मुंबई विमानतळावर खेळण्यांमधून आणलेला १.९५ कोटींचा गांजा केला जप्त - Cannabis Seized

Cannabis Seized : गांजा तस्करी प्रकरणी मुंबईतील छत्रपती शिवाजी महाराज आंतरराष्ट्रीय विमानतळावर महसूल गुप्तचर संचालनालयाने एका महिलेला अटक केली आहे. फिझा जावेद खान (वय ३७) असं महिलेचं नाव आहे. तिला न्यायालयाने 14 दिवसांची न्यायालयीन कोठडी सुनावली आहे.

मुंबई Cannabis Seized : मुंबईतील छत्रपती शिवाजी महाराज आंतरराष्ट्रीय विमानतळावर बँकॉक ते मुंबई या इंडिगो एअरलाईन्सच्या फ्लाईटमधून आलेल्या महिलेकडे ४२७३ ग्राम गांजा आढळून आल्याने या महिलेला महसूल गुप्तचर संचालनालयाने (एआययू) अटक केली आहे. अटक महिलेचे नाव फिझा जावेद खान (वय ३७) असं असून तिला आज न्यायालयात हजर केले असता न्यायालयाने १४ दिवसांची न्यायालयीन कोठडी सुनावली आहे. जप्त गांजाची किंमत १ कोटी ९५ लाख रुपये इतकी आहे.

हिरवा पदार्थ ड्रग्ज असल्याचं उघडकीस : याप्रकरणी एनडीपीएस कायदा कलम २१(ब), २३(ब), २८, २९, ३०, ३५ आणि ५४ अन्वये गुन्हा दाखल करण्यात आला आहे. आरोपी फिझा जावेद खान ही बँकॉकहून मुंबईला आली होती. तिच्याकडे निळ्या आणि ग्रे रंगाची ट्रॉली बॅग होती. तिच्याकडे असलेल्या निळ्या रंगाच्या ट्रॉली बॅगेत कपडे, काही वैयक्तिक सामान आणि ९ प्लास्टिक ट्रान्सपरंट पिशव्या आढळून आल्या. या ट्रान्सपरंट प्लास्टिक पिशव्यांमध्ये हिरव्या रंगाचा काही पदार्थ सापडल्याने तेथे हजर असलेल्या एआययूच्या अधिकाऱ्यांनी नार्कोटिक ड्रग फिल्ड टेस्टिंग किटने सापडलेल्या हिरव्या पदार्थाची चाचणी केली. या चाचणीचा अहवाल पॉझिटिव्ह आल्याने प्लास्टिकच्या ट्रान्सपरंट पिशवीतील हिरवा पदार्थ ड्रग्ज असल्याचं उघडकीस आलं.

खेळण्याच्या बॉक्समधून आणला गांजा : नऊ पैकी एका प्लास्टिक पिशवीतील हिरव्या पदार्थाची चाचणी केल्यानंतर उरलेल्या आठ प्लास्टिक पिशव्यांमधील हिरव्या पदार्थाची चाचणी अधिकाऱ्यांकडून करण्यात आली. या नऊ प्लास्टिक पिशव्यांमध्ये एकून ४ हजार २७३ ग्राम गांजा होता. त्याची किंमत १ कोटी ९५ लाख रुपये इतकी आहे. हा गांजा आरोपी महिला अन्न पदार्थ आणि खेळण्यांच्या बॉक्समधून लपवून बँकॉकहून मुंबईत घेऊन आली होती. या महिलेला १३ जुलैच्या मध्यरात्री ताब्यात घेऊन पुढील कारवाई करण्यात आली आहे. फिझा खान या महिलेला अटक करून न्यायालयात हजर केले असता न्यायालयाने १४ दिवसांची न्यायालयीन कोठडी सुनावली आहे.

हेही वाचा: