हैदराबाद - दक्षिणात्य अभिनेता नागा चैतन्य आणि शोभिता धुलिपाला यांचा विवाह गेल्या काही आठवड्यापासून चर्चेत आहे. अखेर त्यांच्या लग्नाचा दिवस उजाडला असून यादरम्यान नागा चैतन्या आणि त्याची माजी पत्नी सामंथा रुथ प्रभू यांच्या लग्नातील फोटो सोशल मीडियावर व्हायरल झाले आहेत. यावर नेटिझन्स वेगवेगळ्या पद्धतीनं आपल्या प्रतिक्रिया देताना दिसतात. सोशल मीडियावर काही नेटिझन्स सामंथाला हे फोटो डिलीट करण्याचा सल्ला देत आहेत.
सामंथा आणि नागाच्या लग्नाचे फोटो व्हायरल
सामंथा आणि नागा चैतन्य यांचे लग्न सात वर्षापूर्वी 2017 मध्ये झालं होतं. हा एक भव्य सोहळा होता. मात्र त्याचं हे लग्न केवळ चार वर्ष टिकलं आणि 2021 मध्ये त्यांचा घटस्फोट झाला. आता नागा चैतन्य आपली प्रेयसी शोभिता धुलीपालाशी लग्न करत आहे. दरम्यान, नागा आणि सामंथा यांच्या ख्रिश्चन रितीरिवाजानुसार झालेल्या लग्नाचे फोटो व्हायरल होत आहेत. एका फोटोमध्ये सामंथा नागाचं चुंबन घेताना दिसत आहे. सामांथानं नागाच्या वाढदिवसानिमित्त हा फोटो पोस्ट केला होता. याच्या कॅप्शनमध्ये तिनं लिहिलं होतं, "हॅप्पी बर्थडे माय एव्हरीथिंग, मी शुभेच्छा मागत नाही तर दररोज प्रार्थना करते की, देव तुला जे हवं आहे ते देवो."
नेटिझन्सच्या प्रतिक्रिया
हा फोटो सोशल मीडियावर व्हायरल होताच नेटकऱ्यांनी कमेंट करायला सुरुवात केली. एकानं लिहिले की, "स्ट्राँग सॅम, याहूनही जास्त प्रेमासाठी तू पात्र आहेस." आणखी एकानं लिहिलं, "सामंथा हे फोटो हटवं. जे हवंय ते त्याला मिळालंय." "अशा फोटोंचा आता काय उपयोग", असंही एकानं म्हटलंय.
नागा शोभिताच्या विवाहाला स्टार मंडळींची उपस्थिती
नागा चैतन्य आणि शोभिता आज ४ डिसेंबरला लग्नाच्या बेडीत अडकणार आहेत. या जोडप्यानं ऑगस्टमध्ये त्यांच्या एंगेजमेंटची घोषणा केली होता. आता दोघेही लग्न करणार आहेत. हे लग्न बुधवारी रात्री हैदराबादमध्ये होईल. अर्थातच नागा चैतन्याचा हा दुसरा विवाह आहे. हैदराबाद शहरातील प्रतिष्ठित अन्नपूर्णा स्टुडिओत त्यांचा विवाह सोहळा पार पडणार आहे. या लग्नाला फिल्म इंडस्ट्रीतील अनेक कलाकार उपस्थित राहणार आहेत. नागार्जुनने चिरंजीवी, अल्लू अर्जुन, नयनतारा, अक्किनेनी आणि दग्गुबती कुटुंब, एनटीआर, राम चरण आणि उपासना, महेश बाबू आणि नम्रता शिरोडकर यांसारख्या तेलगू चित्रपट उद्योगातील कलाकारांना आमंत्रित केलं आहे.
