मुंडे घराण्याला मोठा धक्का; बजरंग सोनावणेंकडून पंकजा मुंडेंचा पराभव, 'जरांगे इफेक्ट' - Beed Lok Sabha Election Results 2024

Beed Lok Sabha Election Results 2024 : संपूर्ण राज्याचे लक्ष असलेल्या बीड मतदारसंघात भाजपाच्या राष्ट्रीय सचिव पंकजा मुंडे (Pankaja Munde) यांचा पराभव झालाय. राष्ट्रवादी शरद पवार गटाचे उमेदवार बजरंग सोनवणे (Bajrang Sonawane) यांनी पंकजा मुंडेंचा पराभव केलाय. बीड जिल्ह्यात ओबीसी आणि मराठा हा वाद पेटल्यामुळं त्याचा परिणाम निवडणुकीवर झाला होता, अशी चर्चा होती. त्यामुळं बीडची लढत अटीतटीची झाली होती. पहिल्या काही फेर्‍यांमध्ये आघाडीवर असणार्‍या सोनवणे यांना नंतर मुंडे यांनी रोखून ठेवले. पण 32 व्या फेरीनंतर सोनवणे हे आघाडीवर राहिले.

बीड Beed Lok Sabha Election Results 2024 : शरद पवारांच्या राष्ट्रवादीचे उमेदवार बजरंग सोनवणे यांनी जवळपास सहा हजार पाचशे मतांनी पकंजा मुंडेंचा (Pankaja Munde Lost) पराभव केलाय. दिवसभर अटीतटीची लढत सुरु असताना शेवटच्या फेरीत बजरंग सोनवणेंनी (Bajrang Sonawane Wins) विजय मिळवलाय. तर पंकजा मुंडेंकडून बीड, गेवराई विधानसभा मतदारसंघात फेर मतमोजणीची मागणी करण्यात आली होती.

राज्यात अटीतटीची लढत बीड लोकसभेत : भाजपा उमेदवार पंकजा मुंडेंकडून बीड, गेवराई विधानसभा मतदारसंघात फेर मतमोजणीची मागणी करण्यात आली होती. बीड लोकसभा मतदारसंघात अतिशय अटीतटीच्या लढतीत 32 व्या फेरीमध्ये निकाल समोर आला होता. 31 व्या फेरीनंतर पंकजा मुंडे 400 मतांनी आघाडीवर होत्या. मात्र, शेवटच्या फेरीपर्यंत बीडमध्ये ट्वीस्ट पाहायला मिळाला. पंकजा मुंडे यांनी 34 हजारांचा लीड घेतला होता. तो बजरंग सोनवणे यांनी 4 ते 5 फेऱ्यांमध्ये मोडित काढला होता. मंगळवारी सकाळपासूनच बीडमध्ये अटीतटीचा सामना पाहायला मिळत होता. बीड लोकसभा मतदारसंघ मराठा विरुद्ध ओबीसी राजकारणामुळं अतिशय संवेदनशील बनला होता. प्रत्येक फेरीत आघाडी घेणारा उमेदवार बदलत होता. त्यामुळं राज्यात सर्वांत अटीतटीची लढत बीड लोकसभेत पाहायला मिळाली.

मराठा आरक्षणाचा मुद्दा तापला : बीड लोकसभा मतदारसंघात मराठा आरक्षणाचा मुद्दा सर्वांत तापलेला पाहायला मिळाला. मराठा आरक्षणाच्या मुद्द्यामुळं आणि मनोज जरांगे फॅक्टरमुळं मराठवाड्यातील अनेक जागांवर भाजपला पराभव स्वीकारावा लागल्याच्या चर्चा आहेत. बीडमध्ये लोकसभा निवडणुकीत सर्वांत मोठा परिणाम झाल्याचं बोललं जातंय.

मुंडेंचं अख्ख कुटुंबं होतं प्रचारात : पंकजा मुंडे यांच्यासाठी त्यांचे भाऊ मंत्री धनंजय मुंडे यांनी बहिणीसाठी पायाला भिंगरी लावून प्रचार केला होता. तसंच बहिणीसाठी खासदारकी सोडणाऱ्या प्रितम मुंडे यादेखील प्रचारात उतरल्या होत्या. मात्र, निकालात पंकजा मुंडे यांचा पराभव झालाय. दिवंगत गोपीनाथ मुंडे यांचं निधन झाल्यापासून ते आतापर्यंत या मतदारसंघात मुंडे घराण्याचं वर्चस्व राहिलं. मात्र, आता येथून बजरंग सोनावणे विजयी झाले आहेत.

हेही वाचा -