जळगाव Indian Students Drown In Russian River : रशियात शिकणाऱ्या जिल्ह्यातील तीन तरुणांचा वोल्खोव्ह नदी किनाऱ्यावर शहरात समुद्रात बुडून मृत्यू झाल्यानं मोठी हळहळ व्यक्त करण्यात येत आहे. हे विद्यार्थी रशियातील यारोस्लाव-द-वाईज नोव्हगोरोड स्टेट युनिव्हर्सिटीजमध्ये वैद्यकीय शाखेत शिकत होते. नदी किनाऱ्यावर फिरत असताना त्यांचा वाहत गेल्यानं मृत्यू झाला. जळगावचे जिल्हाधिकारी आयुष प्रसाद यांनी रशिया येथील दुतावासातील कुमार गौरव ( आयएफएस ) यांच्याशी संपर्क करून सर्व माहिती जाणून घेतली. निवासी जिल्हाधिकारी सोपान कासार यांनी पालकांना तिथल्या प्रशासनाशी संपर्क करुन दिला आहे.
समुद्र किनाऱ्यावर फिरायला गेल्यानंतर बुडाले विद्यार्थी : प्राथमिक माहिती नुसार हर्षल अनंतराव देसले ( भडगाव ), झिशान अश्पाक पिंजारी, जिया फिरोज पिंजारी ( अंमळनेर ) येथील विद्यार्थी रशियाच्या यारोस्लाव-द-वाईज नोव्हगोरोड स्टेट युनिव्हर्सिटीजमध्ये वैद्यकीय शिक्षण घेत होते. हे तिघं आणि त्यांचे सहकारी विद्यार्थी त्यांच्या अभ्यासाच्या मोकळ्या वेळेत संध्याकाळी वोल्खोव्ह नदीच्या किनारी फेरफटका मारत होते. त्यावेळी ही अनपेक्षित घटना घडल्याची माहिती सूत्रांनी दिली. सध्या रशियन फेडरेशनमधील सर्व संबंधित एजन्सीं पुढील कार्यवाही करत आहेत.
रशियातील भारतीय दुतावासानं घेतली घटनेची दखल : जिल्हाधिकारी आयुष प्रसाद यांनी तातडीनं विदेश मंत्रालयाशी संपर्क करुन रशियातील भारतीय दुतावासातील अधिकाऱ्यांचे संपर्क क्रमांक मिळवले. रशियातील भारतीय उच्चाधिकाऱ्यांशी संपर्क करुन त्यांना घटनेची माहिती देण्यात आली. भारतीय दुतावासानं संबंधित विद्यापीठाशी संपर्क करून माहिती जाणून घेतल्याचं सांगितलं आहे. पुढील कार्यवाही सुरु आहे. पालकांना पूर्ण ते सहकार्य करण्याची विनंती जिल्हा प्रशासनानं भारतीय दुतावासाच्या अधिकाऱ्यांना केली आहे.
हेही वाचा :
