिल्ली पोलिसांची वर्दी घालून तक्रारदार यांना व्हिडिओ कॉल करून भीती दाखवली.
पैसे न मिळाल्यानं पोलिसात केली तक्रार- 28 एप्रिल रोजी तक्रारदार यांना या प्रकरणात आरबीआय पडताळणी करणे आवश्यक असल्याचं सांगून अज्ञात व्यक्तीनं त्यासाठी तीन लाख 15 हजार रुपये भरणे गरजेचं असल्याचं सांगितलं. आरबीआयचे व्हेरिफिकेशन झाल्यावर तक्रारदार यांचे पैसे परत मिळणार असल्याचीदेखील आरोपींनी बतावणी केली. अज्ञात व्यक्तींच्या बोलण्यावर विश्वास ठेवून सीबीआयच्या अधिकाऱ्यानं 30 एप्रिल रोजी दोन लाख रुपये पाठवले. दोन दिवसांनी चोरट्यांनी सीबीआय अधिकाऱ्याला कॉल करून आधार कार्ड वापरणाऱ्या व्यक्तीला अटक केल्याचं सांगितलं. तसेच भरलेली दोन लाख रुपये रक्कम परत मिळेल, अशी थाप मारली. 4 मेपर्यंत भरलेले पैसे परत न आल्यानं हा सायबर गुन्हा असल्याचं त्यांच्या लक्षात आलं. सायबर गुन्ह्यांचे प्रमाण वाढत असताना आता थेट सीबीआय अधिकाऱ्यालाच लक्ष्य करण्यात आलं. त्यामुळे सायबर गुन्ह्याबाबत प्रत्येकानं जागरुक राहण्याची गरज व्यक्त होत आहे.
हेही वाचा-
