पुणे : राज्यात आणि पुणे शहरात मोठ्या प्रमाणावर नागरिकांकडून वाहतुकीचे नियम पळताना दिसून येत नाहीत. या वाहतुकीचे नियम न पाळणाऱ्या लोकांमुळं वाहतूक कोंडी होते. वाहतुकीचे नियम सर्वांनी पाळावे तसेच जे लोक वाहतुकीचे नियम पाळणार नाहीत, अश्या लोकांना आता पाच हजार रुपये दंड करण्याचा सरकारचा विचार असल्याची माहिती उपमुख्यमंत्री अजित पवार (Ajit Pawar) यांनी दिली. अजित पवार आज पुणे दौऱ्यावर होते. यावेळी त्यांनी बेशिस्त वाहन चालकांवर कठोर कारवाईचे संकेत दिले.
५ हजार रुपये लावणार दंड : "दोन दिवसांपूर्वी पुण्यातील सर्किट हाऊस येथे सर्वच अधिकाऱ्यांची बैठक झाली आहे. ही बैठक वाहतुकीच्या संदर्भात होती. अनेक वेळा लोकांकडून वाहतुकीचे नियम पाळले जात नाहीत. अश्या लोकांना दंड जास्त लावला पाहिजे, असं काहींनी लक्षात आणून दिलं. लोकसभेत याबाबत देखील चर्चा झाली. जर ५ हजार दंड लावला तर लोकांना शिस्त लागेल. पण याला कायदा हा सेंट्रल गव्हर्मेंटचा लागतो. केंद्रीय मंत्री नितीन गडकरी यांची ही मानसिकता आहे. वाहतूक कोंडी सुरळीत होण्यासाठी अनेक टोल हे काढले आहेत. तर काही टोल हे पुढच्या काळात काढले देखील जाणार आहे," असं अजित पवार म्हणाले.
पुरंदर एअरपोर्टबाबत बैठक : पुण्यातील पुरंदर येथील एअरपोर्टबाबत अजित पवार म्हणाले की, "पुरंदर एअरपोर्टबाबत बैठक झाली आहे. कुठलाही एखादा प्रकल्प करताना लोकांचा विचार करावा लागतो. पुढील अनेक वर्षांचा विचार करून काम करायला लागणार आहे. लवकरच या सगळ्या गोष्टी होणार आहेत."
बीड प्रकरणात न्यायालयीन चौकशी सुरू : बीड प्रकरणाबाबत अजित पवार म्हणाले की, "मुख्यमंत्री देवेंद्र फडणवीस यांनी या प्रकरणात माहिती दिली आहे. एसआयटी, सीआयटी आणि न्यायालयीन चौकशी सुरू आहे. जे कोणी दोषी असतील, त्यावर कारवाई करण्यात येईल. याबाबत सगळी चौकशी सुरु आहे. बीड प्रकरणात जे कोणी दोष असतील, त्यांच्यावर कारवाई केली जाणार आहे".
हेही वाचा -
- 21 पुणेकरांचा नवा रेकॉर्ड; 'पराक्रम' जाणून तुम्हीसुद्धा घालताल तोंडात बोटं - Pune Traffic Rules Fines
- पुणेकरांनो सावधान...! वाहतूक पोलिसांनी घेतलेल्या 'या' निर्णयामुळं तुमचं ड्रायव्हिंग लायसेन्स होऊ शकतं रद्द - Pune Police
- पुण्यात पालखी सोहळ्याच्या अनुषंगानं वाहतुकीत बदल, वाहतूक पोलिसांनी दिली माहिती - Pune Traffic Changes
