राज्यातील सरकार बरखास्त करून राष्ट्रपती राजवट लागू करा, नाना पटोले यांची मागणी

Abhishek Ghosalkar Murder Case : शिवसेना ठाकरे गटाचे माजी नगरसेवक अभिषेक घोसाळकर यांच्या हत्येनं संपूर्ण मुंबई शहर हादरलं आहे. मॉरिस नोरोन्हानं घोसाळकर यांना कार्यालयात बोलवलं. त्यांच्यासह फेसबुक लाईव्ह केलं आणि त्यानंतर त्यानं अभिषेक घोसाळकर यांच्यावर गोळ्या झाडल्या. या घटनेनंतर राज्यातील राजकीय नेत्यांमध्ये पुन्हा एकदा आरोप प्रत्यारोपांना सुरुवात झाली आहे. याच पार्श्वभूमीवर आता काँग्रेस प्रदेशाध्यक्ष नाना पटोले यांनी पत्रकार परिषद घेत सत्ताधाऱ्यांवर निशाणा साधला आहे.

मुंबई Abhishek Ghosalkar Murder Case : ठाकरे गटाचे माजी नगरसेवक अभिषेक घोसाळकर यांच्यावर गुरुवारी (8 फेब्रुवारी) रात्री गोळीबार करण्यात आला. या घटनेत अभिषेक घोसाळकर आणि गोळ्या झाडणारा आरोपी मॉरिस नोरोन्हा या दोघांचा मृत्यू झाला. त्यामुळं सर्वत्र एकच खळबळ उडाली आहे. तसंच या मुद्द्यावरून आता विरोधक उपमुख्यमंत्री देवेंद्र फडणवीस यांच्या राजीनाम्याची मागणी करत आहे. यामुळं राज्यातील राजकीय वातावरण चांगलंच तापलंय. याच पार्श्वभूमीवर आता काँग्रेस प्रदेशाध्यक्ष नाना पटोले यांनी पत्रकार परिषद घेत सत्ताधाऱ्यांवर जोरदार टीका केली आहे. तसंच शनिवारी राज्यपालांची भेट घेऊन राज्यात राष्ट्रपती राजवट लागू करण्याची मागणी करणार असल्याचंही पटोले म्हणाले आहेत.

फडणवीस यांच्या 'त्या' वक्त्यावरून पटोले भडकले : अभिषेक घोसाळकर हत्येप्रकरणी प्रसार माध्यमांशी संवाद साधत असताना उपमुख्यमंत्री देवेंद्र फडणवीस म्हणाले होते की, "या प्रकरणाला काही लोक राजकीय रंग देण्याचा प्रयत्न करत आहेत. आता तर विरोधी पक्षांची अवस्था अशी आहे, की आता एखाद्या गाडीखाली श्र्वान आला तरी ते, गृहमंत्र्यांचा राजीनामा मागतील." फडणवीसांच्या या वक्तव्यावर टीका करत नाना पटोले म्हणाले की, "भाजपा प्रणित असलेले शिंदे, अजित पवार सरकार महाराष्ट्राला काळिंबा फासण्याचं काम करताय. गृहमंत्र्यांनी बेजबाबदार वक्तव्य करून राज्याची दुर्गती केली आहे. कायदा आणि सुव्यवस्थेचे तीन तेरा वाजवले असून गृहमंत्र्यांना अशी जबाबदारी नाकारता येणार नाही. देवेंद्र फडणवीसांनी तात्काळ गृहमंत्री पदाचा राजीनामा द्यावा." तसंच या संदर्भात आम्ही उद्या राज्यपालांची भेट घेणार असून राज्यात तात्काळ सरकार बरखास्त करून राष्ट्रपती राजवट लागू करावी, अशी मागणी करणार असल्याचंही नाना पटोले यांनी सांगितलं.

अंजली दमानिया यांनीही केली टीका : सामाजिक कार्यकर्ता अंजली दमानिया यांनी देखील या प्रकरणावरुन देवेंद्र फडणवीसांवर टीका केली आहे. यासंदर्भात एक्सवर (पूर्वीचे ट्वीटर) पोस्ट शेअर करत त्या म्हणाल्या आहेत की, "हे चाललंय काय? कायदा सुव्यवस्था पूर्णपणे कोलमडली? सदा सरवणकरांच्या बंदुकीचा गोळीबार काय, गणपत गायकवाडांचा पोलीस स्टेशन मधील गोळीबार काय, नितेश राणेंची खुलेआम धमकी काय? गृहमंत्री फोडाफोडीच्या राजकारणात इतके माशगुल आहेत की गुंडगिरीवर आळा घालायला त्यांच्याकडे बहुदा वेळंच उरलेला दिसत नाही." तसंच गुंडांना पाठीशी घालण्याचे हे दुष्परिणाम असल्याचंही त्या म्हणाल्या.

कडक कारवाई झालीच पाहिजे : याप्रकरणी प्रतिक्रिया देत शिंदे गटाचे आमदार प्रकाश सुर्वे म्हणाले की, "एखाद्या लोकप्रतिनिधीवर असा हल्ला होणं फार दुःखदायक आहे. यासंदर्भात कडक कारवाई करण्यात यावी यासाठी मी मुख्यमंत्री आणि उपमुख्यमंत्र्यांना पत्र लिहिणार आहे. विरोधी पक्ष काय बोलतोय याला महत्व नाही, सक्त कारवाई व्हावी ही मागणी आम्ही करणार आहोत", असं ते म्हणाले.

हेही वाचा -