मुंबई Railway Extension Project : तांत्रिक बिघाड झाल्यानं मध्य रेल्वेच्या गाड्या उशिरानं धावण्याच्या बातम्या नेहमीच्या झाल्या आहेत. कधी सिग्नल यंत्रणेत बिघाड, तर कधी पॉइंट फेल, पावसाळ्यात ट्रॅक उखडणे, अशी अनेक कारणं रेल्वेच्या उशिरा धावण्यामागे असतात. मात्र, आता मुंबईकरांना अधिक सुखकर, विना अडथळा सेवा देण्यासाठी मध्य रेल्वे विविध उपक्रम राबवत आहे. याचाच एक भाग म्हणून रेल्वेनं मार्ग विस्तार प्रकल्प पुन्हा एकदा हाती घेतला आहे.
रेल्वेच्या 5 व्या तसंच 6 व्या मार्गिकेच्या कामाला लवकरच सुरुवात केली जाणार असल्याची माहिती रेल्वे प्रशासनानं दिली आहे. या प्रकल्पासाठी रेल्वेला अधिकची जागा लागणार आहे. साठी त्यासाठी केंद्र सरकारकडं आणि राज्य सरकारकडं काही खासगी जागांची मागणी रेल्वेनं केली आहे. यातील काही जागांवर अतिक्रमण असल्यानं ते काढून जागा हस्तांतरित करावी, अशी मागणी देखील रेल्वेनं सरकारकडं केल्याची माहिती मिळत आहे.
वाहतुकीत मोठ्या प्रमाणात बदल : नव्या प्रकल्पामुळं मध्य रेल्वेच्या सध्या सुरू असलेल्या वाहतुकीत मोठ्या प्रमाणात बदल होण्याची शक्यता आहे. याबाबत अधिक माहिती अशी की, मध्य रेल्वेची पाचवी तसंच सहावी मार्गिका सध्या कुर्ला ते कल्याण अशी सुरू आहे. मात्र, कुर्ला ते छत्रपती शिवाजी महाराज टर्मिनसपर्यंत अद्याप पाचव्या आणि सहाव्या मार्गिकेचं काम सुरू झालेलं नाही. मध्य रेल्वेनं सीएसएमटी आणि परळ दरम्यान पाचवी-सहावी लाईन टाकण्याची योजना पुढं नेली तर हार्बर लाईनपर्यंतची सेवा सँडहर्स्ट रोडपर्यंतच चालवली जाऊ शकते. याबाबतची चाचपणी सध्या मध्य रेल्वेची टीम करत आहे. या प्रस्तावाला मंजूरी मिळाल्यास सीएसएमटी ते मस्जिद स्थानकादरम्यानचा हार्बर प्लॅटफॉर्म आणि ट्रॅक नवीन सीएसएमटी-परळ मार्गासाठी वापरला जाईल. याव्यतिरिक्त, नवीन ट्रॅकसाठी जागा तयार करण्यासाठी भायखळा येथील जलद कॉरिडॉर प्लॅटफॉर्म पाडवा लागण्याची शक्यता रेल्वे प्रशासनानं वर्तवली आहे.
हार्बर लाइनसाठी पर्यायी प्रस्ताव : जवळपास 10 वर्षांपूर्वी मध्य रेल्वेनं डॉकयार्ड रोड ते इस्टर्न फ्रीवेपर्यंत हार्बर लाइनसाठी पर्यायी संरेखन प्रस्तावित केलं होतं. कुर्ला ते सीएसएमटी या लाईन्स वापरण्यासाठी मस्जिद आणि सँडहर्स्ट रोड स्थानकांजवळ जागा मोकळी करणे हा उद्देश होता. मुख्य आणि हार्बर दोन्ही मार्गांसाठी इंटरचेंज पॉइंट प्रदान करण्यासाठी प्रार्थनास्थळ आणि सँडहर्स्ट रोड येथे दोन स्थानके बांधण्याचा प्रस्ताव होता. सीएसएमटी येथे, विद्यमान प्लॅटफॉर्म 17 आणि 18 च्या बाजूला आणखी दोन नवे फलाट बांधून हार्बर लाईन तिकडं वळवण्याचा प्रस्ताव होता. मात्र, पोर्ट ट्रस्टनं जमीन देण्यास स्वारस्य न दाखवल्यानं आणि मेट्रो-4 कॉरिडॉर (वडाळा-ठाणे) सारखे प्रस्ताव आल्यानं तसं झालं नाही.
मध्य रेल्वेचा होणार विस्तार : मुंबई नागरी वाहतूक प्रकल्प-2 अंतर्गत मध्य रेल्वेवरील पायाभूत सुविधांच्या विस्ताराची योजना 2008 मध्ये मंजूर करण्यात आली होती. सध्या कल्याण आणि एलटीटी : मुख्य मार्गावर कल्याण आणि एलटीटी दरम्यान सहा मार्गिका अस्तित्वात आहेत. दोन स्लो ट्रॅक आणि दोन फास्ट ट्रॅक (अप आणि डाऊन, दोन्ही मार्ग, सर्व उपनगरीय सेवांसाठी), लांब पल्ल्याच्या एक्सप्रेस गाड्यांसाठी दोन ट्रॅक (अप आणि डाऊन, दोन्ही मार्ग) असे एकूण सहा ट्रॅक आहेत. कुर्ला ते सीएसएमटी या मुख्य मार्गावर चार मार्गिका आहेत. दोन स्लो आणि दोन फास्ट मार्गिका असे एकूण चार ट्रॅक आहेत.
कुर्ला ते परळ दरम्यान विस्तार : मिळालेल्या माहितीनुसार, या कामाचा प्रस्ताव रेल्वेनं मंत्री अश्विनी वैष्णव यांना दिला आहे. या प्रस्तावांवर गांभीर्यानं विचार केला जात असल्याची माहिती मिळत आहे. योजना पुढं गेल्यास, सीएसएमटी येथील सर्व उपनगरीय प्लॅटफॉर्म 1 ते 7 हे मेन लाईन सेवांसाठी वापरले जातील. सध्या कल्याण-एलटीटी दरम्यान पाचवी-सहावी मार्गिका आहेत. कुर्ला ते परळ दरम्यान विस्तार करण्याचं काम सुरू आहे. "परळ-सीएसएमटी दरम्यानच्या अलाइनमेंटमध्ये भूसंपादन हा मोठा प्रश्न आहे. यातील काही अस्थापनांच्या जागेवर अतिक्रमण असून, या प्रकल्पासाठी जागा हस्तांतरित करताना सरकारनं अतिक्रमण काढून त्यांचं पुनर्वसन करून रेल्वेला जागा हस्तांतरित करावी," अशी मागणी केल्याची माहिती मध्य रेल्वेचे मुख्य जनसंपर्क अधिकारी डॉक्टर स्वप्निल नीला यांनी दिली आहे.
हे वाचलंत का :
- मुंबईला पहिली रेल्वे आणि इंग्रजी शिक्षणसंस्था देणाऱ्या नाना शंकरशेठ यांची आज पुण्यतिथी; त्यांच्या कार्याचा आढावा - Nana Shankarsheth Death Anniversary
- पुणतांबा रेल्वे स्थानक 'जंक्शन' असूनही रेल्वेला थांबा नाही; स्वातंत्र्यदिनी 'रेल्वे रोको' आंदोलनाचा दिला इशारा - Puntamba Junction
- वेटींग तिकिटावर स्लीपरमध्ये प्रवास करत असाल सावधान! रेल्वेनं लागू केले 'हे' नियम - Railway ticket news
