कनौजमध्ये मोठा अपघात: इमारतीचं छत कोसळलं, अनेक कामगार ढिगाऱ्याखाली दबल्याची भीती

कनौज इथं रेल्वे स्थानकाजवळ सुरु असलेल्या इमारतीचं छत कोसळून मोठा अपघात घडला आहे. या अपघातात अनेक कामगार ढिगाऱ्याखाली दबल्याची भीती व्यक्त करण्यात येत आहे.

लखनऊ : कनौज रेल्वे स्थानकाजवळ अमृत भारत योजनेअंतर्गत बांधण्यात येत असलेल्या इमारतीचं छत कोसळून अपघात झाला. या अपघातात तब्बल 25 कामगार ढिगाऱ्याखाली दबल्याची भीती व्यक्त करण्यात येत आहे. ही घटना शनिवारी दुपारी 2.20 च्या दरम्यान घडली. या अपघातात इमारतीचं छत कोसळल्यानं हे 25 जण दबल्याची भीती व्यक्त करण्यात येत आहे. सध्या 6 कामगार बाहेर काढण्यात आलं. इतर कामगार अजूनही ढिगाऱ्याखाली अडकले असून जेसीबीच्या मदतीनं बचाव कार्य सुरू आहे. घटनास्थळी पोलीस आणि प्रशासनातील वरिष्ठ अधिकारी उपस्थित आहेत. जखमींना रुग्णालयात पाठवलं आहे. या घटनेची माहिती मिळताच समाजकल्याण राज्यमंत्री असीम अरुण यांनी देखील घटनास्थळावर धाव घेतली.

कन्नौज रेल्वे स्टेशनचं सुशोभीकरण : अमृत ​​भारत योजनेअंतर्गत कन्नौज रेल्वे स्टेशनचं सुशोभीकरण केलं जात आहे. शनिवारी दुपारी कामगार इमारतीचं बांधकाम करत होते. यावेळी इमारतीचं छत कोसळलं. मात्र मानकांनुसार साहित्य न वापरल्यामुळे छत कोसळल्याचा आरोप करण्यात येत आहे. अपघातातून वाचलेल्या कामगारांच्या मते छत टाकणारे 20 कामगार दोरीवर उभे होते, तर खाली तब्बल 10 कामगार काम करत होते. हे कामगार पडणाऱ्या छताच्या ढिगाऱ्याखाली दबले गेले. पोलीस आणि स्थानिकांच्या मदतीनं 11 जणांना रुग्णवाहिकेनं जिल्हा रुग्णालयात नेण्यात आलं. जखमी 18 कामगारांपैकी 2 कामगारांची प्रकृती चिंताजनक असल्याची माहिती सूत्रांनी दिली आहे.

अपघात घडल्यानंतर मदतीऐवजी नागरिक काढत होते शूटींग : अपघाताची घटना घडल्यानंतर नागरिक मदत करण्याऐवजी त्यांच्या मोबाईल फोनवर व्हिडिओ बनवण्यात व्यस्त होते. स्थानिक प्रशासन घटनास्थळी खूप उशिरा पोहोचले, असाही कामगारांचा आरोप आहे. घटनास्थळी उपस्थित असलेल्या कामगारानं या अपघातात 20 ते 25 कामगार गाडले गेले आहेत, असं रडत सांगितलं. या घटनेत किती लोकांचा मृत्यू झाला याबाबत अद्यापही काही माहिती मिळाली नाही. दरम्यान मुख्यमंत्री योगी आदित्यनाथ यांनी या अपघाताची दखल घेतली आहे. स्थानिक अधिकाऱ्यांना मदतकार्य जलद करण्याच्या सूचना देण्यात आल्या आहेत.

हेही वाचा :