मुंबई MNS on Assembly Election : आगामी विधानसभा निवडणूक स्वबळावर लढवण्याचा निर्णय महाराष्ट्र नवनिर्माण सेनेनं घेतला आहे. लोकसभा निवडणुकीत महायुतीला साथ दिल्यानंतर राज ठाकरे यांनी पुन्हा एकदा 'एकला चलो रे'ची भूमिका घेतली आहे. त्यामुळं राज्यात मनसे किमान 200 जागा लढवण्याची शक्यता मनसे नेते वैभव खेडेकर यांनी व्यक्त केली.
पदाधिकाऱ्यांच्या बैठकीत नारा : लोकसभा निवडणुकीत राज्यात महायुतीला मदत करत नरेंद्र मोदी हे पंतप्रधान व्हावेत यासाठी आपण साथ देत असल्याचे मनसे अध्यक्ष राज ठाकरे यांनी स्पष्ट केलं होतं. त्यानुसार त्यांनी महाराष्ट्रात महायुतीसाठी प्रचार सभाही घेतल्या. मात्र, आता विधानसभा निवडणुकांसाठी महायुतीसोबत न जाता पुन्हा एकदा स्वबळावर निवडणूक लढवण्याचा नारा मनसे अध्यक्ष राज ठाकरे यांनी मुंबईतील 'शिवतीर्थ' इथं झालेल्या बैठकीत पदाधिकाऱ्यांना दिला. मुंबईतील शिवतीर्थ या मनसेच्या कार्यालयात झालेल्या बैठकीला राज्यातील मनसेचे जिल्हास्तरीय पदाधिकारी मोठ्या संख्येनं उपस्थित होते. यावेळी राज्यातील 288 विधानसभा मतदारसंघांचा आढावा घेण्यात आला असून हा आढावा घेतल्यानंतर राज्यात मनसेसाठी अनुकूल वातावरण असल्याचं समोर आलं आहे, असं खेडेकर यांनी सांगितलं.
200 जागा लढवण्याचा निर्धार : दरम्यान राज्यात असलेली परिस्थिती पाहता 288 पैकी किमान 200 जागा महाराष्ट्रात लढवण्याचा निर्णय या बैठकीत घेण्यात आला. त्यासाठी आम्ही कार्यकर्ते तयार असून मतदारसंघातील आढाव्यासाठी राज ठाकरे यांनी प्रत्येक जिल्ह्यात निरीक्षक नेमले होते. या निरीक्षकांनी दिलेल्या अहवाला नंतरच राज ठाकरे यांनी हा निर्णय घेतल्याचं खेडेकर यांनी सांगितलं. दरम्यान विधानसभा निवडणुकींच्या पार्श्वभूमीवर राज ठाकरे पुन्हा एकदा महाराष्ट्राचा दौरा करणार आहेत. ऑगस्टच्या पहिल्या आठवड्यापासून या दौऱ्याला राज्यभरात सुरुवात होणार असून येत्या 25 तारखेला मुंबईतील रंग शारदा इथं महाराष्ट्र नवनिर्माण सेनेचा भव्य मेळावा होणार आहे. या मेळाव्यातच सर्व कार्यकर्ते आणि पदाधिकारी यांच्या उपस्थितीत राज ठाकरे विधानसभा निवडणुकीच्या प्रचाराचा नारळ फोडतील, असंही वैभव खेडेकर यांनी सांगितलं.
हेही वाचा :
