कोल्हापूर Accident On Nipani Devgad Highway : भरधाव ट्रकची बोलेरो गाडीला धडक बसून झालेल्या भीषण अपघातात तीन तरुणांचा मृत्यू झाला. ही धक्कादायक घटना निपाणी-देवगड राज्यमार्गावर मंगळवारी मध्यरात्री घडली. या अपघातात कोल्हापूर जिल्ह्यातील सोळांकूर इथल्या तीन तरुणांचा मृत्यू झाला. शुभम चावरे, आकाश परीट आणि रोहन लोहार अशी अपघातात ठार झालेल्या तरुणांची नावं आहेत. ऐन गणेशोत्सवात तीन तरुणांचा मृत्यू झाल्यानं सोळांकूर गावावर शोककळा पसरली आहे. बेदरकारपणे ट्रक चालवून तिघांच्या मृत्यूला कारणीभूत ठरलेल्या कर्नाटकमधील यादगीर इथला ट्रकचालक गड्याप्पा परशुराम राठोड याच्यावर राधानगरी पोलिसात गुन्हा दाखल करण्यात आला आहे. त्याला पकडण्यात पोलिसांना यश आलं आहे.
मंगळवारी मध्यरात्री निपाणी-देवगड राज्यमार्गावरील सोळांकूर- मांगेवाडी गावच्या हद्दीत हा भीषण अपघात घडला. चालकाविरोधात गुन्हा दाखल करण्यात आला असून चालकाला पोलिसांनी ताब्यात घेतलं आहे. या प्रकरणाचा अधिक तपास सुरू आहे. - संतोष गोरे, पोलीस निरीक्षक, राधानगरी
भरधाव ट्रक आणि बोलेरोच्या अपघातात तीन तरुण ठार : कोल्हापुरातील राधानगरी तालुक्यातील सोळांकूर-मांगेवाडी गावच्या हद्दीत मंगळवारी मध्यरात्री निपाणी देवगड राज्य मार्गावर हा भीषण अपघात झाला. या अपघातात सोळांकूर गावच्या तीन तरुणांचा मृत्यू झाला असून अन्य चौघं गंभीर जखमी झाले आहेत. मृतांमध्ये शुभम चावरे, आकाश परीट आणि रोहन लोहार या ऐन विशीतील तरुणांचा समावेश आहे. या घटनेत ऋत्विक पाटील, भरत पाटील, सौरभ तेली, संभाजी लोहार हे चौघं गंभीर जखमी झाले असून त्यांच्यावर खासगी रुग्णालयात उपचार सुरू आहेत.
भीषण अपघातानंतर ट्रकचालकानं काढला पळ : भीषण अपघात होऊनही ट्रकचालकानं मदत न करता घटनास्थळावरुन पोबोरा केला. या प्रकरणी बेदाकारपणे ट्रक चालवल्याप्रकरणी राधानगरी पोलिसात अज्ञात ट्रकचालकाविरोधात गुन्हा दाखल करण्यात आला आहे. राधानगरी पोलिसांनी या ट्रक चालकाचा शोध घेत त्याला ताब्यात घेतलं आहे. ऐन गणेशोत्सव काळात गावातील तीन तरुणांना अपघातात जीव गमवावा लागल्यानं राधानगरी तालुक्यासह सोळांकूर गावावर शोककळा पसरली आहे.
कुटुंबीयांनी फोडलेला हंबरडा जीव हेलावणारा : सध्या सर्वत्र गणेशोत्सव सुरू असून उत्साहाचं वातावरण आहे. मात्र सोळांकूर गावची आजची सकाळ अतिशय दुःखद झाली. मध्यरात्री अपघात घडल्यानंतर अपघातस्थळी पडलेला रक्ताचा सडा आणि मृतदेहांची झालेली छिन्नविछिन्ह अवस्था पाहून अनेक गावकरी हेलावले. शवविच्छेदनानंतर आज सकाळीच तीनही मृतदेह गावात आणल्यानंतर मृतांच्या कुटुंबीयांनी फोडलेला हंबरडा जीव हेलावणारा होता. सोळांकूर गावात ऐन गणेशोत्सव काळात स्मशान शांतता पाहायला मिळाली.
हेही वाचा :
