पुणे Pune Porsche Accident Case : पुणे अपघात प्रकरणी रक्ताच्या नमुन्यात फेरफार केल्याप्रकरणी राज्य सरकारनं कारवाईला सुरवात केलीय. आरोपीच्या रक्ताचे नमुने कचऱ्यात फेकून देणारे डॉ. अजय तावरे तसंच डॉ. श्रीहरी हाळनोर यांना निलंबित करण्यात आलं आहे. शिवाय बीजे मेडिकल कॉलेजचे अधिष्ठाता डॉ. विनायक काळे यांनाही तत्काळ सक्तीच्या रजेवर पाठवण्यात आलं आहे. त्यांच्या जागी अहिल्यादेवी होळकर शासकीय वैद्यकीय महाविद्यालय, बारामतीचे अधिष्ठाता डॉ. चंद्रकांत म्हस्के यांच्याकडं अतिरिक्त पदभार सोपवण्यात आलाय.
दोषींना धडा शिकवणार : ससून रुग्णालयातील रक्ताच्या नमुन्यात हेराफेरी केल्याप्रकरणी नेमलेल्या समितीचा अहवाल आलाय. यातील काही प्राध्यपाकांना सक्तीच्या रजेवर पाठवण्यात आलं आहे. ही गंभीर बाब असून त्यांच्यावर कारवाई सुरुच आहे. यापुढं कोणत्याही सरकारी रुग्णालयात, असा प्रकार होणार नाही याची काळजी घेतली जाईल. दोषी असलेल्यांवर कडक कारवाई केली जाईल. या संपूर्ण प्रकरणाची दखल आम्ही घेतली आहे. या प्रकरणात संपूर्ण चौकशी करून दोषींना धडा शिकवला जात नाही तोपर्यंत आम्ही स्वस्थ बसणार नाही. डॉ. अजय तावरे तसंच डॉ. श्रीहरी हाळनोर या दोघांनाही निलंबित करण्यात आलं आहे. या घटनेची मला 26 तारखेला माहिती मिळालीय. त्याचवेळी मी म्हणालो की, रक्ताचा नमुना बदलणं, ही अत्यंत दुर्दैवी घटना आहे. लोकांचा आमच्यावर विश्वास आहे. यापुढं अशा घटना घडू नयेत, अशा सूचनाही मी दिल्याचं वैद्यकीय शिक्षण मंत्री हसन मुश्रीफ यांनी म्हटलंय.
आरोपीच्या वडिलांचे तावरेंना 14 फोन कॉल्स : घटनेच्या वेळी अल्पवयीन आरोपी दारूच्या नशेत होता, हे सिद्ध होऊ नये म्हणून डॉ. तावरे यांनी लाच घेतली. त्यानंतर त्यांनी अल्पवयीन आरोपीच्या रक्ताचे नमुने बदलले, असा आरोप त्यांच्यावर करण्यात आला आहे. पुण्यातील पोर्शे कार अपघाताबाबत रोज नवनवीन अपडेट्स येत आहेत. आरोपी अल्पवयीन मुलाचे वडील विशाल अग्रवाल यांनी 14 फोन कॉल्स तावरेंना केल्याची माहिती पोलिसांनी दिली आहे. रक्ताचे नमुने बदलत असताना अजय तावरे हा अल्पवयीन मुलाच्या वडिलांशी सतत बोलत होता, असं पुणे पोलिसांचं म्हणणं आहे. आत्तापर्यंत या प्रकरणात स्थापन करण्यात आलेल्या समितीनं आपला अहवाल सरकारकडं सादर केला आहे. या प्रकरणात डॉ. अजय तावरे, विभागप्रमुख, फॉरेन्सिक सायन्स तसंच डॉ. श्रीहरी हाळनोर, वैद्यकीय अधिकारी, बी.जे. शासकीय वैद्यकीय महाविद्यालय, ससून रुग्णालय, पुणे यांच्यावर कारवाईची शिफारस करण्यात आली आहे.
हे वाचलंत का :
- पुणे हिट अँड रन प्रकरण: "आमदारकी कशी आणि कुठे वापरायची हे कळतं का?'...; अजित दादांनी 'त्या' आमदाराला झापलं... - Pune Hit And Run Case
- पुणे हिट अ‍ॅंड रन प्रकरण : डॉ अजय तावरे आणि डॉ हाळनोर यांच्या जीवाला धोका; सुषमा अंधारेंचा दावा - pune hit and run case
- पुणे पोर्शे कार अपघात प्रकरण ; अल्पवयीन आरोपीच्या वडिलांसह आजोबाला कोठडी, जाणून घ्या काय आहे अपघाताची ए टू झेड कहाणी - Pune Porsche Accident Case
