नंदुरबार : राज्यात विधानसभा निवडणुकीची रणधुमाळी सुरू झाली आहे. त्यातच अनेक दिग्गजांनी यंदा अक्कलकुवा विधानसभा मतदारसंघावर लक्ष केंद्रित केलंय. गेल्या सात टर्मपासून सुरू असलेला ॲड. के. सी. पाडवी यांचा विजय रथ रोखण्यासाठी माजी खासदार, विद्यमान आमदार आणि माजी मंत्र्यांनी चांगलीच कंबर कसली आहे. गेल्या विधानसभा निवडणुकीत के. सी. पाडवी यांनी केवळ 2096 मतांच्या फरकाने आमश्या पाडवी यांच्याविरोधात विजय मिळवला होता. त्यामुळं यंदाच्या निवडणुकीत जिल्ह्यातील सर्व दिग्गजांनी आपली ताकद पणाला लावल्याचं बघायला मिळतंय.
सातपुड्यातील मतदार काँग्रेसबरोबरच : के. सी. पाडवी हे गेल्या 35 वर्षांपासून याच विधानसभा मतदारसंघाचं नेतृत्व करत आहेत. मागील विधानसभा निवडणुकीत विद्यमान विधान परिषदेचे आमदार आमश्या पाडवी यांनी तत्कालीन शिवसेनेचे (उबाठा) नेते चंद्रकांत रघुवंशी यांच्या मदतीनं के. सी. पाडवी यांना पराजित करण्यासाठी कंबर कसली होती. टक्कर देण्यात त्यांना बऱ्यापैकी यशदेखील आलं होतं. मात्र, मतमोजणीच्या शेवटच्या फेरीत के. सी. पाडवी विजयी झाले. काँग्रेस पक्षासाठी जमेची बाजू म्हणजे लोकसभा निवडणुकीत ॲड. के. सी. पाडवी यांचे चिरंजीव काँग्रेसचे उमेदवार ॲड. गोवाल पाडवी यांना 1 लाख 20 हजारांहून अधिक मतं मिळाली होती. त्यामुळं काँग्रेस पक्षावर येथील मतदार सदैव प्रेम करत राहतील आणि ते काँग्रेसलाच साथ देतील, असा ठाम विश्वास त्यांनी व्यक्त केला.
धनुष्य-बाण घेऊन पुन्हा उतरले रिंगणात : राज्यातील पहिल्या क्रमांकाच्या मतदारसंघाचा आमदार होण्यासाठी जिल्ह्यातील सर्व दिग्गज या मतदारसंघातून आपलं नशीब आजमावत आहेत. शिवसेनेचे विद्यमान विधान परिषद सदस्य आमश्या पाडवी हे या मतदारसंघातून पुन्हा एकदा आपलं नशीब आजमावत आहेत. त्यांना विजयी करण्यासाठी शिवसेनेचे संपर्कप्रमुख तथा माजी आमदार चंद्रकांत रघुवंशी यांनी पुन्हा याच मतदारसंघात लक्ष लावून ठेवलंय.
हिना गावितांनी बांधली अपक्ष उमेदवारीची वज्रमूठ : 2024 च्या लोकसभा निवडणुकीत पराजित झालेल्या माजी खासदार डॉ. हिना गावित यांनी महायुतीतील घटक पक्ष गद्दारी करत असल्याचा आरोप केला. तसंच लोकसभा निवडणुकीप्रमाणे विधानसभा निवडणुकीतदेखील ते गावित परिवारासोबत गद्दारी करत असल्याचं म्हणत त्यांनी थेट भाजपाच्या सदस्यत्वाचा राजीनामा देण्याचं पाऊल उचललं. त्यानंतर हिना गावित यांनी याच मतदारसंघातून अपक्ष लढण्याचा निर्णय घेतला. त्यांनी स्पष्ट केलं की, "मी गद्दारांचा बदला घेऊन विजयी होईन आणि महायुतीत सहभागी होईन." तर लोकसभा निवडणुकीत हिना गावित यांना या मतदारसंघातून सुमारे 84,622 इतकी मतं प्राप्त झाली होती. त्यामुळं त्यांनी याच मतदारसंघावर आपला दावा केलाय. मात्र, मतदारांच्या आकडेवारीचं गणित पाहता लोकसभेच्या तुलनेत त्यांना अजून जास्त मेहनत करावी लागणार आहे.
पद्माकर वळवी यांनी कसली कंबर : शहादा तळोदा मतदार संघाचे नेतृत्व करणारे आणि माजी मंत्री असलेले पद्माकर वळवी हे देखील अक्कलकुवा मतदारसंघातून निवडणुकीच्या रिंगणात उतरलेत. विविध आदिवासी संघटनाच्या कामाच्या मार्फत त्यांनी धडगाव आणि अक्कलकुवा मतदारसंघात आपली छाप निर्माण केली आहे. त्यामुळं त्यांनी या मतदारसंघातून भारतीय आदिवासी पार्टी या पक्षाकडून आपला नामांकन अर्ज दाखल करून उमेदवारी कायम ठेवली आहे. तसंच "संघटनांच्या मार्फत केलेल्या कार्याची मला पावती नक्कीच मिळेल", असा विश्वासही त्यांनी व्यक्त केलाय.
हेही वाचा -
