लखनऊ IPL 2024 LSG vs CSK : आयपीएल 2024 च्या 34 व्या सामन्यात लखनऊ सुपर जायंट्स (LSG) नं चेन्नई सुपर किंग्स (CSK) चा आठ गडी राखून पराभव केलाय. लखनऊ येथील भारतरत्न श्री अटलबिहारी वाजपेयी इकाना क्रिकेट स्टेडियमवर शुक्रवारी झालेल्या या सामन्यात चेन्नईनं यजमान संघाला विजयासाठी 177 धावांचं लक्ष्य दिलं होतं जे त्यांनी 19व्या षटकाच्या शेवटच्या चेंडूवर पूर्ण केलं. यासह लखनऊचा हा सात सामन्यांमधला चौथा विजय होता, तर दुसरीकडं चेन्नईचा सात सामन्यांमधला हा तिसरा पराभव ठरलाय.
राहुल आणि डी कॉकची शतकीय भागिदारी : लक्ष्याचा पाठलाग करणाऱ्या लखनऊ संघाला कर्णधार केएल राहुल आणि क्विंटन डी कॉकनं शानदार सुरुवात करुन दिली. राहुल आणि डी कॉकमध्ये 15 षटकात 135 धावांची भागीदारी झाली. या भागीदारीनं सामना पूर्णपणे लखनऊच्या बाजूनं वळवला. राहुलनं 53 चेंडूत 9 चौकार आणि तीन षटकारांसह सर्वाधिक 82 धावा केल्या. तर डी कॉकनं 43 चेंडूत 54 धावांची खेळी केली. डी कॉकनं आपल्या खेळीत 5 चौकार आणि एक षटकार लगावला. तर निकोलस पूरन 23 आणि मार्कस स्टोइनिस 8 धावांवर नाबाद राहिले.
चेन्नईची समाधानकारक धावसंख्या : तत्पूर्वी, नाणेफेक गमावून प्रथम फलंदाजी करताना चेन्नई सुपर किंग्जनं 6 गडी गमावून 176 धावा केल्या. सीएसकेकडून रवींद्र जडेजानं सर्वाधिक 57 धावांची नाबाद खेळी केली. जडेजानं 40 चेंडूंच्या खेळीत पाच चौकार आणि एक षटकार लगावला. अजिंक्य रहाणेनं 36 धावांची तर मोईन अलीनं 30 धावांची तुफानी खेळी केली. शेवटी महेंद्रसिंग धोनीनंही 9 चेंडूत नाबाद 28 धावा केल्या. धोनीनं आपल्या खेळीत तीन चौकार आणि दोन षटकार मारले. लखनऊकडून कृणाल पांड्यानं सर्वाधिक तीन बळी घेतले. तर मोहसिन खान, मार्कस स्टॉइनिस, रवी बिश्नोई आणि यश ठाकूर यांना प्रत्येकी एक विकेट मिळाली.
दोन्ही संघाच्या अंतिम एकादशमध्ये बदल : या सामन्यासाठी लखनऊ सुपर जायंट्सनं न्यूझीलंडचा वेगवान गोलंदाज मॅट हेन्रीला आपल्या संघात समाविष्ट केलं. हेन्रीनं शमर जोसेफची जागा घेतली. तर दुसरीकडं चेन्नईनं आपल्या संघात काही बदल केले. त्यात डॅरिल मिशेलच्या जागी इंग्लंडचा अष्टपैलू मोईन अलीला संधी मिळाली. तर शार्दुल ठाकूरच्या जागी दीपक चहरला संधी मिळाली.
हेही वाचा :
